Италияда өтіп жатқан 2026 жылғы Қысқы Олимпиада ойындарында қазақстандық мәнерлеп сырғанаушы Михаил Шайдоров күтпеген, бірақ тарихи жеңіске қол жеткізіп, ел спортының жаңа дәуірін ашты.

21 жастағы спортшы ерлердің еркін бағдарламасында мінсіз өнер көрсетіп, басты фавориттердің қателіктерін тиімді пайдаланды. Біз осы жаңалық туралы шетелдік БАҚ-қа шолу жасадық.

«France 24» сайты былай деп ақпарат жариялапты.

«Жұма күні ерлер арасындағы алтын медальдың басты фавориті саналған Илья Малинин еркін бағдарламада қателікке жол берді. Негізгі үміткерлердің көпшілігі сүрінген сәтте, Михаил Шайдоров сабыр сақтап, өз мүмкіндігін толық пайдаланды.

«Дұрыстап ұйықтай алмадым. Бірінші күні бар болғаны екі сағат қана ұйықтадым, оянғанда қатты таңғалдым», – деді Шайдоров AFP агенттігіне жексенбі күні. «Бұл – бүкіл Қазақстан үшін мереке. Еліме осындай қуаныш сыйлау – менің өмірлік басты арманым әрі мақсатым шығар».

21 жастағы спортшының алтыны Қазақстанның Қысқы Олимпиададағы небәрі екінші чемпионы атануы болды. Бұған дейін 1994 жылы Лиллехаммерде шаңғышы Владимир Смирнов чемпион атанған еді.

«Енді Олимпиада чемпионы атанғанымды түсіндім. Бұл мен армандағаннан да артық шығар», – деді ол.

Шайдоровтың айтуынша, бала кезінде ол коньки тебуге аса құлықты болмаған. Дегенмен оның әкесі Станислав Шайдоров – Қазақстанның бұрынғы чемпионы. Оның бәсекелік жігерін сегіз жыл бұрын жапон жұлдызы Юдзуру Ханю өнерін көру оятқан. Ханю 2014 және 2018 жылдары қатарынан Олимпиада чемпионы атанған. «Мен Юдзуру Ханюді көрдім, ол мен үшін керемет мотивация көзі болды және мені осы деңгейге алып келді», – деді ол. Өткен жылғы әлем чемпионатында күміс алғанына қарамастан, Алматыдан шыққан спортшы үшін Олимпиада медалі алыстағы арман болып көрінген. «Мен медаль туралы көп ойлаған жоқпын – тек жақсы сырғанап, барымды салғым келді. Егер бәрі жақсы болса, қола алуым мүмкін деп ойладым. Бірақ алтын аламын деп елестете де алмадым».

Сейсенбі күнгі қысқа бағдарламада бесінші орын алғаннан кейін ол нәтижесіне риза болған. «Өзім жасай алатынның бәрін орындағандықтан, өзімді тамаша сезіндім. Бесінші орын мен үшін жақсы нәтиже болды, өйткені ең мықты топта қалып, сол топта екінші болып сырғанаған едім. Тек өз жұмысымды істегім келді. Нәтиже қандай болса да – соған дайын болдым. Жақсы нәтиже болса, тұғырға көтерілуім мүмкін екенін білдім, бірақ мен үшін ең жоғарысы қола еді. Алтын туралы ойлаған жоқпын».

Ал «Collegefootball» сайты былай деп жазады:

«Қазақстандық әнші Димаш Құдайберген Италияда өтіп жатқан Қысқы Олимпиадада алтын медаль жеңіп алған отандасы Михаил Шайдоровты құттықтады. Шайдоров еркін бағдарламаға бесінші орынмен шығып, сенсациялық жеңіске жетті. Сейсенбі күнгі қысқа бағдарламада ол 92,94 ұпай жинаған. Финалда ол АҚШ спортшысы Илья Малинин мен жапониялық Юма Кагияма сияқты элиталық қарсыластарды артта қалдырды. 21 жастағы спортшы еркін бағдарламасын Димаштың «Confessa & Diva Dance» әнімен орындады. Ол өнерін қуатты triple Axel және quadruple Salchow комбинациясымен бастады.

Тарихи жеңісті құрметтеу және өз әнімен орындалған әсерлі сәтке ризашылық белгісі ретінде Құдайберген Олимпиада чемпионына автокөлік сыйлайтынын жариялады. Ол жүрекжарды құттықтауында бұл жеңіс марқұм қазақстандық мәнерлеп сырғанаушы Денис Тен мұрасын құрметтеу екенін атап өтті. Денис Тен 2014 жылғы Сочи Олимпиадасында қола жүлде алған және 2018 жылы Алматыда қаскөйлердің шабуылынан қаза тапқан. Шайдоровтың жеңісі Қазақстанның мәнерлеп сырғанаудан алғашқы Олимпиада алтыны болды. Сонымен қатар, бұл елдің Қысқы Олимпиададағы соңғы алтынынан бергі 32 жыл ішіндегі алғашқы алтын медалі».

Тарихи жеңіс үшін BBC-де ақпарат арнапты.

«2026 жылғы Милан – Кортина Олимпиадасында ерлер арасындағы алтынға басты үміткер Илья Малинин екі рет құлап, жүлдесіз қалды. Еркін бағдарлама ерекше драмалық сипат алды: соңғы алты спортшының бесеуі қателік жіберді. Тек Қазақстандық Михаил Шайдоров қателіксіз сырғанап, елін 32 жылдан кейінгі алғашқы қысқы Олимпиада алтынымен қуантты. Юма Кагияма төрт айналымдық секіру кезінде құлап, күміспен шектелді, ал қола медаль оның отандасы Шун Сатоға бұйырды. Малинин сегізінші орынмен аяқтады.

Алғашқы Олимпиадасына қатысқан Малинин «Quad God» лақап атымен танымал – ол төрт жарым айналымдық секіруді (quadruple axel) сәтті орындаған жалғыз спортшы. Бұл элемент спортшының ауада төрт жарым рет айналып, артқа қарай таза қонуын талап етеді. Алайда ол бұл Олимпиадада бұл секіруді орындамады. Финалда ол тек single axel жасап, көрермендердің қынжылысын туғызды. Quad lutz орындау кезінде мұзға құлаған сәт аренаны үнсіз қалдырды. Көп ұзамай ол тағы да құлады. Жаттығу соңында Малинин шашынан ұстап, тізесіне сүйеніп тұрып қалды. Мұз айдынынан кетіп бара жатып, көз жасына әрең ие болды. «Quad God» та адам екені дәлелденді».

Дайындаған Дүйсенәлі Әлімақын

Abai.kz