اباي ەڭبەكتەرىن كەمىندە 10 تىلگە اۋدارۋىمىز كەرەك. بۇل تۋرالى بۇگىن ابايدىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا وتىرىسىندا قر پرەمەر-ءمينيسترىنىڭ ورىنباسارى بەردىبەك ساپارباەۆ ايتتى،-دەپ حابارلايدى قازاقپارات. 

«كەلەسى جىلى ءبىزدىڭ الدىمىزدا ۇلكەن تاريحي، مادەني ماڭىزى بار شارالار تۇر. ءبىزدىڭ مىندەتىمىز - ونى ءوز دەڭگەيىندە وتكىزىپ، ەلىمىزدىڭ، ۇلتىمىزدىڭ تاعى دا ءبىر رەت ابىرويىن، بەدەلىن دۇنيەجۇزىنە تانىتۋ. مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، ۇكىمەت بارلىق مەملەكەتتىك ورگاندارمەن بىرىگىپ، جالپى رەسپۋبليكالىق جوسپاردىڭ جوباسىن ازىرلەدى. قازىرگى تاڭدا بۇل جوسپار بارلىق مەملەكەتتىك ورگاندارمەن كەلىسىلدى. وسى جوسپارعا سايكەس، بارلىق ەلدى مەكەندەردە، اۋدان، وبلىس ورتالىقتارىندا، ەلوردادا، رەسپۋبليكالىق، حالىقارالىق دەڭگەيدە ەڭ كەمىندە 500-دەن استام ءىس-شارا ءوتۋى كەرەك. ەڭ نەگىزى ماقساتىمىز - وسى ءىس-شارالارعا اسىرەسە جاستاردى تارتۋ. وعان قوسىمشا مەرەيتويلاردى حالىقارالىق دەڭگەيدە وتكىزۋ ءۇشىن ءبىز قازىر يۋنەسكو، تۇركسوي حالىقارالىق ۇيىمدارىمەن جۇمىس جاساپ جاتىرمىز. قازىر بارلىعىمەن كەلىسىم بار. ارينە، نەگىزگى ءىس-شارالار شقو-نىڭ سەمەي وڭىرىندە وتەدى»، - دەدى ب.ساپارباەۆ.

ونىڭ اتاپ وتۋىنشە، كوميسسيا مۇشەلەرى قاراۋىل، جيدەبايدا بولعان. سول جەردە ماماندارمەن بولعان كەزدەسۋدە جيدەبايداعى مۋزەيدى، قورىقتى، موۆزولەيدى قالپىنا كەلتىرۋ ماسەلەلەرى تالقىلانعان. اقشوقى، كەڭگىربايدا، قۇنانباي، اباي جەرلەنگەن جەرلەردە قانداي قۇرىلىمدار، قانداي ءىس-شارالار ءوتۋى تيىستىگى اقىلعا سالىنعان.

«اباي قۇنانبايۇلى شىعارمالارىن كىتاپ قىلىپ شىعارۋ، دەرەكتى فيلمدەر ءتۇسىرۋ سىندى جۇمىستار جوسپارعا سايكەس جۇرگىزىلىپ جاتىر. ءبىز كەم دەگەندە ۇلى اقىننىڭ ەڭبەكتەرىن 10 تىلگە اۋدارۋىمىز كەرەك. ودان كەيىنگى يۋنەسكو توڭىرەگىندەگى شارا پاريج قالاسىندا جوسپار بويىنشا قاراشا ايىندا وتەتىن بولادى. بىزبەن قارىم-قاتىناسى جاقسى مەملەكەتتەردە ابايتانۋ ورتالىعىن اشۋ جونىنەن جۇمىس جۇرگىزىلىپ جاتىر، ەلشىلىكتەرمەن كەلىسىم بار. بۇل ورايداعى نەگىزگى جۇمىس نۇر-سۇلتانداعى ل.گۋميلەۆ اتىداعى ەۋرازيا ۇلتتىق ۋنيۆەرسيتەتى اياسىندا جۇرگىزىلەتىن بولادى»، - دەدى ۆيتسە-پرەمەر.

سونىمەن قاتار، ول ابايدىڭ 175 جىلدىق مەرەيتويىنا قانشا قاراجات جۇمسالاتىندىعىن دا ايتتى.

«رەسپۋبليكالىق بيۋدجەتتەن 3,2 ملرد تەڭگە قارجى بولىنگەن. قازىرگى تاڭدا جەرگىلىكتى بيۋدجەتتەن 500 ملن تەڭگە ءبولىنىپ وتىر. قالعانىن جۇمىس كەزىندە كورەمىز. بۇعان قوسا دانيال كەنجەتايۇلىمەن (شقو اكىمى احمەتوۆ- اۆت.) كەلىستىك. سول وڭىردەن شىققان قالتالى ازاماتتار، سول وڭىردە جۇمىس ىستەپ جاتقان ۇلكەن كومپانيالار بار. ءبىز سول دەمەۋشىلەردىڭ دە قارجىلاي مۇمكىندىگىن پايدالانىپ، قوسىمشا قارجى كوزدەرىن تابامىز دەپ جوسپارلاپ وتىرمىز»، - دەدى ول.

Abai.kz