سارسەنبى, 28 قازان 2020
COVID-19 قازاقستاندا. جۇقتىرعاندار — 110832. جازىلعاندار — 105883. قايتىس بولعاندار — 1825
ساڭلاق 4191 0 پىكىر 3 جەلتوقسان, 2019 ساعات 06:53

مەسسي التىنشى رەت «التىن دوپ» جۇلدەسىن جەڭىپ الدى

فرانتسيا استاناسى پاريجدە ءداستۇرلى «التىن دوپ» جۇلدەسىن تابىستاۋ ءراسىمى ءوتتى. بيىل بۇل اتاقتى ارگەنتينا قۇراماسى مەن «بارسەلونا» شابۋىلشىسى ليونەل مەسسي يەلەندى.

France Football جۋرنالى تابىستايتىن مارتەبەلى سىيلىق يەگەرىن الەمدەگى 176 ەلدىڭ سپورت جۋرناليستەرى داۋىس بەرۋ ارقىلى انىقتادى. ەڭ كوپ داۋىسقا يە بولعان (686) لەو مەسسي مانسابىندا التىنشى رەت بۇل جەتىستىك شىڭىن باعىندىرىپ وتىر.

ال وسى جۇلدەگە بۇعان دەيىن بەس مارتە قول جەتكىزگەن پورتۋگاليالىق كريشتيانۋ رونالدۋ (476) بيىل ءۇشىنشى ساتىعا جايعاستى. داۋىس بەرۋ قورىتىندىسىندا ەكىنشى ورىندى گوللانديالىق قورعاۋشى ۆيردجيل ۆان دەيك (679) الدى.

ايتا كەتەيىك، بۇل ماراپات فۋتبول الەمىندە سوڭعى ءبىر جىلدا تولاعاي تابىسقا جەتكەن سپورتشىعا بەرىلەدى. اتالعان جۇلدەنى 2008-2018 جىلدارى ون جىل بويى كريشتيانۋ رونالدۋ مەن ليونەل مەسسي ەشكىمگە بەرمەي جۇرگەن. قوس ۇزدىك الادوپ الەمىنىڭ باس بايگەسىن بەس رەتتەن قول جەتكىزگەن.

الايدا بىلتىر سول ءۇردىستى 33 جاستاعى حورۆات لۋكا مودريچ بۇزعان بولاتىن. ال بيىل مەسسي «التىن دوپقا» التىنشى مارتە قول جەتكىزىپ، رونالدۋدان وزىپ كەتتى.

Abai.kz

0 پىكىر