لاتىن عارىپىنە كوشۋ كەرەك. وعان داۋ بار ما! لاتينيتسا كەلەر ۇرپاقتىڭ اعىلشىن ءتىلىن مەڭگەرۋىن جەڭىلدەتەدى. ال اعىلشىن ءتىلىنىڭ ارتىندا عىلىم تۇر. ورىس تىلىندە تابا الماعان عىلىمي جاڭالىقتاردى اعىلشىن قورىنان تاباسىڭ. كومپيۋتەرلىك تەحنولوگيالاردى مەڭگەرۋ ءۇشىن دە ىڭعايلى.

سوندىقتان لاتينيتسانىڭ قاجەت ەكەنىندە ءسوز جوق. بىراق، مەن لاتىن جازباسى قازاق ءتىلىن دامىتۋعا ىقپال ەتەدى دەگەن ۋاجبەن كەلىسە المايمىن. ول بوس ءسوز. ءارى-بەرىدەن سوڭ اراب عارىپىن پايدالانعان اباي مەن احمەتتەردىڭ، شاكءارىم مەن ماعجانداردىڭ قازاقىلىعى كىمنەن كەم ەدى؟ نەمەسە كيريلليتسامەن كوز اشقان، سول عارىپپەن انا ءتىلىن سويلەتكەن ءابىش پەن شەرحانداردىڭ، مۇقاعالي مەن فاريزالاردىڭ قازاقشاسى ناشار بولدى دەپ كىم ايتا الادى؟ مۇحتار اۋەزوۆ پەن ساكەندەر ءتىپتى ءۇش عارىپتە بىردەي جازعان. سودان وزەرىپ پا بولمىستارى؟

ءتىلدى ءتىل دارەجەسىنە كوتەرەتىن عارىپ ەمەس، ءسوز. ءسوز عانا ونىڭ بەلگىسى ءارى كورسەتكىشى. ءسوز جوق جەردە ءتىل دە جوق. سوندىقتان قازاق بولام دەگەن ادامعا، انا ءتىلىن قادىر تۇتام دەگەن پەندەگە ول ءتىلدى قاعاز بەتىنە قانداي بەلگىمەن تۇسىرگەنى ماڭىزدى ەمەس. تەك سول ءتىل ونىڭ ويى مەن سەزىمىن جەتكىزە السا بولعانى. ال ويدى جەتكىزۋ ءۇشىن ءتىل زامان تالابىنا ساي سوزبەن تولىسىپ، بايىپ وتىرۋى قاجەت. ءومىردىڭ بارلىق سالاسىندا، اكىمشىلىك باسقارۋدا، وندىرىستە، عىلىم مەن ونەردە ەكونوميكانىڭ ءار سالاسىندا ەركىن پايدالانۋعا بولاتىنداي بايۋى ءتيىس.

ال ءبىزدىڭ ءتىلىمىز بايىپ دامىماق تۇگىلى، بارعان سايىن جۇتاپ بارادى. ەسكى سوزدەر قولدانىستان شىعىپ جاتىر، ال جاڭا سوزدەر "شاپتىرعىش" پەن "قىلتيما" دەڭگەيىنەن اسا الار ەمەس. ءتىلدىڭ شۇبارلانىپ بارا جاتقانى دا سوندىقتان. قازىرگى تۇرمىس-تىرشىلىك تالاپتارىنا ساي ەمەس. قاناعاتتاندىرمايدى تۇتىنۋشىنى. ونى لاتينيتسا جوندەپ بەرەدى دەپ ويلاۋ اقىماقتىق.

يا، سانامىز بەن بويىمىزعا دەندەپ ەنىپ كەتكەن ورىس تىلىنەن الشاقتاتار ۋاقىت وتە كەلە. بىراق ءتىلدىڭ ءوزىن بايىتپاس. ونى حالىق ءوزى تۇگەندەپ وتىرادى، وي-ءورىسىنىڭ شاماسى كەلگەنشە. كۇندەلىكتى، ساعات، مينۋت سايىن ۇزدىكسىز، توقتاۋسىز تولىقتىرىلىپ وتىرعانى كەرەك. ءتىل دامۋى - ماڭگىلىك پروتسەسس. ولاي بولماعان جاعدايدا قازاق ءتىلى سول لاتىن ءتىلىنىڭ تاعدىرىن قايتالايدى، ءولى تىلگە اينالىپ. عارىپ بار، ال ءتىل جوق بولىپ. ءتىپتى عارىپ تە قالماس. لاتينيتسا قازاقتىكى ەمەس.

مۇحتار تۇمەنبايدىڭ facebook پاراقشاسىنان

Abai.kz