قر دەنساۋلىق ساقتاۋ ءمينيسترى ەلجان ءبىرتانوۆ كورونوۆيرۋستىڭ قازاقستانعا دا جەتۋى مۇمكىن ەكەنىن ايتتى. الايدا قازىر مينيسترلىك بۇل ۆيرۋستىڭ الدىن الۋ ءۇشىن قاجەتتى شارالار قابىلداپ جاتقان كورىنەدى.

- قازىرگى كۇندە كوروناۆيرۋستىق اۋرۋ بىزدە جوق. بولمايدى دەپ ايتۋعا مەنىڭ ءتىلىم بارمايدى. ونىڭ سەبەبى، تاۋەكەل وتە جوعارى. ءبىز ەلىمىزدە وسىنداي ناۋقاستار بولسا، ينفەكتسيا تارالاتىن بولسا قاجەتتى شارالار دايىنداپ جاتىرمىز. بىراق بارلىق اۋىرعان ادام قىرىلىپ قالادى دەگەن، ول دا دۇرىس ەمەس. وعان سەنبەڭىزدەر، - دەيدى مينيستر.

مينيستر ءبىرتانوۆ قازىرگى ۋاقتا مەديتسيناسى دامىعان ەلدەر دە بۇل ۆيرۋستان زارداپ شەگىپ جاتىر دەيدى.

- شىنىمدى ايتايىن، ينفەكتسيانىڭ جۇعۋى مەديتسينانىڭ قانشالىقتى دامىعانىنا اسا بايلانىستى ەمەس. مەديتسيناسى دامىعان جاپونيا، اقش، كورەيا ەلدەرىندە ينفەكتسيادان زارداپ شەگىپ جاتىر. بۇل ينفەكتسيا اۋا تامشىلارى ارقىلى جۇعادى، - دەدى ءبىرتانوۆ.

الايدا، ءبىرتانوۆ قازاقستاننان باسقا دا كورونوۆيرۋس جۇقتىرماعان ەلدەر بارىن ايتىپ، كوڭىل اۋلاعان بولىپتى.

ال، جۋىردا «Science» جۋرنالى وكسفورد پەن گارۆارد ۋنيۆەرسيتەتىنىڭ جەتەكشى ەپيدەميولوگتارىنىڭ پىكىرلەرىن جاريالادى. ولار COVID-19 كوروناۆيرۋسى بۇكىل پلانەتادا تارالدى دەپ دابىل قاعۋدا. ايتۋلارىنشا، شەكارانى جابۋ مەن اۋىرعان ادامداردى باقىلاۋ ەندى كومەكتەسپەيدى.

«Science» جۋرنالى ءوز ماتەريالىندا: «كوروناۆيرۋس انىقتالعان مەملەكەتتەردىڭ ءتىزىمىن بەرە وتىرىپ، لوندون يمپەراتورلىق كوللەدجى مودەلدەۋ توبىنىڭ باعالاۋى بويىنشا، قىتايدان «ەكسپورتتالعان» جاعدايلاردىڭ ۇشتەن ەكىسىنە ءالى دياگنوز قويىلعان جوق»، دەپتى.

وكسفورد ەپيدەميولوگى كريستوفەر دەيدىڭ پىكىرىنشە، سانيتارلىق جانە مەديتسينالىق قىزمەتتەردىڭ ارەكەتىن وزگەرتۋ قاجەت.

وسى ۋاقىتقا دەيىن قىتايدا كوروناۆيرۋستىڭ تارالۋىن باسەڭدەتۋگە، ونىڭ باسقا ەلدەرگە تارلماۋىنا، تاسىمالداۋشىلارمەن بايلانىسقان ادامدارعا مۇقيات باقىلاۋ جاسالىپ، ونداي ادامدارعا ەكى اپتا بويى كارانتين جاريالاندى. بىراق قازىر حالىقارالىق ساپارلارعا قويىلعان شەكتەۋلەر ءتيىمسىز ەكەنىن كورسەتكەن.

وسىعان دەيىن يران، وڭتۇستىك كورەيا جانە يتاليا ەلدەرى قىتايعا ۇشاق رەيستەرىن شەكتەگەن.

ال، دۇنيەجۇزىلىك دەنساۋلىق ساقتاۋ ۇيىمىنىڭ وكىلى بريۋس ەيلۆارد  قىتايداعى ەپيدەميا ماسەلەسى بويىنشا حالىقارالىق كوميسسيا قۇرامىندا جۇمىس ىستەيدى ەكەن. ونىڭ ايتۋىنشا، ەگەر حۋبەيدەگى قىتايلىقتاردىڭ ۆيرۋسقا قارسى تۇرار كۇش-جىگەرى بولماسا، ەلدە تاعى دا جۇزدەگەن مىڭ جاعداي ورىن الۋى مۇمكىن.

ايتا كەتەيىك، قازىر الەم بويىنشا 82 مىڭنان اسا ادام كورونوۆيرۋس ينفەكتسياسىن جۇقتىرعان. ال، ۆيرۋستان قايتىس بولعان ادامدار سانى 2800-دەن اسقان.

Abai.kz