باسى: كەشىگىپ تۋعان كەرەمەت

جالعاسى: ءى چەمپيونات. 1960. كەڭەس فۋتبولىنىڭ التىن ءداۋiرi

جالعاسى: ءىى چەمپيونات. 1964. «قىزىل فۋريانىڭ» تۇڭعىش تابىسى

جالعاسى: ءىىى چەمپيونات. 1968. تەرىس تۇسكەن «تەڭگە»

جالعاسى: IV چەمپيونات. 1972. المانشا ارمان-كوماندا

جالعاسى: V چەمپيونات. 1976. سەگىز ساعاتقا سوزىلعان تۋرنير

جالعاسى: ءVى چەمپيونات. 1980. نەمىستەردىڭ ەكىنشى التىنى

جالعاسى: ءVىى چەمپيونات. 1984. ميشەل پلاتيني فەستيۆالى

جالعاسى: ءVىىى چەمپيونات. 1988. «عاسىر گولى» جانە عالامات فۋتبول

جالعاسى: ءىح چەمپيونات. 1992. «دات ءديناميتىنىڭ» ءدۇمپۋى

جالعاسى: ح چەمپيونات. 1996. فۋتبول ءوز ۇيىنە ورالدى

جالعاسى: ءحى چەمپيونات. 2000. شابۋىلدىڭ سالتاناتى

جالعاسى: ءحىى چەمپيونات. 2004. ەلليندەردىڭ ەرلىگى

فۋتبول تاريحىندا ءبىرىنشى بولىپ قاتارىنان ءۇش ءىرى ءتۋرنيردى ۇتقان «قىزىل فۋريا» سول تابىستى جولىنىڭ العاشقى قادامىن 2008 جىلى باستادى.

قازاقستان العاش قاتىسقان ەۋرو

ءحىىى ەۋروپا دوپ دوداسى باستالماي جاتىپ-اق ءبىر رەكوردتىڭ شەتىن قىلتيتتى. راس، ىرىكتەۋ سىنىنا بۇل جولى دا 50 قۇراما قاتىستى، ولار 6 توپتا – جەتى-جەتىدەن، ال 1 توپتا – سەگىز كوماندا بولىپ ونەر كورسەتتى. ءار ىرىكتەۋ توبىنان قوس جەڭىمپازدان وزىپ شىقتى، سوسىن ولارعا فينالدىق تۋرنير قوجايىندارى – اۆستريا مەن شۆەيتساريا قوسىلعان كەزدە، سودان ءتورت جىل بۇرىنعى رەكورد قۇلادى: 52 (!) كوماندا قاتىسقان قۇرلىق دوداسى بۇعان دەيىن بولماعان ەدى.

قاتىسۋشىلار سانى جونىنەن چەمپيوناتتىڭ وسىنداي ايرىقشا كورسەتكىشكە يە بولۋى... قازاقستان ۇلتتىق قۇراماسىنىڭ ارقاسى-تۇعىن. 2002 جىلدىڭ 25 ساۋىرىندە ۋەفا-نىڭ 52-مۇشەسى بولىپ تىركەلگەن ەلىمىزدىڭ فۋتبول فەدەراتسياسى كلۋبتىق جارىستارعا شاقىرۋ العانىمەن، قۇرامانى ەۋرو-2004-ءتىڭ ىرىكتەۋىنە قوسۋعا ۇلگەرمەدى (ونىڭ جەرەبەسى الدەقاشان تارتىلىپ قويعان بولاتىن). ەسەسىنە، كەلەسى تۋرنيردە قازاق قۇراماسى بىردەن ءيىن تىرەسكەن ىعى-جىعى ورتاعا – سەگىز كوماندادان تۇراتىن 1-توپقا توپ ەتە ءتۇستى. تۇڭعىش ەۋرو-قادام اسا ءساتسىز بولدى دەي المايمىز، ويتكەنى ءبىزدىڭ جىگىتتەر ەشكىمنەن قايمىعىپ، قالتىراپ-دىرىلدەگەن جوق. دەڭگەيىمىز تومەن ەكەنىنە قاراماستان، توپ جەڭىمپازدارى – پولياكتارعا دا (0:1, 1:3), پورتۋگالدىقتارعا دا (0:3, 1:2) شاما-شارقىمىزشا قارسىلىق كورسەتە الدىق. سەربيامەن ءتىپتى ۇپاي الماستىق (الماتىدا 2:1 ەسەبىمەن جەڭدىك، سىرت الاڭدا 0:1 بولىپ ۇتىلدىق), بەلگيامەن ەكى رەت يتجىعىس تۇستىك (0:0 جانە 2:2). وكىنىشتىسى، فينليانديادان ۇپاي الا المادىق (0:2,1:2), ال وزىمىزبەن قارايلاس ارمەنيامەن (1:2 جانە 1:0) جانە ازەربايجانمەن (1:1, 1:1) بۇدان دا ءتاۋىر ناتيجەگە قول جەتكىزۋگە بولار ەدى.

2-توپتا الدىڭعى الەم چەمپيوناتىنىڭ قوس ءفيناليسى – يتاليا مەن فرانتسيا جەڭىمپاز اتاندى. ىرىكتەۋ سىنى بارىسىندا بۇلاردىڭ ءبىرىن شوتلانديا قۇراماسى ىعىستىرارداي كورىنىپ ەدى، بىراق ولار سوڭعى ەكى ويىنىن ءساتسىز وتكىزىپ (گرۋزيندەردەن 0:2, يتاليالىقتاردان 1:2 بوپ ۇتىلدى), جولدامادان سىرت قالدى. 3-توپتان گرەكيا مەن تۇركيا، 4-توپتان چەحيا مەن گەرمانيا، 7-توپتان رۋمىنيا مەن گوللانديا وزىپ شىقتى. 5-توپتاعى سوڭعى تۋر ويىندارى باستى سەنساتسياعا ۇلاستى: لوندوندا حورۆاتيانى قابىلداعان اعىلشىن كومانداسى ءۇشىن تەڭ ناتيجە دە جەتكىلىكتى ەدى، الايدا ءوز جولداماسىن الدەقاشان يەلەنىپ قويعان قوناقتار سوندا دا جەڭىسكە دەگەن ەرەكشە ەرىك-جىگەرمەن قيمىلداپ، 3:2 ەسەبىمەن ۇتىپ كەتتى! ءسويتىپ، كۇتپەگەن جەردەن بۇل توپتا ەكىنشى ورىندى رەسەي الدى. 6-توپتا جارىستى اۋەلدە شۆەتسيادان (0:2) جانە سولتۇستىك يرلانديادان (2:3) ۇتىلىپ باستاعان يسپان قۇراماسى بىرتە-بىرتە باۋىرىن جازىپ، شۆەدتەرمەن بىرگە فينالدىق سىنعا جولداما الدى.

گوللاند داۋىلى مەن يسپان سامالى

اۆستريا جانە شۆەيتساريا جاسىل الاڭدارىندا وتكەن فينالدىق تۋرنير ويىندارى وتە جوعارى دەڭگەيىمەن ەرەكشەلەندى. «ا» توبىندا العاشقى ەكى ويىننىڭ ناتيجەسى ارقىلى-اق جەڭىمپاز اتانعان پورتۋگاليا قۇراماسىنا لايىقتى قارسىلاس تابىلعان جوق. باس باپكەر لۋيز فەليپە سكولاري ءتىپتى تۋرنيرلىك تۇرعىدا ەشتەڭە شەشپەيتىن سوڭعى ماتچقا قوسالقى قۇرامدى شىعارىپ، شۆەيتسارياعا ءۇش ۇپاي «سىيلادى». ەكىنشى ورىندى اقىرعى تۋردا تۇركيا مەن چەحيا ساراپقا سالدى. ءبىر قىزىعى، ەگەر ماتچ تەڭ اياقتالعان جاعدايدا، كوماندالاردىڭ... پەنالتي تەبۋىنە تۋرا كەلەر ەدى، ويتكەنى ۇپايى دا، دوپ ايىرماسى دا بىردەي بولاتىن. الايدا شيرەك فينالعا شىعاتىن كوماندانى ونداي ايرىقشا تاسىلمەن انىقتاۋدىڭ قاجەتى تۋىنداعان جوق. 75-مينۋتقا دەيىن چەحتار 2:0 ەسەبىمەن ۇتىپ تۇردى. اردا تۇران ءبىر دوپ سوعىپ، قارىمتا قايىرعان سوڭ ونسىز دا تارتىستى كەزدەسۋ تىپتەن قىزا ءتۇستى. اقىرى 87 جانە 89-مينۋتتاردا نيحات كاحۆەدجي ەكى گول ەنگىزىپ، تۇرىكتەر كەلەسى كەزەڭگە ءوتتى.

«ۆ» توبىندا حورۆاتيا قۇراماسى قارسىلاسىنىڭ ءبارىن دە بەت قاراتپاي ۇتىپ، ءبىرىنشى ورىندى ەنشىلەدى. ولاردىڭ تەگەۋرىنىنە ءتىپتى گەرمانيانىڭ ءوزى توتەپ بەرە العان جوق (1:2). ءوزارا تەڭ تۇسكەن پولشا جانە اۆستريا فۋتبولشىلارى جارىستى ءارى قاراي جالعاستىرا المادى. ءسويتىپ، شۆەيتساريا مەن اۆستريا – توپتىق كەزەڭنەن اسا الماي، پۇشايمان بولعان قوجايىنداردىڭ لەگىنە قوسىلدى (العاشقىسى بەلگيا-2000 بولاتىن).

«س» توبىن ماماندار دا، جۋرناليستەر دە «ءولىم توبى» دەپ اتادى. راسىندا دا، الدىڭعى دودانىڭ قولا جۇلدەگەرى – گوللانديا سودان ەكى جىل بۇرىنعى الەم چەمپيوناتىنىڭ التىن مەدالىن ساراپقا سالعان قوس سايىپقىرانمەن – يتاليامەن جانە فرانتسيامەن ءبىر توپقا تۇسسە، ولاردىڭ ورتاسىنا ەۋروپاداعى ورتاڭقول ۇجىمداردىڭ ءبىرى – رۋمىنيا كەپ قىستىرىلىسسا، «ءولىم توبى» بولماعاندا قايتەدى؟ ىرىكتەۋ توبىندا دا بىرگە ويناعان يتاليالىقتار مەن فرانتسۋزداردى ءتىپتى «سيام ەگىزدەرى» دەسە دە جاراسار ەدى. بىراق بۇل ەكەۋىن ايگىلى ماركو ۆان باستەن باپتاعان گوللاند قۇراماسى تالقانداپ تاستادى! اۋەلى كورەسىنى يتاليا كوردى (0:3). راس، العاشقى گول ءبىراز داۋ-داماي تۋدىردى، بىراق تەلەقايتالاۋدان ەشقانداي وفسايدتىڭ بولماعانىن بايقاۋ قيىن ەمەس. اۋەلەپ كەلگەن دوپتى دجانلۋيدجي بۋففون جۇدىرىعىمەن قاعىپ جىبەرگەندە، قاقپاشى ابايسىزدا ءوز كوماندالاس سەرىگى كريستيان ءپانۋچچيدى دە وڭباي وماقاستىرعان-دى. قۇلاپ تۇسكەن قورعاۋشى اۋناپ بارىپ الاڭ جيەگىنەن شىعىپ كەتتى. كەرى سەرپىلگەن دوپتى دجوۆانني ۆان برونكحورست قاقپاعا قاراي قايتا تەۋىپ ەدى، ونى جول-جونەكەي رۋد ۆان نيستەلروي ءتۇرتىپ جىبەرىپ، باعىتىن وزگەرتتى دە، ەسەپ اشتى. ويتكەنى الاڭنان ءوز ەركىمەن كەتپەگەن پانۋچچي ءبارىبىر ويىنعا ارالاسۋعا ءازىر فۋتبولشى بولعاندىقتان، وفسايد ەسەپتەلگەن جوق.

كوز قۋانتار كوركەم ويىنىن ۇدەتە تۇسكەن گوللانديا سوسىن فرانتسۋزداردى جاڭعاقشا شاعىپ تاستادى (4:1). ءسويتىپ، يتاليا مەن فرانتسيا، ەكەۋى دە رۋمىندارمەن تەڭ تۇسكەن سوڭ، شيرەك فينالعا شىعار ەكىنشى مىقتىنى ءوزارا ايقاستا انىقتاۋعا ءماجبۇر بولدى. ويىن ناتيجەسىنە 24-مينۋتتاعى جايباسار ەريك ءابيدالدىڭ ايىپ الاڭىنا باسا-كوكتەي ەنگەن يتاليالىق لۋكا ءتونيدى شالىپ قۇلاتۋى تىكەلەي ىقپال ەتتى. تورەشى پەنالتي بەلگىلەپ قانا قويعان جوق، فرانتسۋز قورعاۋشىسىنا قىزىل قاعاز كورسەتتى. اندرەا پيرلو 11 مەترلىك نۇكتەدەن ءمۇلت كەتكەن جوق. ال ەكىنشى تايمدا دانيەلە دە روسسي تاعى ءبىر ستاندارتتى جاعدايدى – ايىپ دوبىن شەبەر ورىنداپ، ماتچ تاعدىرىن شەشتى (2:0).

ال چەمپيون شە؟ وسىدان ءتورت جىل بۇرىن التىننان القا تاققان گرەكتەردىڭ احۋالى نەشىك؟ «D» توبىندا ونەر كورسەتكەن وتتو رەححاگەل شاكىرتتەرىنىڭ العاشقى ويىنى ستاتيستيكاعا قىزىعۋشىلاردىڭ نازارىن ايرىقشا اۋدارعانىمەن (گرەكيا – شۆەتسيا كەزدەسۋى بۇكىل ەۋروپا چەمپيوناتتارى تاريحىنداعى 2000-ماتچ بولاتىن), جالپى العاندا ولاردىڭ جاعدايى بىلايعى جۇرتتى الاڭداتا قويعان جوق. ءتورت جاسقا قارتايعان ليسسابون-2004 جەڭىمپازدارى توپتاعى ءۇش قارسىلاسىنان دا ۇتىلىپ، ەڭ سوڭعى ورىندا قالدى. ەسەسىنە، يسپانيا قۇراماسىنىڭ ويىنى كوز جاۋىن الدى. لۋيس اراگونەستىڭ كومانداسى رەسەيدى دە، شۆەتسيانى دا، گرەكيانى دا (قوسالقى قۇراممەن) ۇتىپ، توپ جەڭىمپازى اتاندى. ورىستارمەن ويىندا شابۋىلشى داۆيد ۆيليا ءۇش گول سوقتى. ىرىكتەۋ كەزەڭىندە الاڭنان قۋىلۋى سەبەپتى الدىڭعى ەكى كەزدەسۋگە قاتىسا الماعان رەسەيلىك شابۋىلشى اندرەي ارشاۆين شۆەدتەرمەن شەشۋشى ماتچتا تاماشا ويىن كورسەتىپ، ءوز كومانداسىن كەلەسى كەزەڭگە الىپ شىقتى.

فەرناندو توررەستىڭ التىن گولى

شيرەك فينال توسىن ناتيجەلەرگە تولى بولدى. توپتىق كەزەڭدە كەرەمەت ويناعان كوماندالاردىڭ دەنى بۇل ساتىدا ءوز قارسىلاستارىنان اسا المادى. الەمنىڭ ۇزدىك فۋتبولشىلارىنىڭ ءبىرى كريشتيانۋ رونالدۋ باستاعان پورتۋگاليا نەمىستەردەن جەڭىلىپ قالدى (2:3). ۇنەمى اقىرعى تىنىسىنا دەيىن الىساتىن تۇرىكتەر تاعى دا ەرلىك كورسەتتى. حورۆات كومانداسىنىڭ تەگەۋرىنىنە 119 مينۋت توتەپ بەرگەن ولار قاقپاشى ءرۇشتۋدىڭ ورەسكەل قاتەلىگىنىڭ سالدارىنان گول جىبەرىپ السا دا، ەڭسە تۇسىرمەدى. ارادا ەكى مينۋت وتەر-وتپەستە-اق سەميح شەنتۇرك تارازى باسىن تەڭەستىرىپ ۇلگەردى! پەنالتي سەرياسىندا ەرىك-جىگەرى مىقتى تۇركيانىڭ مەرەيى ۇستەم بولدى. يسپانيا مەن يتاليا دا 120 مينۋت بويى تىرەسىپ باقتى. يسپاندىقتار ويىن جونىنەن ءسال باسىمدىق تانىتىپ ەدى، فۋتبول «لوتەرەياسىندا» دا جۇيكەلەرىنىڭ بەرىكتىگىن دالەلدەدى. قاقپاشى يكەر كاسيلياس ەكى پەنالتي ۇستاپ، كومانداسىن جارتىلاي فينالعا الىپ شىقتى.

بارىنەن دە رەسەي قۇراماسىنىڭ ويىنى تاڭ قالدىردى. گوللاند مامانى گۋس حيددينك جاتتىقتىرعان ورىستار توپتىق كەزەڭدە تاماشا ويناعان گوللانديا فۋتبولشىلارىنان باسىم ءتۇستى (3:1). قارسىلاسىن قۇيىن-پەرەن شاپشاڭ قيمىلىمەن ساستىرعان رەسەيلىكتەر ءبىرىنشى تايمدا-اق ەسەپ اشتى. ۇزىلىستەن سوڭ ەسىن جيناعان «قىزعالداقتار ەلىنىڭ» ۇلاندارى قانشا شابۋىل جاساسا دا، قاقپاشى يگور اكينفەەۆتى قاپى قالدىرا المادى. تەك 86-مينۋتتا عانا ۆان نيستەلروي ارەڭ جاۋاپ دوپ سوقتى. بىراق قوسىمشا ۋاقىتتا كۇش-قۋات جاعىنان ورىستاردىڭ دايىندىعى مول ەكەنى بايقالدى. سىلەلەپ، سىلەسى قاتقان گوللاند فۋتبولشىلارىن ولار ولاي دا بىلاي الداپ ءوتىپ، تاعى ەكى گول سوقتى.

وسى كەزدە ءتۋرنيردى ۇيىمداستىرۋشىلاردىڭ كورشى ەكى توپتان وزىپ شىققانداردى ءبىر-بىرىمەن قايتا توقايلاستىرىپ، سحەمانى دۇرىس تۇزبەگەنى ايقىندالدى. ءسويتىپ، امال جوق، يسپانيا مەن رەسەي جارتىلاي فينالدا قايتا جۇزدەستى. تاعى دا اراگونەس شاكىرتتەرى ايقىن باسىم ءتۇستى. ولار ءتىپتى 34-مينۋتتا باس مەرگەن ۆيليانىڭ جاراقات الىپ، ساپتان شىعىپ قالعانىن دا ەلەگەن جوق. 50-مينۋتتا اندرەس ينەستا سول قاپتالدان كەرەمەت پاس شىعارىپ، ءحاۆيدىڭ ەسەپ اشۋىنا مۇمكىندىك جاسادى (بۇل ەۋرو فينالدىق تۋرنيرلەرى تاريحىنداعى 500-گول بولاتىن). كوپ ۇزاماي ۆيليانى الماستىرعان سەسك فابرەگاس اياعىنىڭ ۇشىمەن عانا ءىلىپ، ىلۋدە ءبىر كەزدەسەر عاجاپ پاسپەن دوپتى شابۋىلشى دانيەل گۋيسانىڭ الدىنا سالىپ بەردى. ال ويىن سوڭىندا سول قاناتتان قۇيىنداي شاۋىپ وتكەن فابرەگاستىڭ سەرىكتەسى داۆيد سيلۆاعا دوپتى وتە ىڭعايلى تاستاعانى سونداي، گول بولماۋى مۇمكىن ەمەس ەدى – 3:0.

ءتورت فۋتبولشىسى جاراقاتتانعان، ۇشەۋى سارى قاعاز الۋىنا بايلانىستى الاڭعا شىعا الماعان تۇركيا قۇراماسى سوندا دا گەرمانيانىڭ ەكى اياعىن ءبىر ەتىككە تىقتى. ويىن جونىنەن دە، قاقپاعا باعىتتالعان سوققى تۇرعىسىنان دا «يمپەراتور» فاتيح تەريمنىڭ جىگىتتەرى باسىمدىق بايقاتتى. 22-مينۋتتا ۋگۋر بورالدىڭ ەسەپ اشۋى زاڭدى ەدى. بىراق كوپ ۇزاماي باستيان شۆاينشتايگەر تارازى باسىن تەڭەستىردى. ەكىنشى تايمدا اۋەلەپ كەلگەن دوپقا ەبەدەيسىز ۇمتىلعان قاقپاشى ءرۇشتۋدىڭ كەزەكتى قاتەلىگىنەن سوڭ ميروسلاۆ كلوزە نەمىستەردى العا شىعاردى. سوڭعى ساتكە دەيىن كۇدەر ۇزبەيتىن تۇرىكتەر تاعى دا تاڭ قالارلىق ەرىك-جىگەر تانىتتى: 86-مينۋتتا وڭ قاناتتان سابري سارىوعلى بەرگەن دوپتى سەميح شەنتۇرك توقتاتپاي تەپتى – 2:2! الايدا ساعى سىنبايتىن مىقتىنىڭ مىقتىسى – گەرمانيا عوي، جۇرت «ويىن وۆەرتايمعا ۇلاسادى-اۋ» دەپ ويلاي بەرگەندە، فيليپپ لام جەڭىس دوبىن سوقتى.

فينال يسپانيانىڭ بەنەفيسىنە اينالدى. 1:0 دەگەن ەسەپ بۇل ويىنعا ءتىپتى دە لايىقسىز ەدى. ناتيجە كەم دەگەندە 3:0 بولۋعا ءتيىس-ءتى! بىراق سيلۆا، حاۆي، حابي الونسو، ءتىپتى سەرحيو راموس پەن ماركوس سەننا دا تالاي گول سوعاتىن ۇرىمتال ءساتتى ۋىستان شىعارىپ الدى. نەمىستەردە تەك ءبىر-اق مۇمكىندىك بولدى، بىراق ميحاەل باللاكتىڭ سوققىسىن كاسيلياس قايتاردى. ال التىن گولدى فەرناندو توررەس سوقتى. ونىڭ العا تاستالعان دوپقا لامنان وراي وزا ۇمتىلىپ جەتۋى، اياعىنىڭ ءبىر عانا قيمىلىمەن قاقپاشىنى قاپى قالدىرۋى – ناعىز سۋپەرشابۋىلشىعا ءتان قاسيەت ەدى.

سوناۋ 1964 جىلى قۇرلىق دوداسىندا توپ جارعان «قىزىل فۋريا» اراعا 44 جىل سالىپ، ەكىنشى رەت ەۋروپا چەمپيونى اتاندى.

ءحىىى ەۋروپا چەمپيوناتى

(2008 جىل، اۆستريا/شۆەيتساريا)

فينالدىق تۋرنيردە 31 ماتچ وتكىزىلىپ، 77 گول سوعىلدى (ورتا ەسەپەن ءار ويىندا – 2,48). مەرگەن فۋتبولشى: داۆيد ۆيليا (يسپانيا) – 4 دوپ.

«ا» توبى

شۆەيتساريا – چەحيا – 0:1, پورتۋگاليا – تۇركيا – 2:0, چەحيا – پورتۋگاليا – 1:3, شۆەيتساريا – تۇركيا – 1:2, تۇركيا – چەحيا – 3:2, شۆەيتساريا – پورتۋگاليا – 2:0.

1. پورتۋگاليا 3 5:3    6
2. تۇركيا 3 5:5    6
3. چەحيا 3 4:6    3
4. شۆەيتساريا 3 3:3    3

«ۆ» توبى

اۆستريا – حورۆاتيا – 0:1, گەرمانيا – پولشا – 2:0, حورۆاتيا – گەرمانيا – 2:1, اۆستريا – پولشا – 1:1, پولشا – حورۆاتيا – 0:1, اۆستريا – گەرمانيا – 0:1.

1. حورۆاتيا 3 4:1    9
2. گەرمانيا 3 4:2    6
3. اۆستريا  3       1:3   
4. پولشا 3 1:4    1

«س» توبى

رۋمىنيا – فرانتسيا – 0:0, گوللانديا – يتاليا – 3:0, يتاليا – رۋمىنيا – 1:1, گوللانديا – فرانتسيا – 4:1, فرانتسيا – يتاليا – 0:2, گوللانديا – رۋمىنيا – 2:0.

1. گوللانديا 3 9:1    9
2. يتاليا 3 3:4    4
3. رۋمىنيا 3 1:3    2
4. فرانتسيا 3 1:6    1

«D» توبى

يسپانيا – رەسەي – 4:1, گرەكيا – شۆەتسيا – 0:2, شۆەتسيا – يسپانيا – 1:2, گرەكيا – رەسەي – 0:1, رەسەي – شۆەتسيا – 2:0, گرەكيا – يسپانيا – 1:2.

1. يسپانيا 3 8:3    9
2. رەسەي 3 4:4    6
3. شۆەتسيا 3 3:4    3
4. گرەكيا 3 1:5    0

شيرەك فينال

پورتۋگاليا – گەرمانيا – 2:3, حورۆاتيا – تۇركيا – 1:1 (پەنالتيدەن 1:3), گوللانديا – رەسەي – 1:3, يسپانيا – يتاليا – 0:0 (پەنالتيدەن 4:2).

جارتىلاي فينال

گەرمانيا – تۇركيا – 3:2, رەسەي – يسپانيا – 0:3.

فينال

يسپانيا – گەرمانيا – 1:0

29 ماۋسىم. ۆەنا. «ەرنست حاپپەل» ستاديونى. 51 428 كورەرمەن. تورەشى روزەتتي (يتاليا).

يسپانيا: كاسيلياس، سەرحيو راموس، پۋيول، مارچەنا، كاپدەۆيلا، سەننا، حاۆي، ينەستا، سيلۆا (كاسورلا، 66), فابرەگاس (حابي الونسو، 63), توررەس (گۋيسا، 78).

گەرمانيا: لەمانن، فريدريح، مەرتەزاكەر، مەتتسەلدەر، لام (يانسەن، 46), فرينگس، حيتتسلشپەرگەر (كۋراني، 58), شۆاينشتايگەر، باللاك، پودولسكي (گومەس، 79), كلوزە.

گول: توررەس، 33.

ەسكەرتۋ العاندار: كاسيلياس، باللاك، توررەس، كۋراني.

ساكەن سىبانباي

Abai.kz