ساعات تاڭعى 08:00. اقش. نيۋ-يورك قالاسى.
وسىلايشا ديماشتىڭ امەريكاداعى كونتسەرتى اياقتالدى.

ال مەن بۇگىن ۇيقىدان مۇلدەم باسقا ادام بولىپ وياندىم. ومىرىمدە ءبىرىنءشى رەت مەن ءوزىمنىڭ قازاق دەگەن حالىقتىڭ قىزى ەكەندىگىمدى ماقتان تۇتىپ، كەۋدەم تولا قۋانىشپەن وياندىم. جۇرەگىم "مەن قازاقپىن!" دەپ دۇرسىلدەپ وياندى.
بىراق تا، وسى سەزىممەن الەمنىڭ ەڭ الىپ، ەڭ كەرەمەت قالالارىنىڭ بىرىندە بولا وتىرىپ، بۇگىن ءوز ەلىمدى قاتتى ساعىندىم.

شىنىمدى ايتسام، وسىعان دەيىن جەر كولەمى بويىنشا 9-شى ورىنداعى، جەر استى پايدالى قازبالارعا وتە باي، تاريحى دا، تاعىلىمى دا مول بولسا-داعى مەنىڭ وسىنداي ەلىمدى ەشكىم بىلمەيتىنىنەن، مەندە ازىراق بولسا دا ءوزىمدى كەمشىن ۇلتتىڭ قىزىنداي تومەن سەزىنۋ، ءوز-وزىمە سەنبەۋدىڭ ءبىر ءتۇرى بار ەدى، ونى جاسىرىپ قايتەم؟

مەن وسى ۇلتتىڭ وسكەلەڭ ۇرپاعى ەكەندىگىمە ۇيالاتىنمىن دا.
ءبىزدى مەيلى، ەرەسەكتەرىمىزدىڭ ءوزى بۇرىنعى حالىق اندەرىن بىلمەيتىنى جانە تىڭدامايتىنى ءۇشىن مەن بۇگىن ءبىرىنشى رەت قاتتى ۇيالدىم. ۇلكەندەرگە كەرەك ەمەس دۇنيە، بىزگە نە ءۇشىن كەرەك دەيتىنبىز. بەكەر ەكەنىن سەزىندىم...

كەشە تۇندە ءبىز، قازاقتاردىڭ وزدەرى قازاقتىڭ ۇلتتىق قۇندىلىقتارىن قانشالىقتى باعالامايتىنىمىزدى انىق ءتۇسىندىم. جۇرەگىم اۋىردى... جىلادىم....

كەشە وسىناۋ الىپ ەل - امەريكادا 15 مىڭنان استام ادام ديماشپەن بىرگە حالىق ءانى دايديداۋدى قوسىلا شىرقاعان كەزدە... مەن جۇرەگىم جارىلا جىلادىم!

كونتسەرت اياقتالعاننان كەيىن، ارتىما قاراسام، ءاربىر ءۇشىنشى قوناقتىڭ قولىندا مەنىڭ ەلىمنىڭ كوك تۋى جەلبىرەپ كەتىپ بارادى.
قانداي ماقتانىش دەسەڭىزشى؟!

بۇل كەشتە ماعان ءتىپتى تۋىمنىڭ ءتۇسى دە مۇلدەم باسقاشا ىستىق قابىلداندى.
نيۋ-يوركتە كورگەنىمدەرىمنىڭ ءبارىن تىلمەن ايتىپ جەتكىزە المايمىن!
ديماش مەنىڭ ويىمدى تۇبەگەيلى وزگەرتتى. مەنىڭ رۋحىمدى وياتتى.
تۇڭعىش رەت قازاق ەكەنىمە قاتتى قۋاندىم. كونتسەرتتەن كەيىن، ديماش ءوزىنىڭ ءدال وسىنى بالا كەزىنەن ارمانداعانىن ايتتى. امەريكا تۋرالى ەمەس، امەريكادا ءان سالۋدى دا ەمەس، امەريكاعا ءتىپتى بۇكىل الەمگە وزىمەن قوسىلىپ قازاقتىڭ حالىق اندەرىن جاتقا ايتقىزسام دەپ ارمانداعانىن ايتتى. جانە ول مۇنى جاسادى.

كەشەگى "Barclays Arena"-دا بولعان وقيعا ءبىزدىڭ تاريحىمىزدا قالادى. مەن وعان سەنەمىن.

قازاقستاندىق جاس ءانشى الەم جۇلدىزدارى جينالعان اۋديتوريانى جيناپ، امەريكاندىق مىڭداعان كورەرمەندى قازاقتىڭ حالىق اندەرىن شىرقاتىپ، دومبىرانىڭ ۇنىنە جىلاتتى.

جاسا، ديماش!
جاسا، قازاق ەلى!

نازىم جانعازينوۆانىڭ الەۋمەتتىك جەلىدەگى پاراقشاسىنان

Abai.kz