2019 جىلدىڭ 6 قاراشاسىندا الماتى قالاسىندا – «تۇران» ەتنو-فولكلورلىق ءانسامبلىنىڭ باق وكىلدەرىمەن كەزدەسۋى جانە لەكتسيا كونتسەرتى وتەدى.

شىعارماشىلىق كەزدەسۋدە «تۇران» ەتنو-فولكلورلىق ءانسامبلىنىڭ مۇشەلەرى توپ قۇرامىنىڭ وزگەرۋى جايىندا ايتىپ، ءانسامبلدىڭ جاڭا مۇشەسىن تانىستىرىپ، اشىق سۇحبات وتكىزبەك.

سونىمەن قاتار قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ جانە «قازاقكونتسەرت» مەملەكەتتىك كونتسەرتتىك ۇيىمىنىڭ قولداۋىمەن وتەتىن ۇلكەن جەكە كونتسەرتى تۋرالى حابارلاماق.

كەزدەسۋ بارىسىندا انسامبل قازاق حالقىنىڭ ۇلتتىق ساز اسپاپتارىمەن تانىستىرىپ، ءوزىنىڭ كونتسەرتتىك باعدارلاماسىن ۇسىنادى.

«تۇران» ءانسامبلىنىڭ تاريحى 2008 جىلدان باستاۋ الادى. قازىرگى تاڭدا توپ قۇرامىندا سەرىك نۇرمولداەۆ، باۋىرجان بەكمۇحانبەت، ماقسات مەدەۋبەك جانە ەرجىگىت اليەۆ ونەر كورسەتەدى. انسامبلدەن بولەك توپ مۇشەلەرى قۇرمانعازى اتىنداعى قازاق ۇلتتىق كونسەرۆاتورياسى مەن ت.جۇرگەنوۆ اتىنداعى قازاق ۇلتتىق ونەر اكادەمياسىندا ۇستازدىق قىزمەت اتقارىپ، اتالعان وقۋ ورىندارىندا ماگيستراتۋرا، دوكتورانتۋرا بويىنشا ءبىلىم الۋدا.

قازاق حالقىنىڭ سىبىزعى، سازسىرناي، دومبىرا، قوبىز، جەتىگەن، شىڭكىلدەك سياقتى ساز اسپاپتارىن، كومەيمەن قايلاۋ ءان ايتۋ مانەرىن ءوزارا ۇندەستىرۋ ارقىلى  كونە سارىننىڭ زاماناۋي تۇرعىدا قايتا جاڭعىرتۋداعى ىزدەنىستەرى ءانسامبلدىڭ قۇرىلۋىنا تۇرتكى بولدى.

اتالعان ۇجىم تورتكۇل دۇنيە تىڭدارماندارىن ءوز ونەرىمەن تامساندىرىپ ۇلگەردى. الەمنىڭ 70 مەملەكەتتەرىنىڭ «كارنەگي حولل» (نيۋ-يورك، اقش), «كەننەدي تسەنتر» (ۆاشينگتون، اقش), «كونتسەرت حاۋس» (بەرلين، گەرمانيا), «كرەمل سارايى» (موسكۆا، رەسەي), «كونگرەسس جانە فەستيۆال سارايى» (كاننى، فرانتسيا), «ساللە كورتو» (پاريج، فرانتسيا), جانە ت.ب. الەمگە اتى شۋلى كونتسەرتتىك زالداردا 600 جۋىق جەكە كونتسەرتتەرىن وتكىزىپ، ۇلتتىق ونەرىمىزدىڭ ناسيحاتتالۋىنا، دامۋىنا ۇلكەن ۇلەسىن قوسۋدا. «تۇران» ءانسامبلى بەلارۋس، نورۆەگيا، رەسەي، ءازىربايجان، ۆەنگريا، تاتارستان، تۇركيا ەلدەرىنە الەمدىك تۋرنە جاسادى. سونىمەن قاتار قر تۇڭعىش پرەزيدەنتى – ەلباسى قورىنىڭ قارجىلاي قولداۋىمەن «تۇران» توبى قىتاي حالىق رەسپۋبليكاسىنىڭ شۋندە، شەنچجەن، تسينحۋانداو، پەكين، شانحاي، حانچجوۋ قالالارىندا جەكە كونتسەرتتەرىن وتكىزدى. اتالعان ۇجىم مونتە-كارلو، كاننى جانە پاريج قالالارىنا «ۇلى دالانىڭ جەتى قىرى» اتتى كونتسەرتتىك تۋرنە جاساپ قايتتى. سونداي-اق ساۋد ارابياسىنىڭ ەر-رياد قالاسىندا وتكەن «Nomad Universe» فەستيۆالىنە «تۇران» قازاق مۋزىكا مادەنيەتىنىڭ وكىلدەرى جانە فەستيۆالدىڭ قۇرمەتتى قوناعى رەتىندە شاقىرتىلدى.

كەزدەسۋ 6 قاراشادا، ساع.18.00 دە م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كىشى زالىندا وتەدى. كىرۋ تەگىن.

Abai.kz