قازاقستان رەسپۋبليكاسىنىڭ جاڭا كونستيتۋتسياسى جوباسىندا ەلدىڭ ۆيتسە-پرەزيدەنتىن تاعايىنداۋ ءتارتىبى مەن وكىلەتتىكتەرى ەگجەي-تەگجەيلى جازىلعان. بۇل تۋرالى ءماجىلىس دەپۋتاتى نيكيتا شاتالوۆ «AMANAT» پارتياسى فراكتسياسىنىڭ جينالىسىندا سويلەگەن سوزىندە مالىمدەدى.

ونىڭ ايتۋىنشا، ۆيتسە-پرەزيدەنت – تەك پرەزيدەنتتىڭ تاپسىرماسى بويىنشا جانە ونىڭ اتىنان قاتاڭ تۇردە بەلگىلەنگەن باعىتتاردا ارەكەت ەتەتىن لاۋازىمدى تۇلعا. نەگىزگى وكىلەتتىكتەرىنە مەملەكەتتىڭ حالىقارالىق ارەناداعى مۇددەلەرىن تانىستىرۋ، قۇرىلتايمەن، ۇكىمەتپەن جانە باسقا دا مەملەكەتتىك ورگاندارمەن ءوزارا ءىس-قيمىل جاساۋ، ەل ىشىندە جانە شەتەلدە قوعامدىق-ساياسي، عىلىمي، مادەني-اعارتۋشىلىق ۇيىمدارمەن جۇمىس ىستەۋ، سونداي-اق پرەزيدەنت ايقىندايتىن وزگە دە مىندەتتەردى ورىنداۋ كىرەدى.

نيكيتا شاتالوۆ تاعايىنداۋ تارتىبىنە ەرەكشە توقتالدى: ۆيتسە-پرەزيدەنتتىڭ كانديداتۋراسىن پرەزيدەنت ۇسىنادى، ال ونى پارلامەنت داۋىستاردىڭ قاراپايىم كوپشىلىگىمەن بەكىتەدى.

«بۇل لاۋازىمنىڭ قوسارلانعان لەگيتيمدىلىگىن قامتاماسىز ەتەدى: پرەزيدەنتتىڭ باستاماسى مەن جاۋاپكەرشىلىگى جانە پارلامەنتتىڭ كەلىسىمى»، – دەدى دەپۋتات.

سونىمەن قاتار، جاڭا ينستيتۋت ۆيتسە-پرەزيدەنت ءرولىنىڭ بەيتاراپتىعىن قامتاماسىز ەتەتىن قاتاڭ شەكتەۋلەردى كوزدەيدى. ول ءوز وكىلەتتىگى كەزەڭىندە دەپۋتات بولىپ سايلانا المايدى، وزگە اقىلى قىزمەتتەر اتقارا المايدى، كاسىپكەرلىكپەن اينالىسا المايدى جانە ساياسي پارتياعا مۇشە بولا المايدى. وسىلايشا، بۇل لاۋازىم پرەمەر-مينيستردەن ايىرماشىلىعى رەتىندە پارتيالىق باسەكەدەن تۇبەگەيلى وقشاۋلانعان. شاتالوۆتىڭ ايتۋىنشا، پرەمەر-مينيستر پارلامەنتتىك جانە پارتيالىق لوگيكا اياسىندا ارەكەت ەتەدى.

جاڭا لاۋازىم وتپەلى جاعدايدا ەرەكشە ماڭىزعا يە بولادى: پرەزيدەنتتىڭ وكىلەتتىگى مەرزىمىنەن بۇرىن توقتاتىلعان جاعدايدا، ۆيتسە-پرەزيدەنت ەكى ايعا دەيىن – جاڭا سايلاۋ وتكىزىلگەنگە دەيىن – ۋاقىتشا مەملەكەت باسشىسىنىڭ مىندەتىن اتقارادى. نيكيتا شاتالوۆ ۆيتسە-پرەزيدەنت ينستيتۋتىنىڭ ەنگىزىلۋى 2022 جىلعى رەفورمانى تولىقتىرىپ، بيلىكتىڭ جاڭا ينستيتۋتسيونالدىق فورماتىن قالىپتاستىراتىنىن، رولدەر، جاۋاپكەرشىلىك پەن راسىمدەر ايقىندالعان نەعۇرلىم ناقتى ساياسي مادەنيەت قالىپتاستىرۋعا ىقپال ەتەتىنىن اتاپ ءوتتى. ونىڭ ايتۋىنشا، ۆيتسە-پرەزيدەنت پارلامەنتتىڭ كەلىسىمىنەن ءوتىپ، مەملەكەت باسشىسىنىڭ اتىنان دەلەگاتتالعان وكىلەتتىكتەر شەڭبەرىندە ارەكەت ەتەتىن مۇنداي مودەل الەمدە وتە سيرەك كەزدەسەدى.

«جاڭا كونستيتۋتسيا جاڭا ينستيتۋتسيونالدىق قاڭقانى قالىپتاستىرادى، سونىمەن بىرگە رولدەر، جاۋاپكەرشىلىك پەن راسىمدەردىڭ نەعۇرلىم ناقتى بولىنۋىنە نەگىزدەلگەن جاڭا ساياسي مادەنيەتتى دە ورنىقتىرادى»، – دەپ تۇيىندەدى نيكيتا شاتالوۆ.

Abai.kz