ابايدىڭ 175 جىلدىق مەرەيتويى قر مادەنيەت جانە سپورت مينيسترلىگى جىل سايىن بولەتىن قاراجات اياسىندا تويلانادى. بۇل تۋرالى ورتالىق كوممۋنيكاتسيالار قىزمەتىندە وتكەن اباي قۇنانبايۇلىنىڭ 175 جىلدىعىنا ارنالعان ءىس-شارالار تۋرالى ءباسپاسوز ماجىلىسىندە قر مادەنيەت جانە سپورت ۆيتسە-ءمينيسترى نۇرعيسا داۋەشوۆ ايتتى.

«ابايدىڭ 175 جىلدىق مەرەيتويىنا ارنالعان شارالار قر مادەنيەت جانە سپورت مينيسترلىگىنىڭ 3 ملرد تەڭگە كولەمىندەگى جىلدىق جوسپارلانعان قارجىسى ەسەبىنەن وتەدى. مىسالى، اباي اتىنداعى وپەرا جانە بالەت تەاترى گاسترولدىك ساپارلارىنا بولىنگەن جىل سايىنعى قارجىنى اباي جىلىنا ارناپ، ماسكەۋ، تۇركيا، قىتايعا بارىپ ونەر كورسەتەدى», - دەيدى نۇرعيسا داۋەشوۆ.

مادەنيەت مينيسترلىگىنىڭ مالىمەتىنشە، اباي مەرەيتويىنىڭ رەسمي اشىلۋ ءراسىمى 2020 جىلدىڭ 21 قاڭتارىندا نۇر-سۇلتانداعى "استانا وپەرا" تەاترىندا وتەدى. اباي شىعارمالارىنىڭ جيناعى 10 شەت تىلىندە شىعارىلادى، سونداي-اق ابايدىڭ ءومىرى، شىعارماشىلىعى، مۇراسى مەن ءرولى تۋرالى ءۇش دەرەكتى قويىلىمدىق فيلم تۇسىرىلەدى.

«بيىلعى جىل قازاق ءۇشىن ەرەكشە، ايتۋلى جىل. اعىمداعى جىل ەلدىگىمىز بەن رۋحانياتىمىز ءۇشىن ازا ماڭىزدى. مەلەكەتتىك قانا ەمەس، حالىقارالىق دەيىگەيدە اتقارىلاتىن زور مىندەت جۇكتەلىپ وتىر. اباي ەسىمى، اباي مۇراسى، ابايدىڭ ونەگەسى مەن ءومىر جولى ءار قازاق ءۇشىن قاسيەتتى، قادىرلى. "قالىڭ ەلىم، قازاعىم، قايران جۇرتىم" دەپ قازاقتىڭ قامىن قارا باسىنىڭ قامىنان جوعارى قويعان ۇلى اقىن شەكسىز قۇرمەتكە يە. بيىل وسى مەرەيتوي اياسىندا 500 گە جۋىق ءىس-شارا وتكىزۋ جوسپارلانىپ وتىر. ولاردىڭ ىشىندە ءىرى حالىقارالىق جانە رەسپۋبليكالىق قوعامدىق ماڭىزى بار، عىلىمي، اعارتۋشىلىق ءىس-شارالار، كونفەرەنتسيالار، سيمپوزيۋمدار، پلەنەرلەر، دوڭگەلەك ۇستەلدەر، سىنىپ ساعاتتار، پوەتيكالىق جانە ادەبي كونكۋرستار، ءباسپاسوز تۋرلارى جانە وزگە دە ءىس-شارالار بار», - دەدى ول.

2020 جىلى تامىزدا سەمەيدە "اباي مۇراسى جانە الەمدىك رۋحانيات" حالىقارالىق عىلىمي-تاجىريبەلىك كونفەرەنتسيا وتەدى، وعان تانىمال وتاندىق جانە شەتەلدىك عالىم-ابايتانۋشىلار، زيالى قاۋىم وكىلدەرى قاتىسادى.

سونداي-اق ابايدىڭ "جيدەباي-ءبورىلى" مەملەكەتتىك تاريحي-مادەني جانە ادەبي-مەموريالدىق مۇراجاي-قورىعىن مۇراجايلاندىرۋ، اقىننىڭ ەسىمىمەن بايلانىستى تاريحي-مادەني مۇرا نىساندارىن عىلىمي-رەستاۆراتسيالاۋ جۇمىستارىن جۇرگىزۋ قاراستىرىلعان.

وقۋ ورىندارىندا اشىق ساباقتار، تاقىرىپتىق شىعارمالار، بايانداۋ جانە ابايدىڭ ولەڭدەرى مەن قارا سوزدەرىن مانەرلەپ وقۋ بايقاۋلارى وتەدى. رەسپۋبليكانىڭ بارلىق ايماقتارىنان "اباي جەرىنە ساياحات" اتتى ەكسكۋرسيالىق تۋرلار قاراستىرىلعان. عىلىمي كونفەرەنتسيالار مەن سيمپوزيۋمدار، اباي وقۋلارى، پوەتيكالىق جانە ادەبي فەستيۆالدەر، پوەزيا كەشتەرى، اباي شىعارماشىلىعىن جاقسى بىلۋىنە جانە ونىڭ شىعارمالارىن ورىنداۋعا ارنالعان سەمينارلار مەن كونكۋرستار جوسپارلانعان. ل. ن. گۋميلەۆ اتىنداعى ەۇۋ جانىنان "اباي اكادەمياسى" عىلىمي-زەرتتەۋ ينستيتۋتى قۇرىلدى.

سونداي-اق، اباي شىعارمالارى بويىنشا جالپىۇلتتىق ديكتانت وتكىزىلەدى. بىشكەكتە اباي ەسكەرتكىشى اشىلادى.

Abai.kz