مەملەكەت باسشىسى قاسىم-جومارت توقاەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى حالىققا  جولداۋىندا ستراتەگيالىق مىندەت قويدى – ادامي كاپيتالعا جۇيەلى ينۆەستيتسيالار ارقىلى ادىلەتتى قازاقستان قۇرۋ. بۇل تاپسىرما ۇكىمەت اتقارىپ جاتقان كەشەندى جۇمىستىڭ نەگىزىنە اينالدى. ول بارشاعا قولجەتىمدى ءارى زاماناۋي ءبىلىم بەرۋگە جانە عىلىمي ورتا قالىپتاستىرۋعا باعىتتالعان. جۇيە مەكتەپكە دەيىنگى تاربيەدەن باستاپ الدىڭعى قاتارلى زەرتتەۋلەردى قولداۋعا دەيىنگى بارلىق ساتىنى قامتيدى. وسى ارقىلى ەلدىڭ بولاشاعىن ايقىندايتىن بەرىك نەگىز قالانىپ، قازاقستاننىڭ الەمدىك دەڭگەيدەگى ۇزاق مەرزىمدى باسەكەگە قابىلەتتىلىگى نىعايادى جانە ءاربىر ازاماتتىڭ ءومىر بويى دامۋىنا جاعداي جاسالادى.

سۋرەت: primeminister.kz سايتىنان الىندى.

قولجەتىمدى جانە ساپالى ءبىلىم بەرۋ: بالاباقشادان باستاپ حالىقارالىق وليمپيادالارعا دەيىن

ادام كاپيتالىن دامىتۋعا نەگىز ەرتە جاستان قالانادى. سول سەبەپتى ۇكىمەت مەكتەپكە دەيىنگى ءبىلىم بەرۋ جۇيەسىنە ايرىقشا كوڭىل ءبولىپ، ءار بالاعا بولاشاقتا تابىستى بولۋعا تەڭ مۇمكىندىك جاساۋدى كوزدەپ وتىر. بۇگىندە قازاقستاندا 11,8 مىڭ مەكتەپكە دەيىنگى ۇيىم جۇمىس ىستەيدى. ولاردا 1 ملن-نان استام بالا تاربيەلەنىپ جاتىر: 470 مىڭ بالا – مەملەكەتتىك، ال 540 مىڭنان استامى – جەكەمەنشىك بالاباقشالاردا. جاڭا بالاباقشالار اشۋ جانە زاماناۋي قارجىلاندىرۋ تەتىكتەرىن ەنگىزۋدى قامتيتىن جۇيەلى جۇمىستىڭ ارقاسىندا 2–6 جاس ارالىعىنداعى بالالاردى قامتۋ دەڭگەيى 93,1%-عا جەتىپ، جىل سوڭىنا دەيىن 95%-عا دەيىن وسەدى دەپ جوسپارلانۋدا.

قولجەتىمدىلىكتى ارتتىرۋ ءۇشىن 2023–2027 جىلدارعا ارنالعان كەزەڭدىك جول كارتاسى بەكىتىلگەن. 2025 جىلدىڭ باسىنان بەرى 14,8 مىڭ ورىندىق 195 بالاباقشا اشىلدى. جىل سوڭىنا دەيىن قولدانىستاعى ۇيىمداردى كەڭەيتۋ ارقىلى تاعى 49 مىڭنان استام ورىن قۇرىلادى. سونىمەن قاتار جاڭا تاربيەلىك تاجىريبەلەر دە جولعا قويىلۋدا. قىركۇيەكتەن باستاپ 100 بالاباقشادا 12 مىڭ بالانى قامتيتىن ادال ەڭبەككە باۋلۋ بويىنشا پيلوتتىق جوبا جۇزەگە اسادى. سونداي-اق «بەستەن بۇرىن ۇلگەر» باعدارلاماسى اتا-انالاردى قولداۋعا جانە بالانىڭ وتباسىندا دامۋىن قامتاماسىز ەتۋگە باعىتتالعان.

قازاقستانداعى ورتا ءبىلىم بەرۋ فۋنكتسيونالدىق ساۋاتتىلىق پەن ءححى عاسىر داعدىلارىن دامىتۋعا باعىتتالعان، بۇل ەلدىڭ PISA حالىقارالىق زەرتتەۋىنىڭ ۇزدىك 50 ەلى قاتارىنا ەنۋىنە ىقپال ەتتى.

قازاقستاندىق وقۋشىلاردىڭ جەتىستىكتەرى تاڭدالعان باعىتتىڭ دۇرىستىعىن دالەلدەيدى. 2024–2025 وقۋ جىلىندا حالىقارالىق وليمپيادالارعا قاتىسقان ءاربىر ەكىنشى وقۋشى جۇلدەگەر اتاندى. قازاقستاندىق وقۋشىلار بارلىعى 34 حالىقارالىق وليمپيادا مەن بايقاۋدا 1000-نان استام مەدال، ونىڭ 193-ءى التىن يەلەندى. 2025 جىلى حالىقارالىق جارىستارعا قاتىسقان 31 وقۋشىنىڭ 27-ءسى جۇلدەگەر اتاندى. اۋىل وقۋشىلارىنىڭ تالانتىن دامىتۋعا ەرەكشە نازار اۋدارىلۋدا. اۋىلدىق مەكتەپتەر اراسىنداعى ءىى رەسپۋبليكالىق وليمپيادا جەڭىمپازدارىنىڭ سانى ون ەسەگە ارتتى.

زاماناۋي ينفراقۇرىلىم جانە بارشاعا تەڭ مۇمكىندىكتەر

ەلىمىزدىڭ بارلىق وڭىرىندە ءبىلىم ساپاسىنىڭ بىرىڭعاي ستاندارتتارىن قامتاماسىز ەتۋ ءۇشىن ينفراقۇرىلىمدى جاڭعىرتۋ بويىنشا اۋقىمدى جۇمىستار جۇرگىزىلىپ جاتىر. 2025 جىلى قۇرىلىسى ءجۇرىپ جاتقان 232 جاڭا مەكتەپتى پايدالانۋعا بەرۋ جوسپارلانۋدا، ولاردىڭ جالپى سىيىمدىلىعى – 267 مىڭ ورىن. بۇل ءۇش اۋىسىمدى وقىتۋ ماسەلەسىن شەشۋگە تىكەلەي قادام بولىپ وتىر. سونىمەن قاتار قولدانىستاعى عيماراتتاردى جاڭعىرتۋ باعدارلاماسى ىسكە اسىرىلۋدا: 2025 جىلى 245 مەكتەپتە كۇردەلى جوندەۋ جۇرگىزىلەدى. قوسىمشا 1 مىڭنان استام اۋىل مەكتەبى جاڭعىرتىلادى. 680 ۇيىم ءۇشىن 1,1 مىڭنان استام زاماناۋي پاندىك كابينەت ساتىپ الىنۋدا.

تسيفرلاندىرۋداعى ماڭىزدى قادام – مەكتەپ وقۋلىقتارىنىڭ 100%-ىن ينتەراكتيۆتى مازمۇندى ەلەكتروندىق فورماتقا تولىق كوشىرۋ. بۇل وقۋ ۇدەرىسىن اناعۇرلىم يكەمدى ءارى قولجەتىمدى ەتتى.

جۇمىستىڭ باستى باعىتتارىنىڭ ءبىرى – ءاربىر بالا ءوزىن قوعامنىڭ تولىققاندى مۇشەسى رەتىندە سەزىنەتىن ينكليۋزيۆتى ورتا قالىپتاستىرۋ. بۇگىندە مەكتەپتەردىڭ 90%-دا ينكليۋزيۆتى ءبىلىم بەرۋگە جاعداي جاسالعان، 85% بالا قاجەتتى قولداۋ الۋدا.

ارنايى ۇيىمداردىڭ جەلىسى كەڭەيتىلۋدە: 508 مەكەمە جۇمىس ىستەيدى، 121 قولداۋ كابينەتى اشىلدى. ەرەكشە قاجەتتىلىكتەرى بار بالالارعا پەداگوگ-اسسيستەنت، ارنايى پەداگوگ جانە جەكە كومەكشى شتاتتارى ەنگىزىلدى. الداعى ۋاقىتتا ۇزدىكسىز ينكليۋزيۆتى ءبىلىم بەرۋدىڭ ۇلتتىق ورتالىعىن قۇرىپ، سونداي-اق «ەرەكشە ءبىلىم بەرۋدى قاجەت ەتەتىن بالالاردى كەشەندى قولداۋ تۋرالى» زاڭ ازىرلەۋ جوسپارلانعان.

سۋرەت: primeminister.kz سايتىنان الىندى.

تاربيە بەرۋ، قورعاۋ جانە بوس ۋاقىت: بالا باستى نازاردا

پرەزيدەنت تاپسىرمالارىن ورىنداۋ شەڭبەرىندە «قازاقستان بالالارى» مەملەكەتتىك باعدارلاماسى شەڭبەرىندە «ادال ازامات» بىرىڭعاي باعدارلاماسى جاڭارتىلدى، ول ءۇشىن بىرىڭعاي قۇندىلىق كەڭىستىگىن قالىپتاستىراتىن ارنايى برەندبۋك ازىرلەندى. سونىمەن بىرگە بالالار قۇقىقتارىن قورعاۋ شارالارى كۇشەيتىلۋدە: قامقورشىلىق ورگاندارى ماماندارىنىڭ سانى ءۇش ەسەگە جۋىق، 303-تەن 896 ادامعا دەيىن ۇلعايدى، بۇل وتباسىلارعا ۋاقتىلى ءارى بىلىكتى كومەك كورسەتۋگە مۇمكىندىك بەرەدى. مەكتەپتەردە بۋللينگتىڭ الدىن الۋ ءۇشىن Kiva جانە «دوسبولLIKE» حالىقارالىق باعدارلامالارى ەنگىزىلۋدە. فيزيكالىق قاۋىپسىز ورتا قۇرىلۋدا: ۇيىمداردىڭ 98%-ى تۋرنيكەتتەرمەن، 97%-ى ليتسەنزيالانعان كۇزەتپەن، 96%-ى دابىل تۇيمەلەرىمەن قامتىلعان، ال 81%-ى پوليتسيانىڭ جەدەل ورتالىقتارىنا قوسىلعان.

دەمالىس – ۇيلەسىمدى دامۋدىڭ ماڭىزدى بولىگى. ەلىمىزدە قوسىمشا ءبىلىم بەرۋ سالاسى بەلسەندى دامىپ كەلەدى، وندا 3,3 ملن بالانى نەمەسە ولاردىڭ جالپى سانىنىڭ 87,2%-ىن قامتيتىن 2 142 ۇيىم جۇمىس ىستەيدى، بۇل كورسەتكىشتى 2025 جىلدىڭ سوڭىنا دەيىن 90%-عا دەيىن جەتكىزۋ جوسپارى بار. 2024 جىلدىڭ جازىندا ۇيىمداستىرىلعان دەمالىسپەن 3,2 ملن بالا قامتىلدى، ونىڭ ىشىندە الەۋمەتتىك وسال ساناتتاردان 500 مىڭ بالا.

سۋرەت: primeminister.kz سايتىنان الىندى.

مەكتەپتەن ماماندىققا: سۇرانىسقا يە كادرلار جانە قول جەتىمدى جوعارى ءبىلىم

پرەزيدەنت جولداۋىندا كورسەتىلگەن ادامي كاپيتالدى دامىتۋ باعىتىنا سۇيەنە وتىرىپ، ۇكىمەت كاسىپتىك جانە جوعارى ءبىلىمنىڭ قولجەتىمدىلىگىن ارتتىرۋ بويىنشا كەشەندى ساياساتتى جۇزەگە اسىرۋدا. جۇمىس ءاربىر جاس قازاقستاندىقتىڭ ساپالى ماماندىق الۋعا ءارى ءوز الەۋەتىن اسىرۋعا مۇمكىندىك الۋىنا باعىتتالعان. جۇمىسشى ماماندىقتارى جىلى اياسىندا تەحنيكالىق جانە كاسىپتىك ءبىلىم بەرۋ جۇيەسى (تجكب) نارىق تالاپتارىنا بارىنشا سايكەستىگى ءۇشىن قايتا فورماتتاۋ جۇرگىزىلۋدە.

جاڭا كاسىپتەر اتلاسى ازىرلەندى، وندا 900-دەن استام جاڭا ءبىلىم باعدارلاماسى وزەكتەندىرىلىپ، 510-نان استام جاڭا باعدارلاما ازىرلەنگەن. اتلاس نەگىزىندە 9 وڭىردە كادرلارعا قاجەتتىلىك كارتالارى جاسالدى. جۇمىسشى ماماندىقتارىنىڭ بەدەلىن ارتتىرۋ ماقساتىندا Jas Skills جانە Junior Skills كونكۋرستارى وتكىزىلەدى، ال 107 مىڭنان استام وقۋشى «مانساپ كومپاسى» پلاتفورماسىندا كاسىبي دياگنوستيكادان ءوتتى. وتاندىق بەس كوللەدجدى حالىقارالىق دەڭگەيگە كوتەرۋ بويىنشا جۇمىس باستالدى.

اتالعان جۇمىستاعى نەگىزگى قۇرالداردىڭ ءبىرى – وقىتۋدى تىكەلەي قارجىلاندىرۋ. پرەزيدەنت تاپسىرمالارىن جانە سايلاۋالدى باعدارلاماسىن جۇزەگە اسىرۋ اياسىندا ءبىلىم بەرۋ گرانتتارىنىڭ سانى 50%-عا ۇلعايتىلدى، ال بيىلعى وقۋ جىلىندا ولاردىڭ سانى 93 مىڭنان استى، جەرگىلىكتى اتقارۋشى ورگانداردان (1,5 مىڭنان استام), KAZENERGY قاۋىمداستىعىنان (400), جوو رەكتورلارىنان (2,2 مىڭ) جانە «قازاقستان» قورىنان (500) قوسىمشا گرانتتار ءبولىندى.

بۇل شارالارعا قوسىمشا شاكىرتاقى كولەمى جۇيەلى تۇردە ارتىپ كەلەدى: 2024 جىلدىڭ قىركۇيەگىنەن بەرى باكالاۆرلار ءۇشىن تولەمدەر 20%-عا، ماگيسترانتتار مەن دوكتورانتتار ءۇشىن 15%-عا ءوستى، ال ستۋدەنت-پەداگوگتەر ءۇشىن 75 مىڭ تەڭگەدەن اسىپ وتىر. جالپى، سوڭعى بەس جىلدا شاكىرتاقى كولەمى ەكى ەسە ءوستى جانە 2029 جىلعا قاراي ونىڭ كولەمىن 200%-عا دەيىن كوتەرۋ جوسپارلانۋدا. ستۋدەنتتەردى تىكەلەي قولداۋمەن قاتار، وتباسىلارعا ارنالعان قارجىلىق جوسپارلاۋدىڭ ۇزاقمەرزىمدى تەتىكتەرى دە ەنگىزىلۋدە.

«ۇلتتىق قور – بالالارعا» باعدارلاماسى باستاپقى كاپيتالدى قالىپتاستىرۋعا كومەكتەسەدى، 2024 جىلدىڭ قورىتىندىسى بويىنشا بالالاردىڭ شوتتارىنا $8 880 ملن ءتۇستى. مەملەكەتتىڭ قاتىسۋىمەن جۇزەگە اساتىن جاڭا "كەلەشەك" جيناقتاۋشى جۇيەسى (60 اەك باستاپقى كاپيتال جانە 7% دەيىنگى سىيلىقاقى) اتا-انالارعا ءبىلىم بەرۋگە جوسپارلى تۇردە 5 ملن تەڭگەدەن استام قاراجات جيناۋعا مۇمكىندىك بەرەدى. ستۋدەنت مەملەكەتتىك گرانت العان جاعدايدا، "كەلەشەك" باعدارلاماسى بويىنشا جيناقتالعان قاراجات تۇرعىن ءۇي ساتىپ الۋعا باعىتتالۋى مۇمكىن»، — دەپ اتاپ ءوتتى عىلىم جانە جوعارى ءبىلىم ءمينيسترى ساياسات نۇربەك.

سونداي-اق جەڭىلدىكپەن ءبىلىم بەرۋ نەسيەلەرى مەن 300 سارالانعان گرانت بار، ولاردىڭ شەڭبەرىندە مەملەكەت وقۋ قۇنىنىڭ 50%-ىن نەمەسە 75%-ىن جابادى، ال ستۋدەنت تولىق كولەمدە ستيپەنديا الادى. ءبىلىم الۋ ءۇشىن قولايلى جاعداي جاساۋدىڭ تاعى ءبىر ماڭىزدى اسپەكتىسى – باسپانا ماسەلەسىن شەشۋ. مەملەكەت باسشىسىنىڭ تاپسىرماسىنا سايكەس ستۋدەنتتىك جاتاقحانالاردا جىل سايىن كەمىندە 10 مىڭ ورىن ۇيىمداستىرۋ مىندەتى قويىلدى. بۇل باعىتتاعى جۇيەلى جۇمىستار بويىنشا قازىردىڭ وزىندە ەلەۋلى ناتيجەلەرگە قول جەتكىزىلۋدە: 2018 جىلدان باستاپ 62 مىڭ ورىندىق 251 جاڭا جاتاقحانا پايدالانۋعا بەرىلدى. اعىمداعى جىلى 10 مىڭنان استام ورىندىق 29 جاتاقحانا ىسكە قوسىلادى، ولاردىڭ ىشىندە ەل تاريحىنداعى ەڭ ءىرى جاتاقحانا – ەلوردادا ەۋرازيا ۇلتتىق ۋنيۆەرسيتەتى ءۇشىن سالىنعان 2 656 ورىندىق جاتاقحانا بار. وسىلايشا تاپشىلىق ماسەلەسى ەلىمىزدىڭ بارلىق وڭىرلەرىندە شەشىمىن تاپتى. «Student-residence» زاماناۋي مودەلى ەنگىزىلۋدە، ال الەۋمەتتىك وسال توپتاردان شىققان ستۋدەنتتەر ءۇشىن مەملەكەت 2023 جىلدان بەرى تۇرۋ شىعىندارىن وتەپ كەلەدى.

يننوۆاتسيالار جانە حالىقارالىق ارىپتەستىك: ءبىلىم بەرۋ حابىن قۇرۋ

پرەزيدەنت قاسىم-جومارت توقاەۆتىڭ تاپسىرمالارىن ورىنداۋ اياسىندا قازاقستان الەمدىك ءبىلىم كەڭىستىگىنە كىرىگە وتىرىپ، وڭىرلىك ءبىلىم بەرۋ حابىنا اينالۋعا ۇمتىلۋدا. بۇگىنگى تاڭدا ەلىمىزدە بريتاندىق Cardiff جانە Coventry University, نەمىستىڭ Anhalt, يتالياندىق Politecnico della Marche, كورەيلىك Woosong University جانە مگيمو سياقتى جەتەكشى شەتەلدىك ۋنيۆەرسيتەتتەردىڭ 24 فيليالى اشىلدى.

«سەرىكتەس-ەلدەر گەوگرافياسى، سونداي-اق اقش، قىتاي جانە فرانتسيانى دا قامتيدى، ال 2025 جىلى ينجەنەرلىك-تەحنيكالىق ماماندىقتارعا باسىمدىق بەرەتىن تاعى 10 جاڭا فيليال اشۋ جوسپارلانۋدا. ولاردىڭ كەيبىرەۋلەرى، مىسالى، De Montfort, Coventry, Cardiff جانە Woosong سياقتى، تولىققاندى جەكە كامپۋس فورماتىندا جۇمىس ىستەيتىن بولادى. وسىمەن ءبىر مەزگىلدە قازاقستاندىق ءبىلىم جۇيەسى شەتەلدە دە قانات جايۋدا: قازۇۋ-دىڭ رەسەي مەن قىرعىزستاندا فيليالدارى (بىشكەكتە 2022 جىلدان بەرى 1300-دەن استام ستۋدەنت وقيدى), سونداي-اق وزبەكستاندا اۋەزوۆ ۋنيۆەرسيتەتى جۇمىس ىستەپ تۇر»، — دەدى مينيستر.

سونىمەن قاتار عىلىمي كاسىپكەرلەردىڭ جاڭا بۋىنىن جانە تسيفرلىق ەكونوميكانىڭ بولاشاق كوشباسشىلارىن قالىپتاستىرۋعا باعىتتالعان AI-Sana سەرپىندى باعدارلاماسى جۇزەگە اسىرىلۋدا. ونىڭ ماقساتى — ستۋدەنتتەرگە جاساندى ينتەللەكت (جي) تەحنولوگيالارىن جاپپاي وقىتۋدى قامتاماسىز ەتۋ.

باعدارلاما Coursera, Huawei جانە Google پلاتفورمالارىندا نەگىزگى وقىتۋدان باستاپ ستۋدەنتتىك ستارتاپتاردى جەدەلدەتۋگە دەيىنگى ءتورت كەزەڭدى قامتيدى. جي نەگىزدەرى بويىنشا 390 مىڭنان استام ستۋدەنت پەن 3 مىڭ وقىتۋشى كۋرستان ءوتتى.

«95 جوو Coursera پلاتفورماسىنا تەگىن قول جەتكىزگەن جۇيەلى جۇمىستىڭ ناتيجەسىندە قازاقستان ونىڭ بەدەلدى حالىقارالىق سىيلىعىنىڭ لاۋرەاتى اتاندى. پراكتيكالىق ناتيجە ستۋدەنتتەردىڭ تەستىلەۋ ساتىسىندا تۇرعان 119 جي اگەنتتەرىن قۇرۋى بولدى، تاعى 395-ءى ازىرلەنۋدە. وسى ءورشىل مىندەتتى قولداۋ ءۇشىن نازارباەۆ ۋنيۆەرسيتەتى، ەۇۋ، Satbayev University جانە قازۇۋ بازاسىندا قۋاتى 42 PFlops سۋپەركومپيۋتەرلىك كلاستەر قۇرىلۋدا. ال جي كۋرستارى بارلىق ۋنيۆەرسيتەتتەردە مىندەتتى بولدى. 20 جوو-دا جي، ماشينالىق وقىتۋ جانە كيبەرقاۋىپسىزدىك سالاسىندا 25 جاڭا ءبىلىم بەرۋ باعدارلاماسى اشىلدى»، — دەپ اتاپ ءوتتى ساياسات نۇربەك.

سۋرەت: primeminister.kz سايتىنان الىندى.

عىلىم جانە تەحنولوگيا: يننوۆاتسيالىق بولاشاقتى قالىپتاستىرۋ

ءبىلىم بەرۋگە ينۆەستيتسيالاردىڭ قيسىندى جالعاسى ەلدىڭ عىلىمي الەۋەتىن نىعايتۋ بولىپ سانالادى.

ۇكىمەت تولىققاندى يننوۆاتسيالىق ەكوجۇيەنى قۇرۋ بويىنشا كەشەندى جۇمىس جۇرگىزۋدە:زەرتتەۋ ۋنيۆەرسيتەتتەرىنىڭ سانى وسۋدە (ساتباەۆ اتىنداعى قازۇتزۋ، ل.گۋميلەۆ اتىنداعى ەۇۋ، ءال-فارابي اتىنداعى قازۇۋ ۋنيۆەرسيتەتى، اۋەزوۆ اتىنداعى جانە بۋكەتوۆ اتىنداعى قاراعاندى ۋنيۆەرسيتەتى) جانە مەملەكەت باسشىسىنىڭ جانىنان ۇلتتىق عىلىم اكادەمياسى مەن عىلىم جانە تەحنولوگيالار جونىندەگى ۇلتتىق كەڭەس قۇرىلدى.

عالىمداردى قولداۋ ءۇشىن ناقتى شارالار جۇزەگە اسىرىلۋدا: 2024 جىلدىڭ باسىنان بەرى ولاردىڭ جالاقىسى 18%-عا ءوستى، ال عىلىمي اتاقتار ءۇشىن بەرىلەتىن ۇستەمەاقىلار 20 اەك-كە (قاۋىمداستىرىلعان پروفەسسور، PhD ءۇشىن) جانە 50 اەك-كە (پروفەسسور ءۇشىن) جەتتى. جوبالاردى باعالاۋ ءۇشىن TRL حالىقارالىق ستاندارتىن ەنگىزەتىن «عىلىم جانە تەحنولوگيالىق ساياسات تۋرالى» جاڭا زاڭ قابىلداندى. عىلىمدى قارجىلاندىرۋ 3,3 ەسە ءوستى، بۇل 800-دەن استام عالىمدى الەمنىڭ جەتەكشى ورتالىقتارىنا تاعىلىمداماعا جىبەرۋگە جانە عىلىمي جابدىقتاردىڭ 14%-ىن جاڭارتۋعا مۇمكىندىك بەردى.

عىلىمنىڭ ەكونوميكانىڭ ناقتى سەكتورىمەن بايلانىسى دا كۇشەيە تۇسۋدە. بيزنەسپەن بىرلەسىپ ورىندالعان جوبالاردىڭ ۇلەسىن 2025 جىلى 20%-عا جەتكىزۋ مىندەتى قويىلدى. ول ءۇشىن عالىمداردىڭ قازاقمىس، ERG, قازاتومونەركاسىپ جانە قازمىرىش سياقتى ءىرى ونەركاسىپتىك كومپانيالاردىڭ وكىلدەرىمەن كەزدەسۋلەرى وتكىزىلەدى.

زەرتتەۋلەرگە ينۆەستيتسيا سالاتىن كومپانيالار ءۇشىن 150% سالىق شەگەرىمى قاراستىرىلعان. 2025 جىلدان باستاپ اكىمدىكتەر جانىنان جەرگىلىكتى بيۋدجەتتەردەن قولدانبالى زەرتتەۋلەردى قارجىلاندىرۋ ءۇشىن عىلىمي كەڭەستەر قۇرىلاتىن بولادى. سونداي-اق سالانى تولىق تسيفرلاندىرۋ ءۇشىن بىرىڭعاي تسيفرلىق عىلىم پورتالى ىسكە قوسىلدى.

رەسپۋبليكالىق بيۋدجەتتەن بارلىعى 2 297 جوبا جانە 162 عىلىمي-تەحنيكالىق باعدارلاما قارجىلاندىرىلدى، ونىڭ 1 مىڭعا جۋىعىن جاس عالىمدار جۇزەگە اسىرۋدا، ال 134-ءى تەحنولوگيالاردى كوممەرتسيالاندىرۋعا باعىتتالعان. بۇل جۇيەلى جۇمىس قازاقستاننىڭ تەحنولوگيالىق ەگەمەندىگى مەن يننوۆاتسيالىق بولاشاعى ءۇشىن بەرىك نەگىز قالايدى.

Abai.kz