و، قۇداي، مەنىڭ مۇحتار اتامىزدىڭ ولىمىنە قايعىرا الماعانىم قالاي؟ الەۋمەتتىك جەلى مەن اقپاراتتىق تەكشەلەردى شۋلاتىپ جاتقان اتامىزدىڭ قايعىلى حابارىمەن، جاقسى-جامان وتكەن ءومىرىن جارىسا جازعان جازبالار تەك مەنىڭ عانا ەمەس، قولفوندى قولىندا ۇستاعان پەندەنىڭ كوزىنە كورىنبەي قالماق ەمەس.

توراپ بەتىن تورلاپ قاپتاعان قالىڭ جازبانىڭ اراسىنان Abai.kz تەكشەسىنە جاريالانعان مىنا ءبىر ماقالا - «مۇحتار ماعاۋين كىمگە تالاق ايتىپ كەتتى؟» - مەنىڭ نازارىمدى وزىنە ەرىكسىز بۇرىپ، قالام تەربەۋىمە سەبەپشى بولدى.

سۋرەت: Abai.kz سكرينى.

ۇلتتىڭ كوشىن باستاپ، ەل الدىندا جۇرگەن اعالارىمىزدىڭ كوبى قازاق ءۇشىن قالام تەربەگەن قازىنالى قارتىمىزدىڭ قارالى حابارىن جازا كەلە، ول كىسىنىڭ جازعانىمەن جاڭىلعانىن بىردە جىلاپ، بىردە سىناپ جازىپتى. مەنىڭ بىلۋىمشە، قاسيەتى قاشپاعان قازاق حالقى ارعى دۇنيەگە اياق باسىپ، قارا جەرگە قايتقان ادامنىڭ ارتىنان جاماندىعىن جاعىنا المايتىن ەدى. قارالى حاباردان كەيىنگى قوعام پىكىرىنىڭ ەكى بەتتە بولۋىنا ءمۇيىزى قاراعايداي جازۋشى مۇحتار اتامىزدىڭ «ۇرگەن قارىن» شىعارماسى سەبەپ بولسا كەرەك. بىراق بۇل شىعارما جايىندا ەشكىم ءتىس جارىپ، ەشتەڭە ايتىپ جاتقان جوق. «ۇرگەن قارىننىڭ» ىشىندە ارى كەتىپ، مارقۇم جازۋشىنىڭ تىرىسىندە ءتىلى باتپاي، ولگەن سوڭ كولەڭكەسىن ماقتاپ، «ۇرگەن قارىندى» جارعىسى كەلەتىن ارسىزداردىڭ از ەمەس ەكەنىن بايقادىم.

مۇحتار اتامىز ارعى دۇنيەگە جالعىز كەتكەن جوق…

بۇل ماقالانىڭ سوڭىندا مەن مىنانى استىن سىزىپ ايتقىم كەلەدى: «مۇحتار ماعاۋين ولگەن جوق، قاسيەتى قاشپاعان، ارى تازا ءار قازاقتىڭ جۇرەگىندە ول ءالى ءتىرى. ونىڭ ەسىمى الدەقاشان بولاشاق تاريحقا تاسپەن قاشالىپ، ماڭگىلىك ولمەس ءمورى باسىلعان».

(مىنە، بۇل — مەنىڭ مۇحتار ماعاۋين اتامىزدىڭ دۇنيەدەن وتكەنىنە قايعىرا الماۋىمنىڭ سەبەبى).

ايدىن اكبارحانۇلى

Abai.kz