سۋديا ەلميرا اسۋباەۆا قايشا اقاندى كىنالى دەپ تانىپ، التى اي شارتتى جازاعا كەسىپ، پروباتسيالىق باقىلاۋ تاعايىندادى. سوت اقاندى قىتايعا قايتارماي قازاقستاندا قالدىردى.

سۋديا ۇكىم شىعارعاندا اقاننىڭ قازاقستان ازاماتىنا تۇرمىسقا شىققانىن، پانا ىزدەۋشى كۋالىگى بارىن، بوسقىن مارتەبەسىن سۇراعانىن، ەتنيكالىق قازاق رەتىندە قازاقستان ازاماتىن الۋعا باسىم قۇقىعى بارىن، قىتايدا ەشقانداي قىلمىس جاساماعانىن، قىتايدان قازاقستانعا بىرنەشە رەت وتە الماعانىن ەسكەرگەنىن جەتكىزدى.

سۋديا اسۋباەۆا قايشا اقاننىڭ قىلمىسىنا شىن وكىنەتىنىن، ءىسىن مويىنداعانىن ەسكەرە وتىرىپ، شارتتى جازاعا كەسكەنىن ايتتى.

ءجارىسسوز كەزىندە پروكۋرور ارزىگۇل يمياروۆا سۋديادان شىڭجاڭ قازاعىن قىتايعا قايتارماۋدى، التى اي پروباتسيالىق باقىلاۋ تاعايىنداۋدى سۇراعان. قايشا اقاننىڭ ءوزى دە سوتتان قىتايعا قايتارماۋدى جانە باس بوستاندىعىنان ايىرماۋدى وتىنگەن.

قايشا اقاننىڭ ۇستىنەن قىلمىستىق كودەكستىڭ "شەكارانى زاڭسىز كەسىپ ءوتۋ" (392-باپ) بويىنشا ءىس قوزعالعان. بۇل باپ بويىنشا، "شەكارا بۇزعان ادامنىڭ" ايىبى دالەلدەنسە، ءبىر جىل باس بوستاندىعىنان ايىرىلىپ، ارتىنشا كەلگەن ەلىنە قايتارىلادى.

43 جاستاعى قايشا اقان 12 قاراشاداعى سوت وتىرىسىندا "شەكارانى زاڭسىز كەسىپ وتكەنىن مويىنداعان". ول بۇل قادامعا "قىتايداعى قىسىمنان قاۋىپتەنىپ بارعانىن" ايتادى. سوزىنشە، قازاقستان شەكاراسىنان 2018 جىلدىڭ 7 مامىرىندا قورعاس كەدەن بەكەتىنەن ساۋداگەر ايەلدەرمەن ىلەسە وتكەن. قايشا اقان قاراشاداعى سوت وتىرىسىندا قازاقستاننان پانا سۇراعان.

ول 2019 جىلى تامىزدا ۇلتتىق قاۋىپسىزدىك كوميتەتىنە ارىز جازىپ، شەكارادان زاڭسىز وتكەنى جايلى حابارلاعان. ارتىنشا ۇقك اقاننىڭ ۇستىنەن قىلمىستىق ءىس قوزعاعان. شەكارانى زاڭسىز كەسىپ وتكەن ۋاقىتتان ۇقك-عا بارعانعا دەيىن ونى "ەشكىم ىزدەمەگەن".

قايشا اقان – قازاق قىتاي شەكاراسىن كەسىپ ءوتىپ، جاۋاپقا تارتىلعان العاشقى قازاق ەمەس. 2018 جىلى تامىزدا "قازاقستان شەكاراسىنان زاڭسىز ءوتتى" دەگەن ايىپپەن قىتاي قازاعى سايراگۇل ساۋىتبايدىڭ ۇستىنەن سوت پروتسەسى جۇرگەن. قوعام نازارىن اۋدارعان سوت شەشىمىمەن سايراگۇل ساۋىتباي شارتتى جازامەن بوستاندىققا شىققان.كەيىن ول قازاقستاننان بوسقىن مارتەبەسىن الا الماي، شۆەتسياعا كەتكەن.

بۇعان دەيىن قىتايدىڭ شىڭجاڭ ولكەسىندە تۇراتىن ەتنيكالىق قازاقتار قاستەر مۇساحانۇلى مەن مۇراگەر ءالىمۇلى شەكارا بۇزىپ، قازاقستانعا وتكەن. ولار دا "شىڭجاڭداعى قىسىمنان قاشىپ كەلگەندەرىن" ايتقان. قازىر مۇساحانۇلى مەن ءالىمۇلىنىڭ ۇستىنەن تەرگەۋ ءجۇرىپ جاتىر.

بۇدان بولەك، جاقىندا "قىتايدان قاشتىم" دەگەن تاعى ءبىر قازاق باعاشار مالىكۇلى قازاقستاننان بوسقىن مارتەبەسىن سۇراعان.

Abai.kz