حالىقارالىق قىلمىستىق سوت يزرايل شەنەۋنىكتەرىن تۇتقىنداۋعا قۇپيا وردەر سۇراتقان.

حالىقارالىق قىلمىستىق سوت (حقس) ءيزرايلدىڭ بىرنەشە جوعارى لاۋازىمدى شەنەۋنىگىن تۇتقىنداۋعا قۇپيا وردەر سۇراتقان بولۋى مۇمكىن، دەپ حابارلادى Haaretz ديپلوماتيالىق دەرەككوزگە سىلتەمە جاساپ.

باسىلىم مالىمەتىنشە، ءسوز ەكى ساياساتكەر مەن ەكى اسكەري شەنەۋنىك تۋرالى بولىپ وتىر. بۇعان دەيىن باق حقس پروكۋراتۋراسى ءيزرايلدىڭ قارجى ءمينيسترى بەتسالەل سموتريچ پەن ۇلتتىق قاۋىپسىزدىك ءمينيسترى يتامار بەن گۆيرگە قاتىستى ءىس قوزعاۋ مۇمكىندىگىن قاراستىرىپ جاتقانىن جازعان.

وردەرلەر ناقتى قاشان بەرىلگەنى جانە كىمدەرگە قاتىستى ەكەنى رەسمي جاريالانعان جوق.

2024 جىلدىڭ اياعىندا حقس يزرايل پرەمەرى بينيامين نەتانياحۋ مەن ەكس-قورعانىس ءمينيسترى يواۆ گاللانتقا قاتىستى تۇتقىنداۋ وردەرىن شىعارعان ەدى.

سوت ولار گازاداعى وپەراتسيا كەزىندە ادامزاتقا قارسى جانە سوعىس قىلمىستارىنا قاتىسى بولۋى مۇمكىن دەگەن كۇدىككە ىلىنگەنىن ايتقان. يزرايل ۇكىمەتى حقس-تىڭ ول شەشىمىن ءۇزىلدى-كەسىلدى قابىلدامايتىنىن مالىمدەگەن.

Abai.kz