اقتوبە قالاسىنداعى اۋە قورعانىسى كۇشتەرى اسكەري ينستيتۋتىنىڭ كۋرسانتتار ۇلى ۇشقىش، ەكى مارتە كەڭەس وداعىنىڭ باتىرى تالعات بيگەلدينوۆتى ەسكە الدى.

ەسكە الۋ ءىس-شاراسىندا اسكەري ينستيتۋت باستىعى اۆياتسيا گەنەرال-مايورى داۋرەن قوسانوۆ بولاشاق ۇشقىشتار مەن ينجەنەرلەرگە وتانداستارىنىڭ باتىرلىقتارى مەن ەلىنە-جەرىنە دەگەن سۇيىسپەنشىلىك پەن جانقيارلىق ەرلىكتەرى تۋرالى ەستەلىكتەردى ايتتى.

«ءبىرىنشى رەت كەڭەس وداعىنىڭ باتىرى اتاعى ۇشقىش-اعا لەيتەنانت بيگەلدينوۆقا 1944 جىلدىڭ قازان ايىندا ەرلىگى مەن جاۋىنگەرلىك شەبەرلىگى ءۇشىن بەرىلدى. سول كەزدە ءتورت جاۋ ۇشاقتارىن تالقانداعان باتىر، ءدال سەندەردەي 22 جاستا بولدى»، - دەدى ول ءتورتىنشى كۋرس كۋرسانتتارىنا.

ءبىر مينۋت ۇنسىزدىكتەن كەيىن اسكەري ينستيتۋت باسشىلىعى مەن كۋرسانتتار باتىردىڭ مۇسىنىنە گۇل شوقتارىن قويدى. قولادان قۇيىلعان ەسكەرتكىش ۇشۋ ينستيتۋتىندا 10 جىل بۇرىن بوي كوتەرگەن. سول كەزدە اتى اڭىزعا اينالعان ۇشقىش مونۋمەنتتىڭ اشىلۋىنا راسىمىنە قاتىسقان.

ەسكە الۋ شاراسى «اسپانعا جول» اتتى دەرەكتى ومىرباياندىق ءفيلمنىڭ كورسەتىلىمىمەن اياقتالدى.

1941-1945جج. ۇلى وتان سوعىسىنىڭ ارداگەرى، ەرجۇرەك ۇشقىش تالعات بيگەلدينوۆ 2014 جىلدىڭ 10 قاراشاسىندا 93 جاسىندا ومىردەن وزدى. بەرلين ءۇشىن شايقاسقا قاتىسقان باتىرعا 1945 جىلدىڭ ماۋسىمىندا ەكىنشى رەت كەڭەس وداعىنىڭ باتىرى اتاعى بەرىلدى. ۇلى وتان سوعىسى جىلدارىندا ول بارلىعى 305 جاۋىنگەرلىك ۇشۋ جاسادى.

ەكى مارتە كەڭەس وداعىنىڭ باتىرى رەتىندە تالعات بيگەلدينوۆ ەكى رەت «التىن جۇلدىز» مەدالمەن ماراپاتتالدى. ءار جىلدارى كسرو جوعارعى كەڭەسىنىڭ 2-ءشى، 3-ءشى جانە 12-ءشى شاقىرىلىمىنىڭ دەپۋتاتى بولىپ سايلاندى، ۇوس مۇگەدەكتەرى مەن جەتىم بالالارعا حالىقارالىق قايىرىمدىلىق قورىن باسقاردى. ونىڭ ەسىمىمەن قازاقستاننىڭ ءار ءتۇرلى قالالارىندا كوشەلەر اتالادى. سونىمەن قاتار ورتالىق ازياداعى قارۋلى كۇشتەر مەن باسقا دا كۇش قۇرىلىمدارى ءۇشىن اۆياتسيالىق ماماندار دايىندايتىن جالعىز جوعارى اسكەري وقۋ ورنى – اقتوبەدەگى اۋە قورعانىسى كۇشتەرىنىڭ اسكەري ينستيتۋتى اڭىز ادامنىڭ ەسىمىمەن اتالادى.

Abai.kz