103 شوبەرەسى بار ناعيمان شالاباەۆا جاركەنت قالاسىنداعى №290 داۋىس بەرۋ ۋچاسكەسىندە تاڭداۋ جاساپ، ەلىمىزدەگى ماڭىزدى قادامنان قالىس قالمادى.

عاسىردان اسقان ابىز انا 13 قۇرساق كوتەرىپ، بۇگىندە 36 نەمەرە،103 شوبەرە ودان 13 شوپشەك ءسۇيىپ وتىر. عۇمىرىنىڭ جۇزدەن اسقان جىلىندا ەلىمىزدەگى بارلىق ماڭىزدى ساياسي وقيعالاردان قالىس قالماي ارقاشان كوپكە ۇلگى بولۋدا. 105 جاسىندا اۋلەتتىڭ عانا ەمەس ەلىنىڭ اناسىنا اينالعان ناعيمان اپا دەنى ساۋ، ءالى تىڭ ەكەنىن ايتادى.

"بۇگىن مەن تاڭنان وسىندا كەلۋگە دايىندالدىم. ومىرىمدە وسىنشا جاسقا كەلگەنشە تالاي سايلاۋلاردا داۋىس بەردىم. قۇدايعا ءتاۋبا مەن كوپتى كوردىم. اشتىقتى، جوقشىلىقتى كوردىم. قازىر نە بار ءبارى بار. قاناعات ەتۋ كەرەك جاستار. ەلۋ جىلدا ەل جاڭا. مەنىڭ داۋىس بەرۋىم وسى جاڭارۋعا قوسقان ۇلەسىم. ەشتەڭە جاساماساڭدا ءوزىڭنىڭ ەلىڭنىڭ دەگەنىن قولدا. مەنىڭ جاسىمدى بەرسىن سەندەرگە", - دەگەن ناعيمان اپادان داۋىس بەرۋگە كەلگەن تۇرعىندار باتاسىن الىپ، قۇرمەتتەرىن بىلدىرۋدە.

جالپى پانفيلوۆ اۋدانىندa 79 رەفەرەندۋم ۋچاسكەسى بولسا، سونىڭ 84 410 تۇرعىنى داۋىس بەرۋ قۇقىعىنا يە.

Abai.kz