Ұлттық қор – ел болашағының қаржылық іргетасы. Былтыр сәуірде Ұлттық банк 2030 жылға дейінгі тұжырымдаманы жария­лап, сол уақытқа дейін Ұлттық қор активтерін 100 млрд долларға жеткізу мақсатын көздеген болатын. Сол межеге жетуге бес-ақ жыл қалды, ал бүгінгі ахуал­дан мұндай биікке көтерілу жолы бұлыңғыр көрінеді.

Былтыр қор­ға жалпы 8,8 трлн теңге түссе, соның 5,6 трлн тең­ге­сін алып қойдық. Оның 2-еуі кепілдендірілген трансферт ре­тінде, 3,6 трлн теңгесі мақсатты трансферт ретінде алынған. Бас­қару мен аудит шығындарына 21,5 млрд теңге жұмсалған. Алғаш­­қы­да 2024 жылға арналған бюджетте мақсатты трансферт көлемі 1,6 трлн теңге деп белгі­лен­ген еді. Бірақ жыл соңына қарай бюджет тапшылығының артуына байланысты Үкімет қо­сымша 2 трлн теңге сұрап, трансферт көлемін 3,6 трлн теңгеге дейін ұлғайту туралы шешім қабыл­­дан­ды. Келер күнге деп жинап жатқан ақшаның жартысынан көбі жаратылып кетті. Сөйтіп, қорымыз бір жылда 3 трлн теңгеге ғана өсті.

Демек былтырғы қаң­тарда қоржынымызда 29,8 трлн теңге болса, қазір 33 трлн теңгеден сәл асың­қырап тұр. Бұл ақпаратты Қаржы ми­нистр­лігінің Ұлттық қор түсімдеріне қатысты есебінен алып отырмыз. 2024 жылы жалпы 8,82 трлн теңге түскен. Оның ішінде 3,8 трлн теңге – мұнай секторының салықтарынан, 4,98 трлн теңге инвестициялық кіріс­тен (қордың активтері әртүрлі құнды қағаздарға және басқа құ­рал­дарға инвестицияланған) жи­нал­ған.

Үкімет 2025 жылы Ұлттық қордан 2 трлн теңге кепіл­ден­ді­ріл­ген трансферт ретінде, 3,25 трлн теңге мақсатты трансферт алуды жоспарлайды. Тек 2026 жылдан бастап мақсатты трансферттерден бас тарту көз­деледі.

Дереккөзі: Мың теңге телеграм арнасы

Abai.kz