ءبىزدىڭ توپ سەناتورلار 1 قاراشادا ەلىمىزدىڭ ەكونوميكالىق الەۋەتى زور ءىرى يندۋستريالدى ايماعى – پاۆلودار وبلىسىنا جۇمىس بابىنداعى ساپارمەن بارعان بولاتىن. ايماقتىڭ تاريحى باي، تابيعاتى سۇلۋ، تاماشا ءداستۇرى بار ەكەنى بارشاعا بەلگىلى. ءبىز ءوز ەلى مەن ءىسىن جان-تانىمەن سۇيەتىن تاماشا جاندارمەن جۇزدەستىك. ءماسليحات دەپۋتاتتارىمەن، جۇرتشىلىق وكىلدەرىمەن مۇددەلىلىك تۇرعىسىندا بەيرەسمي سيپاتتاعى ەمەن-جارقىن اشىق اڭگىمە ورىستەدى. ورتالىق پەن وبلىس اراسىنداعى ءوزارا قارىم-قاتىناستى، ايماقتى ودان ءارى دامىتۋ جونىندەگى كوپتەگەن اسا ماڭىزدى ءارى اۋقىمدى ماسەلەلەر سەناتورلاردىڭ الدىنا قويىلدى. بىرقاتار تاقىرىپتاردى ارىپتەستەرىم دە، ءوزىم دە ءتۇرتىپ الدىق.

ءبىز ماسەلەلەردى جان-جاقتى تالداي وتىرىپ، تالقىعا سالىپ، سۇراقتارعا جاۋاپ تابۋدى جانە ولاردى شەشۋ جولدارىن انىقتاۋدى نيەت ەتتىك. كەيىنگى كەزدە ەلدى يندۋستريالاندىرۋ باعدارلاماسىنىڭ تيىمدىلىگىنە ۇدايى سىن ايتىلىپ كەلەدى. دەگەنمەن، قازىرگى زامانعى وندىرىستەردى، يننوۆاتسيالىق تەحنولوگيالاردى جانە جاڭا ماماندىقتاردى يگەرگەن ادامداردى ءوز كوزىڭمەن كورۋدىڭ ءجونى باسقا.

ءبىز «پاۆلودار» ارنايى ەكونوميكالىق ايماعىندا بولدىق، قوسپالى اليۋميني مەن ودان ءونىم جاسايتىن زاۋىتتىڭ جۇمىسىمەن تانىستىق. اۆتوموبيل دوڭگەلەكتەرىنە ارنالعان ديسكىلەر ەلىمىزدە دە، ودان تىس جەرلەردە دە سۇرانىسقا يە بولىپ وتىر. قازىرگى زامانعى تاماشا ءوندىرىس، الەۋەتى جوعارى. مۇمكىندىگى شەكتەۋلى ادامداردى زاۋىتقا قابىلداۋ جونىندەگى كاسىپورىن باسشىلىعىنىڭ بەلسەندى كادر ساياساتى قولداۋدى تالاپ ەتەدى. ولاردىڭ كوپشىلىگى ءوندىرىس وزاتتارى بولىپ وتىر. حيميا سالاسىنا باعىتتالعان ون كاسىپورىننىڭ ءونىم كولەمى دە كوڭىلگە قۋانىش ۇيالاتادى. ولاردىڭ قاتارىندا 30 مىڭ توننادان استام كاۋستيكالىق سودا، 240 توننا دەزينفەكتسيالاۋ قۇرالدارى، اۆتوكولىكتەرگە ارنالعان 28 مىڭ توننا مايلاۋ ماتەريالدارى، سونداي-اق 11 مىڭ توننا اگروحيميالىق ءونىم (گەربيتسيدتەر مەن پەستيتسيدتەر) ءوندىرىسى بار. ەلىمىزدە دە، شەتەلدە دە بۇل ونىمدەرگە دەگەن سۇرانىس ۇنەمى ءوسىپ كەلەدى.

ەلىمىزدىڭ يمپورتتارىن الماستىرۋ، ەكسپورتتىق الەۋەتىن ارتتىرۋ، ياعني ازاماتتارىمىزدىڭ ءال-اۋقاتىن ارتتىرۋ ماسەلەلەرى يندۋستريالاندىرۋ باعدارلاماسى ىسكە اسقاندا شەشىلەدى.

بارلىق كەزدەسۋلەرىمىز مازمۇندى ءارى پايدالى بولدى. سەناتورلار توبى جۇزدەسۋلەردى ۇيىمداستىرۋعا كومەكتەسكەنى ءۇشىن وبلىس اكىمى بولات باقاۋوۆقا العىس بىلدىرەدى. ءبىزدىڭ پاۆلودارعا ساپار باعدارلاماسىنىڭ ەرەكشە جانە ەڭ ماڭىزدى بولىگى – قازاقستان جاستارى كونگرەسى كۇندەرىنىڭ ءىس-شارالارى بولدى.

ءبىز «جاس ۇلان» بالالار قوزعالىسىنىڭ قاتارىنا باستاۋىش سىنىپ وقۋشىلارىن قابىلداۋ سالتاناتتى راسىمىنە، جاستار ەڭبەك جاساقتارىنىڭ XV «جاسىل ەل» ماۋسىمىنىڭ جابىلۋ راسىمىنە قاتىسىپ، ۇلتتىق ەرىكتىلەر جەلىسىنە قاتىسۋشىلاردىڭ جوبالار كورمەسىندە بولدىق.

ساپار سوڭىندا قازاقستان جاستارى كونگرەسىنىڭ پلەنارلىق وتىرىسى بولدى. «جاس ۇلان» بالالارىمەن جۇزدەسۋ زور اسەر قالدىردى. ولاردىڭ شىنايىلىعى مەن اشىقتىعى، وتانعا ادالدىعى جانە وعان قىزمەت ەتۋگە دايىندىعى ءبىزدى ريزا ەتتى. جاستاردىڭ وتانىمىزعا دەگەن رياسىز سەنىمى مەن ادالدىعىنا كۋا بولدىق. ونى ۇلكەندەرگە ۇلگى رەتىندە ۇسىنۋعا دا بولار ەدى.

جاستار. ستۋدەنتتىك جاساقتاردىڭ جاۋىنگەرلەرى. ەرىكتىلەر. جاستار ۇيىمدارىنىڭ بەلسەندىلەرى. ولار ءار الۋان، ءارى اشىق-جارقىن، بەلسەندى، ىزدەمپاز ءارى قىزىقتى. ءوز ەلىن سۇيەتىن، قوعام ءۇشىن پايدالى بولۋعا ۇمتىلعان اسىق جاندار. پاتريوتتىق بيىك سەزىمدى ءبىز ولاردان ۇيرەنۋىمىز كەرەك...

ساپار بارىسىنداعى جۇزدەسۋلەر اياسىنداعى جاستار كونگرەسىنىڭ اكتيۆىمەن اڭگىمە ەستە قالدى. كوپتەگەن بالالاردى ءوزىم دە ءبىراز ۋاقىتتان بەرى بىلەمىن، ولار مەنىڭ كوز الدىمدا ءوستى، وزدىگىنەن شەشىم قابىلدايتىن ءارى ءوزىن-ءوزى قامتاماسىز ەتەتىن ادامدارعا اينالدى. ولارمەن كەزدەسۋلەر، ولاردىڭ باستاعان ىستەرى مەن جەتىستىكتەرى اركەزدە قۋانىش سىيلايدى. كەڭ ءارى جارىق، كۇش-جىگەرى قايناعان جاستار تولعان زالدان: « – سىزدەر ءۇشىن قازاقستاندىق ارمان دەگەن نە؟»، - دەپ سۇرادىم. زالداعى جانارى ۇشقىن شاشقان بالالار ءبىر ساتكە ويلانىپ قالدى، شامالى ۋاقىتتان كەيىن قىزۋ اڭگىمەگە كۋا بولدىم. جەتكىنشەكتەر اۋەلى ءبىر-بىرىمەن، سودان كەيىن ميكروفون الىپ، ويلارىن بارشامەن بولىسە باستادى. جاستار ەڭ ماڭىزدى ماسەلەلەردى كوتەردى. بەيبىتشىلىك پەن كەلىسىم، ءبىر-بىرىنە قۇلاق اسۋ جانە ءتۇسىنۋ قاجەتتىگى، بەرىك وتباسىلىق قاتىناستار، قايىرىمدىلىق جانە ءوزارا كومەك تۋرالى اڭگىمە ورىستەدى. ەلىمىزدىڭ جانە مەملەكەتتىڭ بالالىق شاق پەن بالالار ۇيىمدارىنا باسقاشا نازار اۋدارۋدى قالايتىندارى تۋرالى ايتتى. بالالاردى ءسوز الۋعا ەشكىم ارنايى دايىنداعان جوق، ولار ويلارىن بيپازداپ دا جاتقان جوق، بىراق ولاردىڭ جوسپارسىز سوزدەرىندە شىنايىلىق پەن جالىن اتقان جاستىق جىگەر بولدى. ءبىزدىڭ اڭگىمەمىز ۇزاققا جالعاسۋى مۇمكىن ەدى، ويتكەنى كوپتەگەن جاستار ءوز پىكىرلەرىمەن بولىسكىسى كەلەدى. ءبىز قازاقستاندىق ارمان تۋرالى اڭگىمەنى جاقىن ارادا جالعاستىرۋعا كەلىستىك.

وسىناۋ قىسقا، بىراق وتە مازمۇندى ساپاردىڭ ناتيجەسىندە ەلىمىزگە، وتانىمىزعا شىن جۇرەكتەن سەنەتىن، ونىڭ تاماشا بولاشاعى تۋرالى ءبىزدىڭ سوزىمىزگە يلاناتىن جاس جىگىتتەر مەن قىزدار تۋرالى ويلارعا ەرىك بەردىم. ءبىز، اعا ۇرپاق، ولاردىڭ ۇمىتتەرى مەن سەنىمدەرىنە سەلكەۋ تۇسىرۋگە قۇقىمىز جوق. سونىمەن قاتار، ءبىز جاستارعا ءۇمىت ارتۋىمىز ءارى سەنۋىمىز كەرەك. ولار وعان لايىقتى.

قازاقستاندىق ارمان قانداي بولۋى كەرەك دەگەن وي بۇكىل قوعامعا كەڭىنەن قانات جايسا جاقسى بولار ەدى. ءبىزدى بىرىكتىرەتىن، جاڭا شىڭدارعا شاقىراتىن ارمان ءبىزدىڭ مەملەكەتىمىزدى، ورتاق ءۇيىمىزدى نىعايتادى.

داريعا نازارباەۆا،

سەنات سپيكەرى.

Abai.kz