قازاقستاننىڭ تۇڭعىش پرەزيدەنتىنىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى. بۇل تۋرالى elbasy.kz سايت حابارلادى. 

كەزدەسۋ بارىسىندا جامبىل وبلىسى قورداي اۋدانىنداعى جاعداي، بيولوگيالىق قاۋىپسىزدىكتى قامتاماسىز ەتۋ جانە كوروناۆيرۋس ينفەكتسياسىنىڭ تارالۋىنا جول بەرمەۋ ماسەلەلەرى قارالدى.

جيىندى اشقان نۇرسۇلتان نازارباەۆ قورداي اۋدانىندا بولعان وقيعا سالدارىنان قازا بولعانداردىڭ وتباسىلارىنا كوڭىل ايتتى جانە بارلىق زارداپ شەككەندەردىڭ تەزىرەك ساۋىعىپ كەتۋىن تىلەدى.

– قازىرگى جاعداي مەنى قاتتى الاڭداتىپ وتىر. 30 جىلدىڭ ىشىندە حالقىمىزبەن بىرگە ءبىرتالاي قيىندىقتاردى باستان وتكەردىك. قازىرگى جاستار سول اۋىرتپالىقتاردى ەلەستەتە دە المايدى. قازاقستاندا 130 كاسىپورىن جابىلىپ, 2,5 ميلليون ادام جۇمىسسىز قالدى. ۇيلەردە جىلۋ جوق، ازىق-تۇلىك تاپشىلىعى تۋىندادى. ءبىز وسى سىناقتاردىڭ بارىنەن بىرگە وتتىك، - دەدى ەلباسى.

قاۋىپسىزدىك كەڭەسىنىڭ توراعاسى قازاقستان تاۋەلسىزدىك العاننان كەيىن الەۋمەتتىك-ەكونوميكالىق سالادا ۇلكەن قيىندىقتاردى باستان وتكەرگەنىن ەسكە سالدى.

– ەگەر ءبىز كوپۇلتتى حالقىمىزدى بىرىكتىرىپ، تۇراقتىلىقتى قامتاماسىز ەتە الماساق، بۇگىندە ەلىمىزگە شەتەلدىك ينۆەستيتسيا كەلمەي، ەكونوميكا تۇرالاپ قالۋشى ەدى. ارينە، مەملەكەتتىك قىزمەتكەرلەرگە دە ءتيىستى مىندەتتەر جۇكتەلگەن، بىراق بەيبىتشىلىك پەن كەلىسىمدى ساقتاۋ، ەڭ الدىمەن، ءبىزدىڭ حالقىمىزدىڭ مىندەتى، - دەدى نۇرسۇلتان نازارباەۆ.

سونىمەن قاتار، ەلباسى تۋىنداعان جاعدايدىڭ سەبەپتەرىن مۇقيات زەرتتەپ، كىنالىلەردى زاڭ تالاپتارىنا سايكەس جازالاۋدى تاپسىردى.

– اعا بۋىن وكىلدەرى بۇل ماسەلەگە ەرەكشە نازار اۋدارۋعا ءتيىس. مەنىڭ ۇلت كوشباسشىسى رەتىندەگى ماقساتىم – قازاقستاندى بولاشاق ۇرپاق ماقتانا الاتىنداي دەڭگەيگە جەتكىزۋ. اعا بۋىننىڭ مىندەتى – ادامدارعا ءبىزدىڭ ورتاق ماقساتىمىز تاۋەلسىز، دامىعان جانە تۇراقتى مەملەكەتتى ساقتاپ قالۋ ەكەنىن ءتۇسىندىرۋ، - دەدى قاۋىپسىزدىك كەڭەسىنىڭ توراعاسى.

ەلباسى قازىرگى ۋاقىتتا پرەزيدەنت ق.ج. توقاەۆتىڭ تاپسىرماسىمەن ۇكىمەت پەن وبلىس اكىمدىگى زارداپ شەككەن ەلدى مەكەندەردى قالپىنا كەلتىرۋ جۇمىستارىن جۇرگىزىپ جاتقانىن اتاپ ءوتتى.

سونداي-اق، جەرگىلىكتى اتقارۋشى جانە قۇقىق قورعاۋ ورگاندارىنىڭ، قازاقستان حالقى اسسامبلەياسى مەن ونىڭ وڭىرلىك فيليالدارىنىڭ جۇمىس ساپاسىنا ەرەكشە نازار اۋدارىلدى.

– اسسامبلەيا مەن ونىڭ وڭىرلىك وكىلدىكتەرى مۇنداي جاعدايلاردىڭ الدىن الىپ، باقىلاۋدا ۇستاۋى كەرەك. بۇل ءبىزدىڭ ورتاق مىندەتىمىز، - دەدى قازاقستاننىڭ تۇڭعىش پرەزيدەنتى.

وتىرىس بارىسىندا جامبىل وبلىسىنىڭ اكىمى ب.ساپارباەۆ پەن ىشكى ىستەر ءمينيسترى ە.تۇرعىمباەۆتىڭ ەسەپتەرى تىڭدالدى.

ءبىرىنشى ماسەلەنى تالقىلاۋ اياسىندا ورتالىق مەملەكەتتىك جانە جەرگىلىكتى اتقارۋشى ورگاندارعا ەل وڭىرلەرىندەگى الەۋمەتتىك-ەكونوميكالىق پروبلەمالاردى شەشۋگە باعىتتالعان باعدارلامالاردى ودان ءارى ىسكە اسىرۋ جونىندە تاپسىرمالار بەرىلدى. سونىڭ ىشىندە جۇمىسپەن قامتۋ جانە ينفراقۇرىلىمدىق دامۋ، الەۋمەتتىك نىسانداردى قايتا جوندەۋ جانە قۇرىلىسىن جۇرگىزۋ ماسەلەلەرىنە نازار اۋدارىلدى.

كۇن تارتىبىندەگى ەكىنشى ماسەلە بويىنشا دەنساۋلىق ساقتاۋ ءمينيسترى ە.ءبىرتانوۆ ەسەپ بەردى.

قاۋىپسىزدىك كەڭەسىنىڭ توراعاسى كوروناۆيرۋس توڭىرەگىندەگى جاعداي قىتاي ەكونوميكاسىمەن بىرگە قازاقستان ەكونوميكاسىنا دا زالالىن كەلتىرۋى مۇمكىن ەكەنىن اتاپ ءوتتى.

– ءبىز بوس وتىرماي، بارىنە دايىن بولۋعا ءتيىسپىز. ءدارى-دارمەكتەر مەن باسقا دا قاجەتتى رەسۋرستار قورىن قامتاماسىز ەتۋىمىز كەرەك. بۇل ماسەلە ۇنەمى باقىلاۋدا بولعانى ءجون. مۇنداي جاعدايلارعا قارسى شارالار دايىن بولىپ، سىرتقى فاكتوردىڭ ۇلتتىق ەكونوميكاعا تەرىس اسەرىن بولدىرماۋ ماڭىزدى، - دەدى نۇرسۇلتان نازارباەۆ.

Abai.kz