سارسەنبى, 13 قاراشا 2019
46 - ءسوز 1338 13 پىكىر 6 قاراشا, 2019 ساعات 12:14

بيلىك ۇلتشىلدىقتان نەگە قاشادى؟

ء"بىز، ورتاق تاريحي تاعدىر بىرىكتىرگەن قازاقستان حالقى..." دەپ باستالاتىن كونستيتۋتسيامىزدىڭ العاشقى سويلەمىنەن-اق قازاقتىڭ وسى مەملەكەتتى قۇرۋشى ۇلت ەكەنىنە ءشۇبا كەلتىرەمىز. اتا زاڭدى "تاۋەلسىزدىكتىڭ كەپىلى" دەسەك، ء"بىز، قازاق جەرىنىڭ زاڭدى مۇراگەرى - قازاق حالقى..." دەپ، ءابسوليۋتتى كوپشىلىكتى قۇراعان شاڭىراقتىڭ حاق يەسى رەتىندە ءسوز باستاۋعا نە كەدەرگى بولدى؟

ەلدىڭ يەسى قازاق، جەردىڭ كيەسى قازاق. الدەبىرەۋدە ەسەمىز كەتپەسە، ەشكىمنەن ەنشىلەپ ەشتەڭە الماپپىز. بوداندىقتىڭ بۇعاۋىن مويىننان لاقتىرىپ تاستاپ، اياقتاعى تۇساۋدى شەشىپ، ارمان - اقيقاتقا اينالعان التىن زاماندا بۇ نە قىلعان بوركەمىكتىك؟ "جالپى تۇگەل تاۋەكەلگە مىنبەي تۇرىپ، جالقى ەشتەڭە بىتىرە المايدى. قاراپايىم ەل دەگەن بولمايدى. جەرىنە، سۋىنا، تىلىنە، دىنىنە، تاريحىنا، تاعدىرىنا يە دەگەن حالىق بولادى. تەك سونداي حالىق قانا ەسەرىن تۇزەپ، ەرىنە مەدەت بولادى. قورلانا بەرمەي، ارلانا بىلەيىك. نامىستىڭ ءسوزىن سويلەيىك",- دەپ ەدى ءابىش اتام. 300 جىلدى ءارى ساناعاندا، باسىنا ءتاج كيگەن بەرگى 30 جىلدا قازاق ۇلتىنىڭ ەكى ءتۇرلى "ولشەمدە" ءومىر سۇرگەنىنە ارلانايىق پا، قورلانايىق پا؟ قۋاتتى مەملەكەتتىڭ تۇعىرىن بەكىتىپ، امبەباپ ۇلتتى ءتۇزۋ ءۇشىن ءتۇپ نەگىزدەن اجىراۋ كەرەك دەگەندى كىم ايتتى؟

ءيا، كوش باسىنداعى باتىستىڭ وركەنيەتتى قوعامى قازىر ەتنيكالىق تەككە كىندىگى بايلانباعان، ليبەراليزمدى قۇپ كورەتىن "ازاماتتىق ۇلتشىلدىققا" تابان تىرەدى. ال بۇعان كەلۋ ءۇشىن ولار ساياسي-الەۋمەتتىك، مادەني تۇلەۋدىڭ نەندەي ترانسفورماتسياسىنان ءوتتى؟ "ۇلتى ءۇشىن قۇرمەت قىلماي،باس قامىن ويلاپ جۇرگەن ازاماتتاردىڭ ەلى ارتتا قالىپ وتىر. ۇلتشىل جۇرتتار دەسە، انە، گەرمانيا، ياپونيا، انگليا، تۇركيالار، ولاردىڭ بالاسى جاسىنان "ۇلتىم" دەپ وسەدى، ەسەيگەن سايىن بار ءبىلىمىن، كۇشىن ءوز جۇرتىنىڭ كۇشەيۋىنە جۇمسايدى. ولاردىڭ ءار ادامى - مەملەكەتتىڭ كەرەگى، قىزمەتكەرى",- دەمەپ پە ەدى جۇسىپبەك ايماۋىت.

ال پوست-كوممۋنيستىك قازاق بيلىگىنىڭ ۇلتتىق مەملەكەت قۇرۋدان باس تارتىپ،    70% قازاقتان "قازاقستاندىق" جاساۋعا اۋرەگە تۇسكەنى ولاردىڭ سۇيەككە سىڭگەن مەنتاليتەتىنەن الىستامايتىنىن اڭعارتسا كەرەك. جانە بۇل ساياسي ۇستانىم ءارى قاراي جالعاسىن تاباتىنىنا الگى جىگىتتىڭ ساياسي تولعاۋى مەن ايىپتاۋشى ريتوريكاسىنان ۇقتىق.

"اسپاندا قالىقتاپ، قۇدىقتان سۋ ىشپەك بولىپ قۇدىققا قونعان تورعاي: "شەكسىز اسپاندى شارلايمىن دەپ ابدەن شولدەدىم",- دەسە، قۇدىقتىڭ تۇبىندە جاتقان قۇرباقا: " كوز اشقالى اسپاندى كورىپ كەلەمىز. قۇدىقتىڭ اۋزىنا سىيعان اسپاندى نە بولدى "شەكسىز"دەپ؟ سەن دە سۋايت ەكەنسىڭ" دەپ اشۋلانىپتى."
وسى سەكىلدى ەكى ءتۇرلى "بەلدەۋدە" ءومىر ءسۇرىپ جاتقان ساياسي ەليتا مەن قالىڭ بۇقارا ءبىرىن-ءبىرى تۇسىنۋدەن قالدى.

ۇلتشىلدىققا مەيىرى قانباعان ۇلتتان مەملەكەتشىلدىك سانانى تالاپ ەتەدى...
نونسەنس قوي...

قۇداي-اۋ، مەملەكەتىڭ - شاڭىراعىڭ دەسەڭ، ۇلتىڭ - بالاڭ عوي. مەملەكەتشىلدىك پەن ۇلتشىلدىقتىڭ اراسى وسى عوي!

بۇلار نەگە ۇلتشىلدىقتان قاشادى؟ شاڭىراعىڭنىڭ - مەملەكەتىڭنىڭ شىراعى سونبەس ءۇشىن، ەڭ ءبىرىنشى بالاڭنىڭ - ۇلتىڭنىڭ قامىن جاساۋ شارت ەمەس پە؟
ساۋالىمنىڭ لوگيكاسىن بۇكىل ەل تۇسىنگەندە، ەرلان قارين تۇسىنبەي قالىپتى.
"ۇلتشىلدىق ءوز ميسسياسىن اتقاردى", "ەلدە قوس بيلىك جوق" دەپ كوزىمىزدى باقىرايتىپ قويىپ سۇحبات بەرەتىن ادامنىڭ جالتارما جاۋابى دەپ قابىلدادىم.

"ساۋالى بۇيرىق تەكتىگە – سولقىلداق جاۋاپ جۇرمەگەن"

دينا ەلگەزەكتىڭ facebook پاراقشاسىنان

Abai.kz

13 پىكىر