قر باس پروكۋرورى بەرىك اسىلوۆ پەن
الماتى وبلىسىنىڭ اكىمى
مارات سۇلتانعازيەۆ مىرزالارعا دەپۋتاتتىق ساۋال

ءبىز – دەپۋتاتتار مىنا جاقتا اق تەر-كوك تەر بولىپ، قازاقستان حالقىنان ۇرلانعان، تالان-تاراجعا تۇسكەن اكتيۆتەردى ەلگە قايتارۋعا قاتىستى زاڭدى قابىلداپ جۇرگەندە، الماتى جاقتا «ەسكى» قازاقستاننىڭ نازارباەۆتان قالعان جەبىرلەرى مەن جەمقورلارى قاراپايىم حالىقتى قاناۋدى جالعاستىرىپ جاتىر. ناقتىلاپ ايتقاندا، نازارباەۆتار اۋلەتىنىڭ وكىلدەرى – نۇربول بولاتۇلى نازارباەۆ، قايرات ساتىبالدى مەن احمەتجان ەسىموۆتىڭ نوكەرلەرى جانە «قاڭتار گەنەرالى» سەرىك كۇدەباەۆ الماتى وبلىسىنداعى قاراساي اۋدانىنا قاراستى بۇرىنعى «كامەنكا» اسىل تۇقىمدى مال زاۋىتىنىڭ ۇجىم مۇشەلەرىنە پايعا بەرىلگەن جەردى كوپە-كورنەۋ تارتىپ العان.

بۇلار پايشىلاردىڭ 274 گەكتار ۇلەسىن ءوز ادامدارىنىڭ اتىنا قۇرىلعان جاۋاپكەرشىلىگى شەكتەۋلى سەرىكتەستىكتەرگە راسىمدەپ، قازاقستاننىڭ زاڭىن وزبىرلىقپەن بۇزعان. ەكى مىڭنان استام پايشىلاردىڭ زاڭدى ۇلەسىن «يجس»-قا اينالدىرىپ، ونىڭ ەداۋىر بولىگىن ساتىپ جىبەرگەن.

قۇرمەتتى بەرىك نوعايۇلى!

وسى ورايدا مەنىڭ قولىما تيگەن بارلىق قۇجاتتاردىڭ كوشىرمەسىن ءسىزدىڭ اتىڭىزعا جولدايمىن. الماتى وبلىسى مەن قاراساي اۋدانىنىڭ پروكۋراتۋرا ورگاندارىنان ادىلەت تاپپاي، وزبىرلىقتىڭ قۇربانى بولعان، شىرىلداعان حالىقتىڭ قاعازعا تامعان كوز جاسىن وقىپ كورىڭىز. باس پروكۋرورلىق قۇزىرلى مىندەتپەن بىرگە، تازا ازاماتتىق نيەتپەن كوڭىل قوياتىن بولساڭىز، «ەتەگىڭىز جاسقا تولادى»، بۇل كوپە-كورنەۋ قياناتتىڭ جاي-جاپسارىنا كوزىڭىز ابدەن جەتەدى دەپ ويلايمىن.

سوندىقتان مەن جالپى سالماعى 40 كيلوگرامم بولاتىن قۇجاتتا جازىلعان ءمان-جايدى تىزبەكتەپ، دەپۋتاتتىق ساۋالدىڭ ماردىمسىز ۋاقىتىن ءراسۋا ەتپەيىن. پايشىلار ارىزىنان قىسقاشا عانا ءبىر مىسال كەلتىرەيىن ء(امينانىڭ ارىزى).

مەنىڭ ەندىگى ايتپاعىم – وسى قىلمىستى قياناتتىڭ ساياسي استارى. ساياسي دەيتىن سەبەبىم – جازىقسىز ەلدىڭ زاڭدى جەرىن تارتىپ العان وسى وزبىرلاردىڭ كلانى مەن ولاردىڭ جاندايشاپتارى قاراساي اۋدانىندا ءالى دە سايران سالىپ ءجۇر. جەرگىلىكتى پروكۋراتۋرا مەن پوليتسيا زارلاعان حالىقتىڭ ەمەس، تويىمسىز، تاجال كلاننىڭ مۇددەسىن قورعاۋدا.

پايشىلارعا اراشا تۇسكەن ادۆوكات ءلاززات جاپاشەۆانى جانە بۇرىنعى «كامەنكا» اسىل تۇقىمدى مال زاۋىتى قىزمەتشىلەرى كووپەراتيۆىنىڭ ءتورايىمى ءامينا جەڭىسبەكوۆانى «الاياقتىق جاسادى» دەگەن جالعان ايىپپەن ەكى ايعا قاماتىپ تاستادى. پايشىلاردىڭ نارازىلىق شاعىمىن جازىپ، جوعارعى ورگاندارعا ۇجىم اتىنان ارىزدانىپ جۇرگەن ابىلاي قوجا دەگەن جىگىتتى ۇيىنەن ۇستاپ اكەتىپ، اباقتىعا تىققان.

كووپەراتيۆ پايشىلارىنىڭ سوت پەن ادىلەتتىلىك ورناتۋعا قاجەت قۇجاتتارىن قاراساي اۋدانىنىڭ پوليتسايلارى مەن پروكۋراتۋراسى تارتىپ الىپ قويماسىن دەپ، جاسىرىپ جۇرگەن مالىك ۇزاقوۆ دەگەن ازاماتقا ىزدەۋ جاريالانىپ، ول بۇگىندە باسساۋعالاپ، قاراسايلىق پوليتسيادان تىعىلىپ جۇرۋگە ءماجبۇر بولعان.

اي مەن كۇننىڭ امانىندا ۇلەسكە بەرىلگەن جەرىنەن ايىرىلعان پايشىلاردىڭ وكىلدەرى، جيىنى 20 شاقتى ادام، ادىلەت ىزدەپ، اراشاعا ءتۇسۋدى سۇراپ، ەكى اي بۇرىن ماعان استاناعا كەلگەن ەدى. ولار نازارباەۆتار كلانى تالان-تاراجعا سالعان جەردەن «قالعان 274 گەكتاردىڭ جارتىسىن مەملەكەتكە قايتارايىق، بىزگە جارتىسىن زاڭداستىرىپ بەرسە بولعانى» دەپ، جەرگىلىكتى بيلىكپەن كومپروميسكە بارۋعا دايىن ەكەندىكتەرىن مالىمدەدى.

قۇرمەتتى مارات ەلەۋسىزۇلى!

مۇنى مەن سىزگە ارناپ ايتامىن. پايشىلار ءوز ۇلەستەرىنىڭ تەڭ جارتىسىن مەملەكەتكە قايتارۋعا قۇلىقتى. «ءبىز ءوز پايىمىزدىڭ جارتىسىن الماتى وبلىسىنىڭ جەر كوميتەتىنە بەرۋگە دايىنبىز، تەك ءبىزدىڭ زاڭدى ۇلەسىمىز نازارباەۆشىلاردىڭ جەمساۋىندا كەتپەسە بولعانى. ال جەردىڭ ەكىنشى جارتىسىن زاڭدى يەلەرى راسىمدەپ الۋىنا مۇمكىندىك تۋدىرسىن» دەيدى پايشىلار.

مەن زار يلەگەن پايشىلاردىڭ وسى ۇسىنىسىن قر پرەزيدەنت اكىمشىلىگىنىڭ باسشىلىعىنا جەتكىزدىم (قۇدايعا شۇكىر، بيلىكتە ەلدىڭ مۇڭ-زارىن تىڭدايتىن ازاماتتار بار ەكەن، ەرلان قوشانوۆ مىرزانىڭ كومەگىمەن پرەزيدەنت اكىمشىلىگى باسشىلارىنىڭ ءبىرىنىڭ قابىلداۋىنا كىردىم), قالىپتاسقان زاڭسىزدىقتىڭ ءمان-جايىن ايتىپ، ەرتەڭ ەرەۋىلگە شىعايىن دەپ وتىرعان ەكى مىڭنان استام ادامنىڭ تالابىن ناسىرعا شاپتىرماي، قاراساي اۋدانىنان تىس ايماقتىڭ پروكۋراتۋرا قىزمەتكەرلەرىنەن ارنايى كوميسسيا قۇرىپ، ساياسي شەشىم قابىلداپ، پايشىلاردىڭ كومپروميستىك ۇسىنىسىن قاراستىرۋدى سۇرادىم. (ەرەۋىل دەمەكشى، ناقاق جالامەن قاماۋعا الىنعان جەلتوقسانشى ءلاززات جاپاشەۆانى قورعاپ، ەلدەگى جەلتوقسان ۇيىمدارى دا نارازىلىققا شىعۋعا قامدانۋدا).

سودان بەرى ءبىر جارىم اي ءوتتى. پرەزيدەنت اكىمشىلىگى پايشىلاردىڭ ءىسىن سوزبۇيداعا سالعاننان باسقا ەشبىر ءىس بىتىرمەدى. ال مەن بولسام بۇل جەر داۋىن دابىراسىز جانە ەرەۋىلسىز شەشۋگە جاردەم جاسايمىن دەپ، نارازى ۇلەسكەرلەردى سابىرعا شاقىرىپ، توقتاتىپ كەلدىم. بۇدان ارى پايشىلاردى الدارقاتقانداي بولا المايمىن. سوندىقتان قولىمنان كەلەتىن سوڭعى امالىم – دەپۋتاتتىق ساۋال جولداپ، نازارباەۆشىلار ناقاق جاساعان قياناتتى جاريالاۋعا ءماجبۇر بولىپ وتىرمىن.

دەگەنمەن، قۇرمەتتى مىرزالار، ءالى دە كەش ەمەس. پرەزيدەنت توقاەۆتىڭ ادىلەتتى جانە «جاڭا قازاقستان» قۇرۋ ساياساتىنا نۇقسان كەلتىرمەۋدىڭ مۇمكىندىگى تۇگەسىلگەن جوق.

ول ءۇشىن:

اسىلوۆ مىرزا!

ا). ءسىز ءوزىڭىزدىڭ ارنايى وكىلىڭىزدى («سپەتسپروكۋروردى» نەمەسە ارنايى پروكۋرورلىق كوميسسيانى) قاراساي اۋدانىنا جىبەرىپ، قالىپتاسقان جاعدايدىڭ كۇرمەۋىن شەشۋ ءۇشىن تەكسەرۋ جۇرگىزىپ، پايشىلاردىڭ تالابىن تىڭداۋعا;

ءا). قاراساي اۋداندىق پروكۋراتۋراسى مەن پوليتسياسى ۇلەسكەر ازاماتتارعا جاساپ جاتقان قياناتتى قىسىمدى تىيۋعا;

ب). قاماۋعا الىنعان ازاماتتارعا تاڭىلعان ايىپتىڭ اق-قاراسىن انىقتاپ، زاڭسىز ارەكەتتەرگە توسقاۋىل قويۋعا قۇلىقتى بولساڭىز – بولعانى.

مارات ەلەۋسىزۇلى مىرزا!

ءسىز ءوز وڭىرىڭىزدە شىرىلداپ جۇرگەن تۇرعىنداردىڭ وكىلدەرىن قابىلداپ، ولاردىڭ ۇلەس پايىن 50 دە 50-لىك نۇسقامەن تەڭ ءبولۋ جونىندەگى ۇسىنىسىن تىڭداۋعا زاۋىقتى بولساڭىز – بولعانى.

مەن بۇل ماسەلەنىڭ ادىلەتتى تۇردە شەشىلۋى ءۇشىن، بۇل جەر داۋىن اياقسىز قالدىرمايمىن! ەگەر بۇل ماسەلە تاعى دا نازارباەۆشىلاردىڭ مۇددەسىنە شەشىلىپ، جەر يەلەرى زارلاپ قالاتىن بولسا، ەل پرەزيدەنتىنە دەيىن بارامىن!

بۇل – ساياسي شانتاج ەمەس! بۇل – ادىلەت ءۇشىن ايقاس بولادى! توقاەۆ مىرزانىڭ ادىلەتتى قازاقستان قۇرۋ يدەياسىنا جاردەم جاسايمىز دەسەڭىزدەر، وزبىرلىقتى وزدىرماۋعا جاردەم جاساڭىزدار، مىرزالار!

ەرمۇرات باپي،

قر پارلامەنتى ءماجىلىسىنىڭ دەپۋتاتى

Abai.kz