الماتىداعى جامبىل اتىنداعى قازاق مەملەكەتتىك اكادەميالىق فيلارمونياسىندا ەلىمىزدىڭ بەلگىلى ۆيولونچەليسى مۋسا كەرىمباەۆ قازاقستاندىق كومپوزيتورلاردىڭ شىعارماشىلىعىنا ارنالعان ەرەكشە كونتسەرت وتكىزدى. بۇل كەش ۇلتتىق مۋزىكا ونەرىنىڭ تەرەڭدىگىن سەزىندىرگەن، رۋحاني اسەرى مول مادەني وقيعاعا اينالدى.

مۋسا كەرىمباەۆ – «قازاقستان رەسپۋبليكاسىنىڭ مادەنيەت قايراتكەرى» توسبەلگىسىنىڭ يەگەرى، جامبىل اتىنداعى فيلارمونيانىڭ ءسوليسى، احمەت جۇبانوۆ اتىنداعى رەسپۋبليكالىق قازاق مامانداندىرىلعان مۋزىكا مەكتەپ-ينتەرناتى مەن قۇرمانعازى اتىنداعى قازاق ۇلتتىق كونسەرۆاتورياسى تۇلەگى. ول حالىقارالىق جانە رەسپۋبليكالىق دەڭگەيدەگى كوپتەگەن بەدەلدى بايقاۋلاردىڭ لاۋرەاتى اتانىپ، قازاق مۋزىكا ونەرىن الەم ساحنالارىندا تانىتىپ جۇرگەن ونەرپازداردىڭ ءبىرى.

ونەر يەسى ءار جىلدارى ۆالەري گەرگيەۆ، پلاسيدو دومينگو سەكىلدى الەمگە ايگىلى مۋزىكانتتارمەن ءبىر ساحنادا ونەر كورسەتكەن. بۇل ونىڭ كاسىبي دەڭگەيىنىڭ جوعارى ەكەنىن ايقىن اڭعارتادى.

كونتسەرت باعدارلاماسىنا قازاق مۋزىكاسىنىڭ التىن قورىنا ەنگەن شىعارمالار ەنگىزىلدى. كەش بارىسىندا احمەت جۇبانوۆ، عازيزا جۇبانوۆا، لاتيف حاميدي، مۇقان تولەباەۆ، ەۆگەني برۋسيلوۆسكي شىعارمالارى ورىندالدى. سونىمەن قاتار اباي قۇنانباەۆ، قۇرمانعازى ساعىربايۇلى، تاتتىمبەت قازانعاپۇلى، ىقىلاس دۇكەنۇلى، اقان سەرى مۇرالارى دا كورەرمەنگە ۇسىنىلدى.

كەشتىڭ ەرەكشە تۇستارىنىڭ ءبىرى – ۆيولونچەلگە ارنالعان اۆتورلىق وڭدەۋلەر بولدى. اسىرەسە ءابدىمومىن جەلدىباەۆتىڭ «ەركە سىلقىم»، ەستايدىڭ «قۇسني-قورلان»، قۋات شىلدەباەۆتىڭ «قاراكەمەر» جانە «وتان انا» شىعارمالارى تىڭدارمان كوڭىلىنەن شىقتى. قازاقى اۋەننىڭ ۆيولونچەل ۇنىمەن ۇندەسۋى شىعارمالاردىڭ جاڭا قىرىن اشىپ، ۇلتتىق مۋزىكاعا وزگەشە تىنىس بەرگەندەي اسەر قالدىردى.

بۇل كونتسەرتكە قاتىسقان كورەرمەندەردىڭ ءبىرى ديانا باكبەرگەنوۆا كەشتەن ۇلكەن رۋحاني اسەر العانىن ايتادى. ونىڭ پىكىرىنشە، بۇگىنگى قوعام قازاقستاندىق كومپوزيتورلاردىڭ مۇراسىن تولىق تانىپ-ءبىلىپ وتىرعان جوق.

«ءبىز ءوز كومپوزيتورلارىمىزدى تەرەڭ تاني بەرمەيمىز. بىراق ولار بىزگە وتە باي رۋحاني ءارى مادەني مۇرا قالدىردى. سوندىقتان كلاسسيكالىق مۋزىكانى، حالىق اندەرىن جانە كومپوزيتورلاردىڭ شىعارمالارىن كەڭىنەن ناسيحاتتاۋ قاجەت»، – دەيدى ول.

شىنىندا دا، بۇگىندە قازاق كلاسسيكالىق مۋزىكاسىنىڭ الىپتارى – احمەت جۇبانوۆ، عازيزا جۇبانوۆا، ەركەعالي راحماديەۆ سەكىلدى تۇلعالاردىڭ شىعارمالارى كەڭ اۋديتورياعا تولىق جەتىپ وتىرعان جوق. ال بۇل مۇرا تەك قازاقستاندا عانا ەمەس، حالىقارالىق دەڭگەيدە دە دارىپتەلۋگە لايىق.

قازىرگى ۋاقىتتا الەۋمەتتىك جەلىلەر، ستريمينگ پلاتفورمالار جانە ءتۇرلى مەديا الاڭدار ۇلتتىق مۋزىكانى ناسيحاتتاۋعا زور مۇمكىندىك بەرەدى. وسىنداي كونتسەرتتەر ارقىلى جاستاردىڭ كلاسسيكالىق مۋزىكاعا قىزىعۋشىلىعى ارتىپ، ۇلتتىق ونەرگە دەگەن قۇرمەتى كۇشەيە تۇسەدى.

تەحنولوگيا، اۆتوماتتاندىرۋ جانە جاساندى ينتەللەكت قارقىندى دامىعان زاماندا ادام جانىنا رۋحاني تىنىشتىق پەن ەستەتيكالىق تالعام اۋاداي قاجەت. مامانداردىڭ ايتۋىنشا، كلاسسيكالىق مۋزىكا ادام ميىنىڭ جۇمىسىن جاقسارتىپ، ويلاۋ قابىلەتى مەن ەموتسيونالدىق تەپە-تەڭدىككە وڭ اسەر ەتەدى.

مۋسا كەرىمباەۆتىڭ بۇل كونتسەرتى تەك مۋزىكالىق كەش قانا ەمەس، قازاق مادەنيەتىنىڭ تەرەڭدىگىن سەزىندىرگەن رۋحاني كەزدەسۋ بولدى. وسىنداي كەشتەر ۇلتتىق ونەردىڭ ومىرشەڭدىگىن دالەلدەپ، مادەني مۇرانى بولاشاق ۇرپاققا جەتكىزۋدىڭ ماڭىزدى جولىنا اينالارى ءسوزسىز.

Abai.kz