جەكسەنبى, 17 قاراشا 2019
474 0 پىكىر 6 قاراشا, 2019 ساعات 16:23

بەلسەندىلەر كوكجايلاۋدى ىلە الاتاۋى پاركىنە قايتارۋدى ۇسىندى

"زەلەنوە سپاسەنيە" ەكولوگيا قاۋىمداستىعى بيلىكتى كوكجايلاۋ شاتقالىن ىلە الاتاۋى پاركىنىڭ قۇرامىنا قايتارۋعا شاقىردى.

قاراشانىڭ 4-ىنە جاريالانعان مالىمدەمەسىندە بۇل ۇيىم كوكجايلاۋ شاتقالى بۇرىنعىشا الماتى قالاسى مەدەۋ اۋدانىنىڭ قۇرىلىس پەن تاۋ-شاڭعى كۋرورتىنا ارنالعان جەر قورىندا تۇرعانىن ايتادى. ەكو بەلسەندىلەر بۇل جايت شاتقال اۋماعىن قالا اكىمدىگىنىڭ ءوز قالاۋىمەن پايدالانا بەرۋىنە مۇمكىندىك بەرەدى دەپ سانايدى.

"زەلەنوە سپاسەنيە" مالىمدەمەسىندە ۇكىمەتتىڭ كوكجايلاۋدى ەرەكشە قورعالاتىن اۋماق ساناتىنان شىعارۋ تۋرالى 2014 جىلى شىعارعان قاۋلىسى مەن كوكجايلاۋعا قاتىسى بار باسقا دا قاۋلىلارىنىڭ كۇشىن جويۋ كەرەك دەپ ەسەپتەيدى.

بەلسەندىلەر شاتقال اۋماعىنداعى قۇرىلىستاردى بۇزۋعا، اۆتوكولىك قوزعالىسىنا تىيىم سالۋعا شاقىرادى.

قازان ايىنىڭ سوڭىندا الماتىعا جۇمىس ساپارىمەن كەلگەن پرەزيدەنت قاسىم-جومارت توقاەۆ كوكجايلاۋعا سالىناتىن تاۋ شاڭعىسى كۋرورتىنىڭ جوباسىن توقتاتۋ قاجەتتىگىن ايتقان. ونىڭ "بۇل ماسەلەگە قايتا-قايتا ورالا بەرمەس ءۇشىن بۇگىن ءبىرجولا تىيىم سالدىم. كوكجايلاۋ تاۋ-شاڭعىسى كۋرورتىنا قاجەتتىلىك جوق" دەگەن ءسوزى باسپاسوزدە جاريالاندى.

قازاقستان پرەزيدەنتى قاسىم-جومارت توقاەۆ 29 قازاندا الماتى قالاسىنىڭ الەۋمەتتىك-ەكونوميكالىق دامۋىنا ارنالعان وتىرىستا بۇرىن زاڭسىز بەرىلگەن جەرلەردى ىلە الاتاۋى ۇلتتىق پاركىنە قايتارۋ قاجەتتىگىن دە مالىمدەگەن ەدى.

Abai.kz

0 پىكىر