بۇگىن، 8 جەلتوقسان الماتى قالاسىندا بالۋان شولاق اتىنداعى سپورت سارايىندا كونفەدەراتسيا كۋبوگىنىڭ فينالى ءوز مارەسىنە جەتتى. بوكس، دزيۋدو، گرەك-ريم جانە ەركىن كۇرەس، قازاق كۇرەسى، تاەكۆوندو جانە كاراتە بويىنشا 17 كوماندا ىشىنەن ەڭ ۇزدىگى انىقتالدى.

بوكستان فينالدا نۇر-سۇلتان قالاسىنىڭ كومانداسى مەن تۇركىستان وبلىسىنىڭ كومانداسى كەزدەستى. ناتيجەسىندە وڭتۇستىك وڭىردەن كەلگەن بىلعارى قولعاپ شەبەرلەرى ەلوردالىق كوماندانى 5:3 ەسەبىمەن جەڭدى.

گرەك-ريم كۇرەسىنىڭ شەبەرلەرى اراسىنداعى فينال وتە تارتىستى ءوتتى. كونفەدەراتسيا كۋبوگىنىڭ ءۇش دۇركىن چەمپيونى الماتى وبلىسىنىڭ كومانداسى اقتىق سىندا شىمكەنتتىك بالۋاندارعا جول بەردى. ەسەپ تەڭ بولعانىمەن ۇپاي سانى بويىنشا شىمكەنتتىكتەر العا شىعىپ، 2019 جىلعى كونفەدەراتسيا كۋبوگىنىڭ چەمپمونى اتاندى.

كونفەدەراتسيا كۋبوگىنە 2019 جىلى كاراتە سپورتى قوسىلدى. كاراتە بويىنشا فينالدا ماڭعىستاۋ وبلىسىنىڭ قۇراماسى مەن الماتى قالاسىنىڭ كومانداسى كەزدەستى. الماتىلىقتار 3:2 ەسەبىمەن قارسىلاستارىنان باسىم ءتۇسىپ، كونفەدەراتسيا كۋبوگىن يەلەندى.

جەكپە-جەك سپورت تۇرلەرى اراسىندا وتكەن بايراقتى باسەكەدە ۇلتتىق سپورت -قازاق كۇرەسى دە قالىس قالمادى. الماتىلىق "Qazaq kuresi" كلۋبى مەن سولتۇستىك قازاقستاندىق "قىزىلجار ارلاندارى" اراسىنداعى بەلدەسۋ "قىزىلجار ارلاندارىنىڭ" ەنشىسىنە شەشىلدى. ولار قارسىلاستارىن 4:0 ەسەبىمەن ايقىن باسىمدىقپەن ۇتىپ، جەڭىمپاز اتاندى.

تاەكۆوندوشىلار اراسىنداعى تارتىستى باسەكەگە الماتى قالاسىنىڭ كومانداسى نۇكتە قويدى. ولار فينالدا الماتى وبلىسىنىڭ قۇراماسىن 89:73 ەسەبىمەن ۇتىپ، كونفەدەراتسيا كۋبوگىنىڭ ءۇش دۇركىن چەمپيونى اتاعىنا يە بولدى.

ەركىن كۇرەس سپورتىنىڭ وكىلدەرى اراسىندا وتكەن اقتىق بەلدەسۋدە نۇر-سۇلتان كومانداسى ۇزدىك بولدى. ولار فينالدا الماتى وبلىسىنىڭ كومانداسىنان 4:2 ەسەبىمەن باسىم ءتۇسىپ، جەڭىسكە قول جەتكىزدى.

ءداستۇر بويىنشا كونفەدەراتسيا كۋبوگىن دزيۋدوشىلار اياقتادى. ىرىكتەۋدەن ىركىلمەي وتكەن اقتوبە وبلىسى مەن شىعىس قازاقستان وبلىسىنىڭ تاتامي شەبەرلەرى تارتىستى كۇرەس كورسەتتى. كەزدەسۋ 4:2 ەسەبىمەن شىعىس قازاقستان وبلىسى قۇراماسىنىڭ ەنشىسىنە شەشىلىپ، 2019 جىلدىڭ ۇزدىگى اتاندى.

جىلدىڭ ەڭ ماڭىزدى سپورتتىق شاراسى قر ۇلتتىق وليمپيادالىق كوميتەتىنىڭ پرەزيدەنتى تيمۋر قۇلىباەۆتىڭ باستاماسىمەن بيىل ءتورتىنشى رەت ۇيىمداستىرىلدى. جالپى جۇلدە قورى 165 ملن تەڭگەنى قۇرادى. بوكس، دزيۋدو، گرەك-ريم جانە ەركىن كۇرەس، تاەكۆوندودان ۇزدىك اتانعان كوماندا 12 ملن تەڭگەگە يە بولسا، 2 ورىن يەلەنگەندەر 7 ملن، ال 3 ورىن يەگەرلەرى 3 ملن تەڭگەدەن ءبولىپ الدى.
قازاق كۇرەسى مەن جارىس باعدارلاماسىنا بيىل قوسىلعان كاراتە بويىنشا جەڭىمپاز اتانعان كوماندالار 10 ملن تەڭگەدەن، 2 ورىنعا - 6 ملن، ال 3 ورىنعا تۇراقتاعان قۇرامالارعا 4 ملن تەڭگەدەن تابىستالدى.