يزرايل، اقش جانە يران اراسىنداعى اسكەري قاقتىعىس مۇناي باعاسىنىڭ وزگەرۋىنە، سونىڭ سالدارىنان تەڭگەنىڭ شەتەل ۆاليۋتالارىنا قاتىستى باعامىنا ىقپال ەتۋى مۇمكىن. بۇل جايلى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ايتتى.

ءمينيستردىڭ ايتۋىنشا، رەسەي مەن ۋكراينا اراسىنداعى سوعىس ۇزاق ۋاقىتتان بەرى جالعاسىپ كەلە جاتقاندىقتان، لوگيستيكالىق باعىتتار سوعان بەيىمدەلىپ ۇلگەرگەن.

"رەسەي مەن ۋكراينا اراسىنداعى قاقتىعىس ءبىراز ۋاقىتتان بەرى جالعاسىپ كەلەدى. سوعان بايلانىستى لوگيستيكا دا قالىپتاستى. ال پارسى شىعاناعى باعىتىنا كەلسەك، بۇل باعىت ءبىز ءۇشىن باسىم بولعان جوق. ءبىز پارسى شىعاناعىنداعى پورتتاردى، مىسالى بەندەر-ابباس پورتىن وتە سيرەك پايدالاندىق. ءيا، جونەلتىلىمدەر بولدى، بىراق بۇگىنگى كۇنى جاعدايدى ايقىندايتىنداي كولەمدە ەمەس", – دەدى جۇمانعارين.

ونىڭ سوزىنشە، قازاقستاندىق كومپانيالار ءۇشىن يران پورتتارىن پايدالانۋ بۇعان دەيىن دە وڭاي بولماعان. بۇعان ۇزاق ترانزيت ۋاقىتى مەن راسىمدەردىڭ كۇردەلىلىگى اسەر ەتكەن.

جۇمانعارين قازىرگى جاعدايدا نەگىزگى قاۋىپ مۇناي باعاسىنىڭ قۇبىلۋىنا بايلانىستى تەڭگە باعامىنىڭ وزگەرۋىندە ەكەنىن ايتتى.

"قاشىقتىق قىسقا كورىنگەنىمەن، جۇك ەكى مەملەكەت ارقىلى وتەدى. سوندىقتان بۇل باعىت لوگيستيكاعا ايتارلىقتاي اسەر ەتەدى دەپ ويلامايمىن. بىراق مۇناي باعاسىنىڭ اۋىتقۋى، ارينە، تەڭگە باعامىنا اسەر ەتەدى. ۆاليۋتا باعامىنىڭ قۇبىلمالىلىعى جاقسى ەمەس", – دەيدى مينيستر.

ونىڭ ايتۋىنشا، قاقتىعىستىڭ تەڭگە باعامىنا ىقتيمال اسەرى ۇكىمەت پەن ۇلتتىق بانك دەڭگەيىندە بىرلەسىپ قارالاتىن بولادى.

"ەگەر مۇناي باعاسى وسسە، ادەتتە تەڭگە كەرىسىنشە نىعايادى، السىرەپ كەتپەيدى. ماسەلە ونىڭ نىعايۋى نەمەسە السىرەۋىندە ەمەس. نەگىزگى ماسەلە – قۇبىلمالىلىق. قۇبىلمالىلىق ءاردايىم نارىقتاعى الاڭداۋشىلىقتى كۇشەيتەدى. بىزگە ەڭ باستىسى – تەڭگە باعامىنىڭ تۇراقتىلىعى", – دەيدى جۇمانعارين.

Abai.kz