23 قاراشا كۇنى «اق جول» پارتياسىنىڭ ۇيىمداستىرۋىمەن تاراز قالاسىندا م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە «XXI عاسىرداعى الاشتىڭ اق جولى» جالپىۇلتتىق بايقاۋىنىڭ ەكىنشى كەزەڭى ءوتتى. شاراعا الاشتانۋشى عالىمدار، «اق جول» پارتياسىنىڭ وكىلدەرى، جوعارى وقۋ ورىندارىنىڭ وقىتۋشىلارى مەن ستۋدەنتتەرى، باق وكىلدەرى قاتىستى.

بايقاۋدى «اق جول» پارتياسى توراعاسىنىڭ كەڭەسشىسى امانتاي ءشارىپ العىسوزىمەن اشىپ، الاشتانۋشى عالىم قايىربەك كەمەڭگەر قاتىسۋشىلارعا ساتتىلىك تىلەدى.

بايقاۋدىڭ باستى ماقساتى - الاش قوزعالىسىنىڭ ساياسي تاجىريبەسىن، ەكونوميكالىق ۇستانىمىن جانە رۋحاني مۇراسىن قازىرگى قازاقستان قوعامىن جاڭعىرتۋ كونتەكسىندە زەردەلەۋ مەن ناسيحاتتاۋ بولىپ تابىلادى. «الاش قايراتكەرلەرىنىڭ مەملەكەتتىلىك تۋرالى يدەيالارىنىڭ قازىرگى قازاقستان قوعامى ءۇشىن وزەكتىلىگى مەن ماڭىزدىلىعى»، «الاش ۇستانىمى جانە بۇگىنگى ۇلتتىق ەكونوميكا مەن الەۋمەتتىك سالانى جەتىلدىرۋ ماسەلەلەرى» جانە «ۇلى دالا جەتىستىكتەرىن زەردەلەۋدەگى الاشتىڭ رۋحاني مۇراسىنىڭ ورنى» تاقىرىپتارىمەن 3 نوميناتسيا بويىنشا  قازاقستاننىڭ ءار ايماعىنان 27 قاتىسۋشى باق سىنادى. 

ءادىل قازىلار القاسىنىڭ تاڭداۋىمەن «الاش قايراتكەرلەرىنىڭ مەملەكەتتىلىك تۋرالى يدەيالارىنىڭ قازىرگى قازاقستان قوعامى ءۇشىن وزەكتىلىگى مەن ماڭىزدىلىعى» نوميناتسياسى بويىنشا كوكشەتاۋ قالاسىنان ۋاليەۆ تالاپكەر اسقارۇلى، تۇركىستاندىق سانسىزباي جادىرا مىرزابايقىزى، اتىراۋدان تۇرجانوۆا سايراگۇل ساماتقىزى، تالدىقورعان قالاسىنان اينۇر تولەۋ جانە تاراز قالاسىنىڭ تۇرعىنى راحات توبادجانوۆ ارنايى ماراپاتتالدى.

«الاش ۇستانىمى جانە بۇگىنگى ۇلتتىق ەكونوميكا مەن الەۋمەتتىك سالانى جەتىلدىرۋ ماسەلەلەرى» نوميناتسياسى بويىنشا قاراعاندى قالاسىنان رىمقۇلوۆا ايكۇمىس داۋرەنبەكقىزى، اقتاۋدان يداەۆ جالعاس ەركىنبەكۇلى، كەنجەبەك سەرجانۇلى، پاۆلودارلىق شاراپات ءتاتىش تە ۇزدىكتەر قاتارىنان كورىندى. 

سونداي-اق، «ۇلى دالا جەتىستىكتەرىن زەردەلەۋدەگى الاشتىڭ رۋحاني مۇراسىنىڭ ورنى» نوميناتسياسى اياسىندا تاراز قالاسىنان تالاپ شىمىرباەۆ، گۇلنۇر بەكباي، ورال قالاسىنان دينارا سيسەنوۆا، اقتاۋدان مۇستافا شوحاەۆ جانە قاراعاندىلىق گۇلدەن امانگەلدىقىزى ۇزدىك دەپ تانىلدى. 

سونىمەن بىرگە، الماتى قالاسىنان دۇيسەنبەكوۆ ەركەبۇلان باقىتجانۇلى، ابەۋ باعلان مۇقامبەتقاليۇلى، سارسەن باشەمباەۆ، ايگۇل وتەمىس، رامازان ءابىلدوس، سەمەي قالاسىنان نۇرجانوۆا ايگەرىم نۇرجانقىزى، قاراعاندى قالاسىنان تۇتقىش ايدانا جاڭبىربايقىزى، جانگەلدى توقتامۇراتوۆ، شىمكەنت قالاسىنان رايگۇل حازىرەتالىقىزى جانە نۇر-سۇلتان قالاسىنان تەمىرلان قانات اقتىق مارەگە جولداما الدى. 

ايتا كەتەرلىگى بۇل بايقاۋ ءداستۇرلى تۇردە 8 ءشى رەت ۇيىمداستىرىلىپ وتىر. بۇعان دەيىن سەمەي، الماتى، قوستاناي، قاراعاندى، اقتوبە قالالارىندا وتكىزىلگەن.  

اقتىق مارە جەلتوقسان ايىندا نۇر-سۇلتان قالاسىندا وتەتىن بولادى. 

Abai.kz