قازاق ەندى ارابتاندىرۋ ساياساتىنا باتىپ كەتپەۋى كەرەك
جاي قاراپايىم پەندە رەتىندە ءدىن تۋرالى كەيدە ويلاناسىڭ. حريستوس ەۆرەي بولعانىمەن مىسالى اعىلشىندار ءوز حريستوسىمەن اعىلشىنشا سويلەيدى، ەۆرەيشە ەمەس. سول سياقتى پولياكتار حريستوسپەن پولياكشا سويلەي بەرەدى، يسپاندار - يسپانشا، گۇرجىندەر - گۇرجىنشە. ۆەنگرلەر - ءوز تىلىندە. ياعني حريستوس ادامدى كەز كەلگەن تىلىندە تۇسىنە بەرەدى.
ال يسلامدا نەگە ادام اللامەن تەك ارابشا عانا سويلەۋ كەرەك؟ اللا سوندا ادامدى تەك ارابشا عانا تۇسىنەدى مە؟ ول مۇمكىن ەمەس! اللا ءتىپتى ادامنىڭ ويلارىن بىلەدى ەمەس پە؟
نەگە ءبىز "اللا اقبار" ورنىنا "ۇلى يا مەيىرىمدى اللا" دەپ ايتا المايمىز؟ جالپى، نەگە قۇراندا جازىلعان سۇرەلەردى قازاقشا وقىماسقا؟ سوندا ءمانى بارشا حالىققا ايقىن بولادى عوي؟ نەگە ماشاللانىڭ ورنىنا "قۇدايعا شۇكىر" دەپ ايتساڭ، ول دۇرىس ەمەس دەپ ەسەپتەلەدى؟ اۋىز اشار مەن يفتاردىڭ ايىرماسى نەدە؟ ماعىناسى ءبىر ەمەس پە؟ سوندا نەگە بۇنى قازاقشا ايتا بەرمەسكە؟
ماسەلە مىنادا. قازىرگى تاڭدا زامانۋي يسلاميزاتسيامەن پايدالانىپ كەيبىرەۋلەر قازاقتى شىن مانىندە ارابتاندىرۋعا شاقىرىپ وتىر. ون عاسىر بويى يسلامدا جۇرگەن قازاقتى يسلاممەن قايتا تانىستىرعىسى كەلەدى) سوندا ياسساۋي، بۋحار جىراۋ، بەكەت، ءماشhۇردى جوققا شىعارۋىمىز قاجەت پە؟ جوق ارينە.
ءبىز ورىستاندىرۋ ساياساتىنان ارەڭ امان قالىپ ەندى ارابتاندىرۋ ساياساتىنا باتىپ كەتپەۋىمىز ءجون. قازاقتار اللامەن قازاقشا سويلەسە دە اللا ءبىزدى ۇعادى دەپ سەنىمدىمىن، ويتكەنى اللا ادامدى كەز كەلگەن تىلدە تۇسىنەدى. اللا ءبىزدىڭ جۇرەكتەرىمىزدە. ال جۇرەگىمىز قازاق بولىپ قالا بەرۋ كەرەك.
مۇحتار تايجاننىڭ facebook پاراقشاسىنان
Abai.kz
