قازاقستاندا جەر قويناۋىن پايدالانۋشىلارعا اعاش وتىرعىزىپ، ورمانعا اينالدىرۋ مىندەتتەلەدى.

بۇل تۋرالى قر ەكولوگيا، گەولوگيا جانە تابيعي رەسۋرستار ۆيتسە-ءمينيسترى ەرلان نىسانباەۆ مالىمدەدى.

جاڭا مىندەتتەمە «قر كەيبىر زاڭنامالىق اكتىلەرىنە اگروونەركاسىپتىك كەشەندى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىندا كورسەتىلگەن.

«جەر قويناۋىن پايدالانۋشىلارعا ۋران وندىرۋدە ورمانعا اعاش وتىرعىزۋ بويىنشا مىندەتتەمە بەرىلدى. ولار وزدەرى پايدالانعان اۋماقتان ەكى ەسە ۇلكەن كولەمدە ورمانعا اينالعانشا كۇتىپ-باپتاۋى ءتيىس. ودان بولەك، مەملەكەتتىك ورمان قورىنىڭ جەرى پايدالى قازبالار ءوندىرۋ سۋبەكتىلەرىنە اۋىسقاندا، بۇل ۋچاسكەدەن 2 ەسە ۇلكەن اۋماققا ورمان داقىلدارىن وتىرعىزىپ، 3 جىل كۇتىپ-باپتاۋ مىندەتتەمەسى كوزدەلگەن»، - دەدى ەرلان نىسانباەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

ايتا كەتەيىك، مەملەكەت باسشىسى «قر كەيبىر زاڭنامالىق اكتىلەرىنە اگروونەركاسىپتىك كەشەندى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنا قول قويدى.

Abai.kz