Қазақстанда жыл сайын дәстүрге айналған «Мектепке жол» республикалық акциясы жаңа оқу жылы қарсаңында ерекше маңызға ие. Оның негізгі мақсаты – әлеуметтік аз қамтылған, көпбалалы отбасылардың балаларына, жетім және ата-анасының қамқорлығынсыз қалған жеткіншектерге мектепке баруға қажетті құрал-жабдықтар мен киім-кешек алып беру арқылы қолдау көрсету.

Бұл игілікті бастама қоғамдағы өзара қамқорлық пен жанашырлықтың жарқын үлгісіне айналды. Акция аясында еліміздің түкпір-түкпірінде мемлекеттік органдар, кәсіпкерлер, түрлі ұйымдар мен жеке азаматтар белсенділік танытып, мыңдаған балаға қуаныш сыйлауда.

Мектеп сөмкелері мен оқу құралдарына қоса, балаларға спорттық киімдер, аяқ киім, кей жағдайда қаржылай көмек те ұсынылады. Мұның барлығы жас ұрпақтың толыққанды білім алуына, жаңа оқу жылын шат-шадыман көңілмен бастауына жол ашады.

«Мектепке жол» тек қана қайырымдылық шарасы емес, ол – қоғамдағы бірлік пен мейірімнің көрінісі. Әрбір ата-ана мен ұстаз үшін балалардың білім жолында алаңсыз қадам басуы – ең үлкен қуаныш.

Бүгінде бұл акция көптеген мектептерде жалғасып жатыр. Алматы қаласындағы Мағжан Жұмабаев атындағы №137 мектептің (М.Жұмабаев атындағы №137 ЖББМ) ата-аналары да осы игі іске үлес қосып, тұрмысы төмен 10 балаға толық жиынтық сөмке сыйлады.

Солардың ішінен Артықбаев Сәрсен Айтбекұлын айырықша атауға болады. Осындай мысалдар қайырымдылықтың қаншалықты кеңінен таралып келе жатқанын айқын көрсетеді.

Жыл сайын өткізіліп келе жатқан «Мектепке жол» акциясы мыңдаған оқушыға сенім мен үміт сыйлап қана қоймай, болашаққа нық қадам жасауға шабыт береді.

Abai.kz