2012 جىلى قازاقستاننىڭ حالىق جازۋشىسى ءازىلحان نۇرشايىقوۆتىڭ 90 جىلدىق مەرەيتويىنا وراي ونىڭ شىعارماشىلىعىمەن بايلانىستى ۇزدىك پروزالىق، پوەزيالىق شىعارمالارعا جىل سايىن بايقاۋ ۇيىمداستىرىپ وتىرۋ ۇيعارىلدى. العاشقى بايقاۋعا الماتى قالاسىنىڭ ماگيسترانتتارى، ستۋدەنتتەرى جانە جوعارى سىنىپ وقۋشىلارى قاتىستى.

2013 جىلى قالامگەردىڭ وتباسى بايقاۋ جەڭىمپازدارىنا حالىق جازۋشىسى اتىنداعى ستيپەنديا تاعايىنداۋدى ۇسىندى. ءال-فارابي اتىنداعى قازۇۋ جوو دەيىنگى ءبىلىم بەرۋ فاكۋلتەتىنىڭ عىلىمي كەڭەسىنىڭ شەشىمىمەن اتالعان ستيپەنديا تاعايىندالدى. «ادام جانە الەم»  بايقاۋى رەسمي دەڭگەيگە جەتكىزىلىپ، جىل سايىن شەتەلدىكتەردىڭ تىلدىك جانە جالپى ءبىلىم بەرۋ دايىندىعى كافەدراسى وقىتۋشىلارىنىڭ ۇيىمداستىرۋىمەن وتكىزىلىپ ءجۇر.

2019 جىلدىڭ 29 قاراشاسىندا سەگىزىنشى بايقاۋ وتكىزىلدى. عالامتور ارقىلى جاريالاناتىن بۇل بايقاۋعا ەلىمىزدىڭ جوعارى وقۋ ورىندارىنان عانا ەمەس، اۋىل-اۋىلدان تىلەك بىلدىرگەن جوعارى سىنىپ وقۋشىلارى دا قاتىسا الادى. وتكەن عاسىردىڭ ورتاسىندا استانادان الىس ورنالاسقان ەلىمىزدىڭ ءبىر اۋىلىنان ءجاسوسپىرىم ءازىلحان ورتالىق گازەتتەرگە ءوز ولەڭدەرىن ۇلكەن ۇمىتپەن قالاي جولداسا، قازىر دە جاس جەتكىنشەكتەر ءوز شىعارمالارىن سونداي ۇمىتپەن وسى بايقاۋعا عالامتور ارقىلى جىبەرىپ وتىرادى.

2016 جىلى قر ۇلتتىق كىتاپحاناسىندا حاالىق جازۋشىسى ءا. نۇرشايىقوۆقا ارنالعان مەموريالدى كابينەت اشىلدى. وسىعان بايلانىستى جىل سايىن بولاتىن شىعارماشىلىق بايقاۋدىڭ قورىتىندىسىن وسى ءبىلىم ورداسىندا وتكىزۋگە ۇسىنىس جاسالدى. سودان بەرى 4 جىل قاتارىنان قر ۇلتتىق كىتاپحاناسىنىڭ كىتاپحاناتانۋ زالىندا بايقاۋ جۇلدەگەرلەرى ماراپاتتالىپ، شاعىن پوەزيالىق شىعارماشىلىق كەش وتكىزىلىپ كەلەدى.

بۇل بايقاۋدىڭ تۇپكى ماقساتى جاستارعا – ادەبي شىعارما، كىتاپ وقىتۋ. بايقاۋ ارقىلى جاستاردى ادەبيەتكە، ونەرگە، ادەمىلىككە باۋلۋ، ءتىلىن قۇرمەتتەۋ، سول ارقىلى ەلىن قۇرمەتتەۋ سياقتى ۇلى سەزىمدەردى بويلارىنا ءسىڭىرۋ. ونەردىڭ قاي ءتۇرى بولماسىن ۇلكەن شىعارماشىلىق ىزدەنىستى تالاپ ەتەدى. بايقاۋ جازۋشى ءازىلحان نۇرشايىقوۆ اتىنداعى ستيپەنديا تاعايىنداۋعا ارنالعاندىقتان جەتى جىل وتكىزىلگەن پروزالىق، پوەزيالىق بايقاۋدىڭ بيىل، 2019 جىلى، شارتىن وزگەرتىپ ءسوز شەبەرلىگىنەن بولەك سۋرەت ونەرىنە ارناۋ ۇيعارىلدى.

بيىلعى بايقاۋ-2019-عا ءا. نۇرشايىقوۆتىڭ «ماحاببات، قىزىق مول جىلدار» رومانىنان تاڭداپ الىنعان قىسقاشا ۇزىندىگە يلليۋستراتسيا رەتىندە ءتۇرلى تەحنيكامەن ورىندالعان ء(ارتۇرلى بوياۋلارمەن: اكۆارەلمەن، مايلى بوياۋمەن، پاستەلمەن) فوتوسۋرەتتەر مەن كوركەم سۋرەتتەر قابىلداندى. بايقاۋدىڭ شارتى بويىنشا جىبەرىلگەن جۇمىستار اتالعان روماننان قاتىسۋشى ءوزى تاڭداپ العان (قازاق تىلىندە، ورىس تىلىندە) قىسقاشا ۇزىندىمەن سايكەس ورىندالۋى ءتيىس بولدى.  سونداي-اق بايقاۋعا قاتىساتىن سۋرەتتىڭ يدەياسى مەن كوتەرگەن ماسەلەسى «ماحاببات، قىزىق مول جىلدار» رومانىنان الىنعان ءۇزىندى ماتىنىنە ساي بولىپ، ونىڭ تەرەڭ مازمۇنىن بەرە الۋىمەن قاتار، جۇمىستىڭ ورىندالۋ (تەحنيكالىق) شەبەرلىگىنە دە جوعارى تالاپ قويىلدى.

جۇمىستار پوشتا جانە ەلەكتروندى پوشتا ارقىلى قابىلداندى. الماتى قالاسى بويىنشا قاتىسۋشىلار جۇمىستارىن ۋنيۆەرسيتەتتىڭ كافەدراسىنا اكەلىپ تاپسىردى.

بايقاۋدى ۇيىمداستىرۋشىلار، ارينە، وزدەرىن سۋرەت ونەرىنىڭ مايتالمانى رەتىندە سانامايدى. الايدا دارىندى ادام قولىنان شىققان ونەر تۋىندىسى كەز كەلگەن ادامنىڭ ىشكى سەزىمىنە قوزعاۋ سالارى حاق. بايقاۋ جاريالانعان روماندى وقىعان ادام ونداعى كەيىپكەرلەردىڭ وبرازىن ءتۇسىنىپ، ولاردىڭ قۋانىش، قايعىسىنا ورتاقتاسىپ، ءوز باسىنان كەشكەندەي كۇيدە بولا بىلسە، سۋرەت سالۋشىنىڭ دا سول اسەردى قانشالىقتى جەتكىزە بىلگەنىن باعالاي الاتىندارىنا سەنىمدى.

بيىلعى بايقاۋعا بارلىعى الماتى، نۇر-سۇلتان، سەمەي قالالارىنىڭ  9 وقۋ ورنىنان 21 سايىسكەر  قاتىستى.

بايقاۋ-2019-عا كەلىپ تۇسكەن جۇمىستاردىڭ ساراپتاماسىن ءال-فارابي اتىنداعى قازۇۋ-دىڭ الدىڭعى قاتارلى پروفەسسورلارى مەن وقىتۋشىلارى جاسادى. ال بايقاۋدىڭ دەمەۋشىلەرى – قالامگەردىڭ وتباسى. ساراپتاما بايقاۋدىڭ قويعان شارتتارى بويىنشا جۇزەگە استى. بايقاۋ قورىتىندىسى بويىنشا، ءۇش جۇلدەلى ورىن، «ۇزدىك جۇمىس» نوميناتسياسى بويىنشا 5 ىنتالاندىرۋ سىيلىعى تاعايىندالدى.

1-ورىن ديپلوم جانە 50 000 تەڭگە اقشالاي سىيلىق - ت.جۇرگەنەۆ اتىنداعى قازاق ۇلتتىق ونەر اكادەمياسى كەسكىندەمە ءمۇسىن جانە ديزاين فاكۋلتەتىنىڭ 1 كۋرس ستۋدەنتى  وركەن ايات  «بىراق ...» اتتى سۋرەتىمەن;

2-ورىن ديپلوم جانە 40 000 تەڭگە اقشالاي سىيلىق – ت.جۇرگەنەۆ اتىنداعى قازاق ۇلتتىق ونەر اكادەمياسى كەسكىندەمە ءمۇسىن جانە ديزاين فاكۋلتەتىنىڭ 1 كۋرس ستۋدەنتى  جاحانشا ءاليحان «ءسات» اتتى سۋرەتىمەن;

3-ورىن ديپلوم جانە 30 000 تەڭگە اقشالاي سىيلىق – س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ساۋلەت جانە ديزاين فاكۋلتەتىنىڭ 1 كۋرس ستۋدەنتى  جايلاۋباي ايسانا ايدىنقىزى «قىزىل كورپە» اتتى سۋرەتىمەن جەڭىپ الدى.

جۇلدە العان تۋىندىلار

ونالباەۆا اراي اسكارقىزى - حالىقارالىق ءبىلىم بەرۋ كورپوراتسياسى قازاق باس ساۋلەت-قۇرىلىس اكادەمياسى،  ديزاين فاكۋلتەتى، 2 كۋرس ستۋدەنتى «حات» اتتى كومپوزيتسياسىمەن سەرتيفيكات جانە 10 000 تەڭگە اقشالاي سىيلىققا يە بولدى.

مومبەك اينۇر اديلجانقىزى - ءال-فارابي اتىنداعى قازۇۋ، فيلولوگيا جانە الەم تىلدەرى فاكۋلتەتىنىڭ ماگيسترانتى «مەڭتاي مەن ەربولدىڭ كەزدەسۋى» ەڭبەگىمەن سەرتيفيكات جانە 10 000 تەڭگە اقشالاي سىيلىققا يە بولدى.

دۋمان مادينا - الماتى وبلىسى، ا.ن. بۋبەنتسوۆ اتىنداعى ورتا مەكتەپ وقۋشىسى «ورىندالعان ارمان» جۇمىسىمەن سەرتيفيكات جانە 10 000 تەڭگە اقشالاي سىيلىققا يە بولدى.

گىمىڭگەلدى ىنتىماق جانە تۇنىق عيبرات - ءال-فارابي اتىنداعى قازۇۋ جوو دەيىنگى ءبىلىم بەرۋ فاكۋلتەتىنىڭ تىڭداۋشىلارى سەرتيفيكات جانە 5 000 تەڭگە اقشالاي سىيلىققا يە بولدى.

قر ۇلتتىق كىتاپحاناسىندا وتكىزىلگەن بايقاۋ قورىتىندىسىندا قاتىسۋشىلار روماندى وقۋ بارىسىندا قانداي اسەر الىپ، ونى ءوز جۇمىستارىندا قالاي بەينەلەگەنىن ءتۇسىندىرىپ، ءوز تۋىندىلارىنىڭ يدەياسىمەن ءبولىستى.

شارا سوڭىندا ستيپەنديانى تاعايىنداۋشىلار قوناقتارعا شاعىن داستارقان ازىرلەپ، ءازىلحان نۇرشايىقوۆتىڭ شىعارمالارى جونىندە وي ءبولىسىپ، بايقاۋ تۋرالى، ونەر تۋرالى پىكىر الماسىپ تاراستى.

نۇرشايىقوۆا ج.ءا.، مۇساەۆا گ.ءا.، سادەنوۆا ا.ە.

ءال - فارابي اتىنداعى قازۇۋ، جوعارى وقۋ ورنىنا دەيىنگى ءبىلىم بەرۋ فاكۋلتەتى. شەتەلدىكتەردىڭ تىلدىك جانە جالپى ءبىلىم بەرۋ دايىندىعى كافەدراسىنىڭ وقىتۋشىلارى

Abai.kz