جۇما, 29 ناۋرىز 2024
2065 0 پىكىر 12 قاراشا, 2019 ساعات 09:41

قاسىم-جومارت توقاەۆ بىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى

قازاقستان پرەزيدەنتى قاسىم-جومارت توقاەۆقا نيدەرلاند كورولدىگىنىڭ ەلشىسى اندرەي كارستەنس، ماجارستان ەلشىسى انتال حەيزەر، گرەكيا رەسپۋبليكاسىنىڭ ەلشىسى ادام گەورگيوس اداميديس، ەگيپەت اراب رەسپۋبليكاسىنىڭ ەلشىسى مانال ەحيا ءال شينناۋي، كاتار مەملەكەتىنىڭ ەلشىسى ابدۋلازيز بەن سۇلتان دجاسەم مادجيد ءال-رۋمەيحي سەنىم گراموتالارىن تاپسىردى.

مەملەكەت باسشىسى ەلشىلەردى قازاقستانداعى ديپلوماتيالىق قىزمەتتەرىنىڭ رەسمي تۇردە باستالۋىمەن قۇتتىقتاپ، يگى ميسسيالارىنا تابىس تىلەدى.

سالتاناتتى شارا بارىسىندا پرەزيدەنت شەتەلدىك ديپلوماتتارمەن شاعىن سۇحبات قۇردى.

قاسىم-جومارت توقاەۆ نيدەرلاند ەلشىسىنە اتالعان مەملەكەت قازاقستاننىڭ ەۋروپاداعى نەگىزگى سەرىكتەستەرىنىڭ ءبىرى ەكەنىن ايتتى.

– ءبىزدىڭ ەلىمىزدىڭ «شەلل» جانە تاعى دا باسقا ءىرى مۇناي كومپانيالارىمەن قارىم-قاتىناسى وتە جاقسى. مۇنداي ىنتىماقتاستىق الداعى ۋاقىتتا دا جالعاسا بەرەدى دەپ ويلايمىن. ءبىز نيدەرلاندىنىڭ قازاقستانمەن تىعىز ىقپالداستىق ورناتۋعا ۇمتىلىسىن جوعارى باعالايمىز. ءسىزدىڭ ەلىڭىزدىڭ ينۆەستيتسيالىق الەۋەتى وراسان زور، – دەدى مەملەكەت باسشىسى.

قاسىم-جومارت توقاەۆ انتال حەيزەرمەن كەزدەسۋ بارىسىندا قازاقستاننىڭ ماجارستاندى ورتالىق ەۋروپاداعى جانە ەۋروپالىق وداق اياسىنداعى نەگىزگى ءارى ماڭىزدى سەرىكتەسى رەتىندە قاراستىراتىنىن اتاپ ءوتتى. پرەزيدەنت ماجارستان ۇكىمەتىنىڭ بۋداپەشتتە تۇركى كەڭەسىنىڭ ءوفيسىن اشۋ جونىندەگى شەشىمىن قۇپتاپ، وعان تاريحي ادىلەتتىلىكتىڭ ورناۋى دەپ باعا بەردى.

– ەكى ەل اراسىندا گۋمانيتارلىق بايلانىستار نىعايىپ كەلەدى. ال ەكونوميكا سالاسى بويىنشا دامۋ قارقىنى وتە جوعارى. ءبىزدىڭ ۇكىمەتتەرىمىز بىرگە جۇمىس اتقارۋعا ەرەكشە قۇلشىنىس ءبىلدىرىپ وتىر، – دەدى قازاقستان پرەزيدەنتى.

قاسىم-جومارت توقاەۆ ادام گەورگيوس اداميديسپەن اڭگىمەلەسۋ كەزىندە قازاقستاننىڭ گرەكيامەن اراداعى ىنتىماقتاستىقتى دامىتۋعا زور ءمان بەرەتىنىن ايتتى.

– ءبىز گرەكيامەن وسىعان دەيىن قالىپتاسقان ىنتىماقتاستىقتى ودان ءارى وركەندەتۋگە زور قىزىعۋشىلىق تانىتامىز. ءسىز ەلشى رەتىندە ەكى ەل اراسىنداعى بايلانىستى ءارى قاراي دامىتۋعا ەلەۋلى ۇلەس قوساسىز دەپ ويلايمىن، – دەدى پرەزيدەنت.

ەگيپەت ديپلوماتيالىق ميسسياسىنىڭ جەتەكشىسىن قابىلداۋ ساتىندە مەملەكەت باسشىسى پرەزيدەنت ابدەل فاتتاح اس-ءسيسيدىڭ 2016 جىلعى قازاقستانعا جاساعان ساپارى تابىستى بولعانىن اتاپ ءوتىپ، وعان ىزگى تىلەگىن جولدادى.

– ەلدەرىمىز ەكىجاقتى قاتىناستاردى دامىتۋ باعىتىندا وڭ ناتيجەلەرگە قول جەتكىزدى. حالىقارالىق كۇن تارتىبىندەگى كوپتەگەن ماسەلە بويىنشا مەملەكەتتەرىمىزدىڭ ۇستانىمى ورتاق، – دەدى قاسىم-جومارت توقاەۆ.

مەملەكەت باسشىسى كاتار ەلشىسىنە 2019 جىلدىڭ ماۋسىم ايىندا دۋشانبەدە وتكەن ازياداعى ءوزارا ىقپالداستىق جانە سەنىم شارالارى جونىندەگى كەڭەس ءسامميتى اياسىندا ءامىر تاميم بەن حاماد ءال-تانيمەن تابىستى كەزدەسۋ وتكىزگەنىن ايتتى. سونداي-اق اتالعان ەلمەن ىنتىماقتاستىقتىڭ نىعايا بەرەتىنىنە سەنىم ءبىلدىردى.

– ءبىز Qatar Airways كومپانياسىنىڭ نۇر-سۇلتان مەن دوحا اراسىندا اۋە قاتىناستارىن ىسكە قوسۋ جونىندەگى شەشىمىن قۇپتايمىز. مەملەكەت باسشىسى رەتىندە ءوزىم جانە قازاقستان ۇكىمەتى كاتارمەن بايلانىستاردى نىعايتۋ ءۇشىن بارلىق قاجەتتى شارالاردى قابىلدايمىز، – دەدى قاسىم-جومارت توقاەۆ.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616