سەنبىدەگى نارازىلىققا يران يسلام رەۆوليۋتسياسى جاساعى كورپۋسىنىڭ ۋكراينالىق جولاۋشىلار ۇشاعىن راكەتامەن اتىپ تۇسىرگەنىن مويىنداۋى سەبەپ بولدى.

Fars اگەنتتىگى نارازىلىق كەزىندە جۇرتتىڭ 3 قاڭتاردا اقش-تىڭ اۋە شابۋىلى كەزىندە قازا تاپقان "قۇدس" كۇشتەرىنىڭ گەنەرالى كاسەم سۇلەيمانيدىڭ سۋرەتىن جىرتقانىن حابارلادى. يران اگەنتتىكتەرى نارازىلىققا مىڭعا جۋىق ادام قاتىسقانىن ايتادى.

اقش پرەزيدەنتى دونالد ترامپ Twitter جەلىسىندە پارسى تىلىندە پوست جاريالاپ، نارازىلاردى قولدادى.

"باسىنان تالاي قيىندىق وتكەرگەن قايسار يران حالقىن پرەزيدەنت بولعالى قولداپ كەلەمىن. ءبىزدىڭ ۇكىمەت سىزدەردى ءالى دە قولداي بەرەدى. نارازىلىقتارىڭىزدى باقىلاپ وتىرمىز. سىزدەردىڭ قايسارلىقتارىڭىز قۋانتادى" دەپ جازدى ترامپ.

يرانداعى ادام قۇقىعى بەلسەندىلەرىنىڭ اقپارات اگەنتتىگى (HRANA) نارازىلىقتان ۆيدەو جاريالاپ، پوليتسيانىڭ نارازىلاردى كوزدەن جاس اعىزاتىن گازبەن قۋعانىن حابارلادى.

نارازىلىق شاراسى تەگەراننان بولەك، يسفاحان، حامادان، راشت، ساري جانە بابىل قالالارىندا بولعانى ايتىلادى.

3 قاڭتاردا يراكتا اقش يراندىق اسكەرباسى كاسەم سۇلەيمانيدىڭ كوزىن جويىپ، وقيعا جاۋاپكەرشىلىگىن موينىنا العاننان كەيىن يران 8 قاڭتارعا اۋعان ءتۇنى "كەك قايتارۋ" ءۇشىن امەريكانىڭ يراكتاعى ەكى بازاسىن زىمىراندارمەن اتقىلاعان. وسى وقيعادان بىرەر ساعات وتكەندە تەگەراننان كيەۆكە ۇشىپ شىققان ۋكراينالىق ۇشاق ساناۋلى مينۋتتان سوڭ يران استاناسى ماڭىنا قۇلادى. ماۋ كومپانياسىنىڭ Boeing 737 ۇشاعىنداعى 176 ادامنىڭ بارلىعى قازا بولدى. ۇشاقتا جەتى ەلدىڭ ازاماتى بولعان. ونىڭ ىشىندە كوبى – يران ازاماتى. ودان كەيىن اتالاتىن كانادا ازاماتتارىنىڭ دەنى – كانادا ازاماتتىعىن العان يراندىقتار. وقيعا تەكسەرىلمەي جاتىپ، بىردەن ۇشاقتىڭ "تەحنيكالىق سەبەپتەن قۇلاعانى" تۋرالى اقپارات تاراعان.

ال 9 قاڭتاردا اقش-تىڭ رەسمي وكىلدەرى مەن كانادا پرەمەر-ءمينيسترى جاستين تريۋدو تەگەران ماڭىندا قۇلاعان ۇشاقتى "يران زىمىرانى اتىپ تۇسىرگەنىن" مالىمدەدى.

11 قاڭتاردا يران بيلىگى ۇشاققا زىمىران تيگەنىن مويىنداپ، مۇنى "ادام قاتەلىگى" دەپ اتادى.

Abai.kz