قازاقستاندا جىل سايىن داستۇرگە اينالعان «مەكتەپكە جول» رەسپۋبليكالىق اكتسياسى جاڭا وقۋ جىلى قارساڭىندا ەرەكشە ماڭىزعا يە. ونىڭ نەگىزگى ماقساتى – الەۋمەتتىك از قامتىلعان، كوپبالالى وتباسىلاردىڭ بالالارىنا، جەتىم جانە اتا-اناسىنىڭ قامقورلىعىنسىز قالعان جەتكىنشەكتەرگە مەكتەپكە بارۋعا قاجەتتى قۇرال-جابدىقتار مەن كيىم-كەشەك الىپ بەرۋ ارقىلى قولداۋ كورسەتۋ.

بۇل يگىلىكتى باستاما قوعامداعى ءوزارا قامقورلىق پەن جاناشىرلىقتىڭ جارقىن ۇلگىسىنە اينالدى. اكتسيا اياسىندا ەلىمىزدىڭ تۇكپىر-تۇكپىرىندە مەملەكەتتىك ورگاندار، كاسىپكەرلەر، ءتۇرلى ۇيىمدار مەن جەكە ازاماتتار بەلسەندىلىك تانىتىپ، مىڭداعان بالاعا قۋانىش سىيلاۋدا.

مەكتەپ سومكەلەرى مەن وقۋ قۇرالدارىنا قوسا، بالالارعا سپورتتىق كيىمدەر، اياق كيىم، كەي جاعدايدا قارجىلاي كومەك تە ۇسىنىلادى. مۇنىڭ بارلىعى جاس ۇرپاقتىڭ تولىققاندى ءبىلىم الۋىنا، جاڭا وقۋ جىلىن شات-شادىمان كوڭىلمەن باستاۋىنا جول اشادى.

«مەكتەپكە جول» تەك قانا قايىرىمدىلىق شاراسى ەمەس، ول – قوعامداعى بىرلىك پەن مەيىرىمنىڭ كورىنىسى. ءاربىر اتا-انا مەن ۇستاز ءۇشىن بالالاردىڭ ءبىلىم جولىندا الاڭسىز قادام باسۋى – ەڭ ۇلكەن قۋانىش.

بۇگىندە بۇل اكتسيا كوپتەگەن مەكتەپتەردە جالعاسىپ جاتىر. الماتى قالاسىنداعى ماعجان جۇماباەۆ اتىنداعى №137 مەكتەپتىڭ (م.جۇماباەۆ اتىنداعى №137 جببم) اتا-انالارى دا وسى يگى ىسكە ۇلەس قوسىپ، تۇرمىسى تومەن 10 بالاعا تولىق جيىنتىق سومكە سىيلادى.

سولاردىڭ ىشىنەن ارتىقباەۆ سارسەن ايتبەكۇلىن ايىرىقشا اتاۋعا بولادى. وسىنداي مىسالدار قايىرىمدىلىقتىڭ قانشالىقتى كەڭىنەن تارالىپ كەلە جاتقانىن ايقىن كورسەتەدى.

جىل سايىن وتكىزىلىپ كەلە جاتقان «مەكتەپكە جول» اكتسياسى مىڭداعان وقۋشىعا سەنىم مەن ءۇمىت سىيلاپ قانا قويماي، بولاشاققا نىق قادام جاساۋعا شابىت بەرەدى.

Abai.kz