سەيسەنبى, 4 تامىز 2020
COVID-19 قازاقستاندا. جۇقتىرعاندار — 93820. جازىلعاندار — 62511. قايتىس بولعاندار — 1058
انىق 1936 19 پىكىر 21 اقپان, 2020 ساعات 13:48

ناۋرىزدى جالپىحالىقتىق مەرەكەگە اينالدىرۋىمىز كەرەك...

ەلوردادا «رۋحاني جاڭعىرۋ» قوعامدىق دامۋ ينستيتۋتىنىڭ العاشقى وتىرىسى ءوتىپ، وندا ناۋرىز مەرەكەسىن جالپىۇلتتىق مەيرامعا اينالدىرۋ ءۇشىن ءبىرسىپىرا ۇسىنىستار تالقىعا سالىندى. 

اتاپ ايتقاندا، ناۋرىز مەرەكەسىن 14-ءىنشى ناۋرىزدان باستاپ تويلاۋ، ءتۇرلى ماركەتينگتىك جوبالاردى جۇزەگە اسىرۋ، پرەزيدەنت قۇتتىقتاۋىن ناۋرىز مەرەكەسىنىڭ الدىندا جاريالاۋ ت.ب. بىرقاتار باستامالار كوتەرىلدى.

كەمەلبەك ويشىباەۆ:

- تاۋەلسىزدىكتىڭ العاشقى جىلدارى ناۋرىز زور ىقىلاسپەن تويلاناتىن مەرەكە بولعان. بىراق، سوڭعى جىلدارى بۇقارالىق سيپاتتان كىشكەنە اجىراپ، ساحنالىق كەيىپكە ەنىپ، فولكلورلىق كورىنىستەن اسپاي ءجۇر.

سوندىقتان، ناۋرىزدى تويلاۋدىڭ جاڭا تۇجىرىمداماسىنا مىنانداي ۇسىنىستار ەنگىزدىك. مەرەكەلەۋدى 14-ءىنشى ناۋرىزدا باستاپ 22-ءىنشى ناۋرىزعا دەيىن جالعاستىرساق دەگەن، «ناۋرىز-سىيلىق»، «ناۋرىز fashion week» سياقتى ماركەتينگتىك شارالار ەنگىزسەك دەگەن ۇسىنىستارىمىز بار.

سونىمەن قاتار، پرەزيدەنتتىڭ تەلەۆيزيالىق قۇتتىقتاۋ ءسوزى ناۋرىزدىڭ الدىندا بەرىلسە دەگەن ۇسىنىسىمىز بار، - دەدى.

ايتا كەتەيىك، بۇل ۇسىنىستار ءالى بەكىتىلمەگەن. الايدا، ينستيتۋت وكىلدەرى تالقىلاۋعا قاتىسۋشىلاردى تىڭداپ، ايتىلعان ۇسىنىستاردى اقپارات جانە قوعامدىق دامۋ مينيسترلىگى ارقىلى پرەزيدەنت اكىمشىلىگىنە جىبەرمەك كورىنەدى.

ال، اقپارات جانە قوعامدىق دامۋ ۆيتسە-ءمينيسترى عابيدوللا وسپانقۇلوۆ ناۋرىز مەرەكەسىن تۇرلەندىرىپ، حالىقتىڭ سۇرانىسىنا ساي مەرەكەگە اينالدىرۋ كەرەكتىگىن ايتقان.

- ازاماتتىق الاڭنىڭ» العاشقى وتىرىسىندا، ياعني، كۇن تارتىبىندە ناۋرىز مەيرامىن مەرەكەلەۋدىڭ تۇجىرىمدامالىق تاسىلدەرىن تالقىلايمىز.

وزدەرىڭىزگە ءمالىم، ەلباسى – تۇڭعىش پرەزيدەنت نۇرسۇلتان نازارباەۆتىڭ 1991 جىلعى 15 ناۋرىزداعى جارلىعىنا سايكەس، ناۋرىز مەيرامى مەرەكە رەتىندە جاريالاندى. وسى جىلدار ارالىعىندا مەرەكەنى ءۇش كۇن تويلاۋ سياقتى وزگەرىستەرگە ۇشىرادى. 

دەگەنمەن، دۇنيەجۇزىلىك تاجىريبەگە قاراساق، مىسالى، ەۋروپا ەلدەرى «روجدەستۆو» مەرەكەسىنە ءبىر-ەكى اي دايىندالادى. يدەولوگيا تۇرعىسىنان ءبىر-ءبىرىن قۇتتىقتاپ، ءبىر-بىرىنە سىيلىق بەرەدى. ياعني، قوعامدا قالىپتاسقان ءداستۇرى بار.

جالپى، ءار ۇلتتىڭ وسىنداي بازالىق مەرەكەسى بولادى. سوندىقتان، ناۋرىز مەرەكەسىن قالاي تۇرلەندىرىپ، قالاي ۇلتتىق ناقىشىمىزداعى حالىقتىڭ سۇرانىسىنا ساي مەرەكەگە اينالدىرامىز دەگەن ماسەلەنى تالقىلاۋدى ۇسىنىپ وتىرمىز، - دەدى ۆيتسە-ءمينيسترى عابيدوللا وسپانقۇلوۆ.

سونىمەن قاتار، ينستيتۋت وكىلدەرى ازىرلەگەن تۇجىرىمدامادا ناۋرىزدا قارا شاڭىراققا سالەم بەرۋ ءداستۇرىن جانداندىرۋ دا قاراستىرىلعان. بۇل «ۇلتتىق كودتى ساقتاۋعا ىقپال ەتەدى» دەيدى ولار.

Abai.kz

19 پىكىر