كەيبىر نەگىزگى تۇزەتۋلەر مىنالار:

- 2021 جىلدىڭ 1 قىركۇيەگىنەن باستاپ، ورتا ءبىلىم مەكەمەلەرىندەگى پەداگوگتاردىڭ نورماتيۆتىك وقۋ جۇكتەمەسىن 18 ساعاتتان 16 ساعاتقا تومەندەتۋ جونىندە نورما بەكىتىلدى;

- حالىقارالىق وليمپيادا، ءتۇرلى بايقاۋ جانە سپورت جارىستارىنىڭ جەڭىمپازىن ازىرلەگەن مۇعالىمگە ءۇش ەڭبەكاقى مولشەرىندە سىياقى بەرۋ قاراستىرىلعان;

- اۋىلدىق جەرلەردە تۇراتىن مۇعالىمدەرگە جەر تەلىمىن الۋدا باسىمدىق بەرۋ;

- جوو-دان باسقا ءبىلىم بەرۋ مەكەمەلەرىندەگى مۇعالىمدەردى اسكەرگە شاقىرۋدى كەيىنگە قالدىرۋ كوزدەلگەن.

ءبىلىم جانە عىلىم ۆيتسە-ءمينيسترى بيبىگۇل اسىلوۆانىڭ ايتۋىنشا، مۇعالىمدەردى قىزمەتىنە قاتىسى جوق شارالاردى اتقارۋعا مىندەتتەۋ ايىپپۇلمەن جازالانادى. سايلاۋدى وتكىزۋ شارالارىنا قاتىسقان مۇعالىمدەر جۇمىستان بوساتىلىپ، ولارعا سول ءۇشىن قوسىمشا قارجى تولەنەدى. بۇل قارجى ورتالىق سايلاۋ كوميتەتىنىڭ بيۋدجەتىنەن قاراستىرىلادى. بيبىگۇل اسىلوۆانىڭ ايتۋىنشا، بىراق سايلاۋدى وتكىزۋ شاراسىنا قاتىسۋ-قاتىسپاۋ - ءار مۇعالىمنىڭ ءوز ەركى.

زاڭ جوباسى اۆتورلارىنىڭ ايتۋىنشا، جوبانىڭ ماقساتى - ء"بىلىم بەرۋ زاڭناماسىندا ولقىلىقتاردى جويۋ، وقۋشى مەن مۇعالىمنىڭ جۇكتەمەسىن ازايتۋ، مۇعالىمدەردى نەگىزسىز تەكسەرۋلەردەن قورعاۋ، پەداگوگ مارتەبەسىن رەتتەۋدى قامتاماسىز ەتەتىن قۇقىقتىق تەتىكتەردى جەتىلدىرۋ".

قازاقستاندا مۇعالىمدەر مىندەتىنەن تىس جۇمىسقا جەگىلەتىندەرىن، ديرەكتورلار مەملەكەتتىك گازەتتەرگە قيناپجازدىراتىنىن ايتىپ، ءجيى شاعىمدانادى. 2017 جىلى ەلدەگى مۇعالىمدەر استاناداعى ەكسپو كورمەسىنە كۇشتەپ بيلەت العاندارىن جەتكىزگەن.

قازاقستاندى 30 جىل باسقارىپ، بيىل پرەزيدەنتتىكتەن كەتكەن نۇرسۇلتان نازارباەۆ تا بۇعان دەيىن بىرنەشە رەت "جەرگىلىكتى بيلىكتىڭ بارلىق جۇمىستى مۇعالىمدەر موينىنا ارتىپ قوياتىنىن" سىناعان.​ پارلامەنتتە دە دەپۋتاتتار بۇل ماسەلەنى كوتەرگەن. بىراق مۇعالىمدەر ءالى كۇنگە دەيىن ەركىنەن تىس جۇمىسقا جەگىلەدى.

بيىل ماۋسىمدا ۇكىمەت "پەداگوگ مارتەبەسى، مۇعالىم مەن وقۋشىعا جۇكتەمەنى تومەندەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنقوعامدىق تالقىعا شىعارعان.

Abai.kz