كەزىندە قازاقتىڭ ۇلى جازۋشىسى عابيت مۇسىرەپوۆتىڭ ءوزى عاشىق بولىپ، كەيىن ۇيلەنگەن قازاقتىڭ بەلگىلى اكتريسساسى رايسا مۇحامەدياروۆانى سوڭعى ساپارعا شىعارىپ سالعانىمىز تۋرالى باسقا دا اقپارات قۇرالدارى سياقتى ءبىز دە جوعارىدا جازعانبىز. مارقۇممەن حوشتاسۋ عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا وتكەن.

حوشتاسۋدان كەيىن مارقۇمدى «كەڭساي-2» زيراتىنا جەرلەپ قايتقان ەدىك. بۇل ساپاردا ەكى كۇننەن بەرى مەنىڭ قاسىمدا كينواكتەر شاياحمەت يماشۇلى، كينورەجيسسەر ساتىبالدى (ساكەن)تەكەەۆ باستان-اياق بىرگە جۇرگەن بولاتىن. مارقۇمدى جەرلەپ كەلگەننەن كەيىن، وسىنىڭ الدىندا عانا مارقۇم رايسا مۇحامەدياروۆانىڭ قوناقاسى بەرىلگەن رەستوراندا اسى بەرىلدى.

بۇل اسقا كوپتەگەن ونەر قايراتكەرلەرى، اقىن، جازۋشىلار، ءوزىم ارالاسىپ جۇرگەن قازاقستان جازۋشىلار وداعى باسقارما توراعاسىنىڭ ورىنباسارى، بەلگىلى اقىن باۋىرجان جاقىپ جانە ت.ب. كوپتەگەن تانىمال تۇلعالار مارقۇم جايلى ەستەلىكتەرىن ورتاعا سالعان بولاتىن.

وسىنىڭ الدىنداعى مارقۇمعا بەرىلگەن قوناقاسىداعىداي بۇل جولعى استى دا كينو زەرتتەۋشى شاياحمەت يماشۇلى جۇرگىزدى.

...وسى استا بەلگىلى اكتريسسا، كوپ جىلداردان بەرى مارقۇم رايسا مۇحامەدياروۆانىڭ جاقىن قۇربىسى بولعان عازيزا ادىنابيەۆانىڭ تومەندەگى اڭگىمەسى جۇرت نازارىن بىردەن وزىنە اۋدارىپ العانىمەن ەرەكشەلەنگەنىن باسا ايتقىم كەلەدى.

-ءيا، زىمىراپ ءوتىپ بارا جاتقان ۋاقىت-اي دەسەڭشى! مىنا مەنىڭ قولىمداعى بىلەزىكتى مەن تۇرمىسقا شىققاندا رايسا مارقۇمنىڭ ءوزى سىيعا تارتقانى كەشە عانا سياقتى ەدى . ال، بۇل بىلەزىكتى رايساعا العاش عاشىق بولىپ جۇرگەندە ۇلى عاباڭ، عابيت مۇسىرەپوۆ سىيعا تارتقان ەكەن. ءيا، انىعىن ايتقاندا بۇل بىلەزىك جاي بىلەزىك ەمەس، عاباڭ مەن رايسانىڭ ءمولدىر ماحابباتتارىنىڭ بەلگىسى ىسپەتتى اسا قۇندى ءارى قاسيەتتى دۇنيە!

قازىر ورتامىزدا قايعىدان قارا جامىلىپ وتىرعان عاباڭ مەن رايسانىڭ سوڭىندا قالعان ەكى قىزى: گاۋحار مەن گۇلنارعا وسىناۋ ماحابباتتىڭ سيمۆولى ىسپەتتى بىلەزىكتى سىيعا تارتامىن. دۇنيەدە عاشىقتىقتان ارتىق قۇدىرەت بارما ەكەن ءسىرا؟

گاۋحار، گۇلنار، قازاقتىڭ ۇلى جازۋشىسى، سەندەردىڭ اكەلەرىڭ عابيت مۇسىرەپوۆتىڭ، انالارىڭ رايسا مۇحامەدياروۆاعا سىيعا تارتقان وسىناۋ بىلەزىكتى كوزدەرىڭنىڭ قاراشىعىنداي كورەرسىڭدەر دەپ سەنەمىن!

تەبىرەنە تولقي وتىرىپ عازيزا اپاي ءسوزىن وسىلاي دەپ اياقتاعان بولاتىن.
قارالى استا وتىرعان بارلىعىمىزدى قاتتى تەبىرەنتىپ جىبەرىپ ەدى عازيزا اپايدىڭ بۇل سوزدەرى. عاباڭ مەن رايسا اپايدىڭ اسىل بەينەلەرى كوز الدىمىزعا كەلدى وسى ساتتە.

زالدا ءبىر ءسات ءولى تىنىشتىق ورناپ، ارتى دۋ قول شاپالاققا ۇلاسقانى دا بۇل ساتتە ەشقانداي ەرسى بولىپ كورىنبەگەن بىزدەرگە...
مەنىمەن بىرگە داستارحانداس بولىپ وتىرعان دوسىمىز، كينورەجيسسەر ساتىبالدى تەكەەۆ وسى كورىنىستەردى سول ارادا تەلەفونىنا ءتۇسىرىپ جاتىپ:
-جۇماش، وسى تۋرالى مىندەتتى تۇردە جازشى؟-دەپ وتىنگەنىن نەسىنە جاسىرايىن.
ايتپاقشى، نەگە ەكەنى تۇسىنىكسىز، ءوز فوتواپپاراتىممەن تۇسىرگەن سۋرەتتەرىم ساپاسىز بولىپ شىعىپ، ساتىبالدى دوسىمىز تۇسىرگەن سول فوتولاردى عانا سىزدەردىڭ نازارلارىڭىزعا ۇسىنۋعا تۋرا كەلگەنىن دە جاسىرمايمىن...

ءيا، دۇنيەدە ماحاببات قۇدىرەتىنە جەتكەن كۇش جوق شىعار ءسىرا!
عاباڭ مەن رايسا سياقتى ەكى ۇلى تۇلعانىڭ ماحابباتىنىڭ بەلگىسى بولعان بىلەزىكتى ولاردىڭ سۇيىكتى قىزدارى گاۋحار مەن گۇلنار ايالاي ۇستاپ، ەكى كوزدەرى مولتىلدەگەن جاسقا تولىپ، وسى ءساتتىڭ كۋاسى بولىپ وتىرعان بارلىعىمىزدى دا تولقىتىپ جىبەرگەن ەدى!...

ءيا،مارقۇمداردىڭ توپىراعى تورقا بولسىن!
جاندارى ءجاننات نۇرىمەن شالقىسىن!!!

جۇماش كەنەبايدىڭ facebook پاراقشاسىنان

Abai.kz