قازاقستان پرەزيدەنتى قاسىم-جومارت توقاەۆ ۇلتتىق بيوتەحنولوگيا ورتالىعىنداعى وتاندىق عالىمداردىڭ زەرتتەۋ جۇمىستارىمەن تانىستى.

ورتالىق قىزمەتكەرلەرى مەملەكەت باسشىسىنا دنق جاساندى سينتەز جولىمەن ازىرلەنگەن جانە جۇقپالى كوروناۆيرۋس اۋرۋىنىڭ جاڭا ءتۇرىن جىلدام انىقتاۋعا مۇمكىندىك بەرەتىن پوليمەرازدى تىزبەكتى رەاكتسيا (پتسر) نەگىزىندەگى تەست جۇيەسىن تانىستىردى. اتالعان تەست جۇيەسى شەتەلدىك دياگنوستيكالىق قۇرال-جابدىقتارمەن سالىستىرۋ كەزىندە ءوزىنىڭ جوعارى سەزىمتالدىعىن كورسەتكەن.

قازىرگى ۋاقىتتا قازاقستاننىڭ بيولوگيالىق قاۋىپسىزدىگىن قامتاماسىز ەتۋ قاجەتتىگىن جانە COVID-19 ۆيرۋسىنىڭ ءارتۇرلى كليماتتىق جاعدايلارعا بەيىمدەلۋ قابىلەتىن ەسكەرە وتىرىپ، ۇلتتىق بيوتەحنولوگيا ورتالىعى مەن بيولوگيالىق قاۋىپسىزدىك پروبلەمالارى جونىندەگى عىلىمي-زەرتتەۋ ينستيتۋتىنىڭ عالىمدارى كوروناۆيرۋسقا قارسى ۆاكتسينا جاساۋ بويىنشا بىرلەسكەن جۇمىستارىن باستاپ كەتتى.

قاسىم-جومارت توقاەۆ بيولوگ عالىمداردىڭ ەڭبەگىن جوعارى باعالاپ، قازاقستان عىلىمىنىڭ قۇزىرەتىن ارتتىرۋ ءۇشىن وتاندىق ازىرلەمەلەردىڭ ماڭىزدىلىعىن اتاپ ءوتتى.

– شىن مانىندە، بۇل زەرتحانا قازاقستان ءۇشىن بىرەگەي سانالادى. ءبىز سىزدەردىڭ عىلىمي جۇمىستارىڭىزعا زور ءۇمىت ارتامىز. قاجەتتى كومەك بەرىلەدى. ۆيرۋس پەن ونىڭ تارالۋى بيولوگيالىق لابوراتوريالاردىڭ، مەديتسينالىق جانە سانيتارلىق قىزمەتتەردىڭ جۇمىستارىنا مەملەكەتتىڭ ەرەكشە كوڭىل ءبولۋى ءتيىس ەكەنىن كورسەتتى، - دەدى مەملەكەت باسشىسى.

پرەزيدەنت كارانتين تالاپتارىن ساقتاۋ قاجەتتىگى جايىندا ايتتى.

– مەن ازاماتتارىمىزدى كارانتين رەجيمىن ساقتاۋعا شاقىرامىن. بىراق، ەشقانداي دۇربەلەڭ تۋعىزۋعا بولمايدى. ويتكەنى، ىندەت ەجەلدەن وپتيميزم مەن ومىرگە قۇشتارلىق سالتانات قۇرعان، ادامداردىڭ جىگەرى مۇقالمايتىن جەرلەردى اينالىپ وتەدى. سونىمەن قاتار كىمدە-كىم دەپرەسسياعا ءتۇسىپ، قايعىعا سالىناتىن بولسا، ينفەكتسيا دا سوعان ءۇيىر بولادى. سوندىقتان ءبارىمىز بىرگە بولۋىمىز كەرەك. ال اۋىرعاندارعا كەلەتىن بولساق، ولاردى ەشقانداي دا شەتتەتپەيمىز. بارلىق قاجەتتى ەمدەۋ شارالارى جۇرگىزىلەدى. ءبىز ولارعا دا، كارانتيندە جاتقان ازاماتتارعا دا قامقورلىق جاسايمىز، - دەدى مەملەكەت باسشىسى.

پرەزيدەنت توتەنشە جاعداي جونىندەگى مەملەكەتتىك كوميسسيانىڭ وتىرىسىندا اۋقىمدى ءىس-قيمىلدار جوسپارى جاريالانعانىن اتاپ ءوتتى. ول بويىنشا حالىققا، ونىڭ ىشىندە، بيزنەس وكىلدەرىنە قارجىلاي كومەك بەرىلەدى.
- سالىقتىق جەڭىلدىكتەر مەن كرەديت جۇكتەمەلەرىن تومەندەتۋ شارالارىن ەسەپتەمەگەندە، داعدارىسقا قارسى جۇمسالاتىن قارجىنىڭ جالپى كولەمى 10 ميلليارد دوللاردان اسادى. بۇل - بۇرىن-سوڭدى بولماعان سوما. ءبىزدىڭ الدىمىزدا قازىر وسى قاراجاتتى وتە ءتيىمدى جۇمساۋ مىندەتى تۇر. ءبىز وسى باعىت بويىنشا جۇمىس ىستەيمىز. جاعداي باقىلاۋدا، ازاماتتار مەملەكەتتىڭ قامقورلىعىن سەزىنۋدە. بۇل - ءبىزدىڭ جۇمىسىمىزدىڭ نەگىزگى باسىمدىعى، - دەپ قورىتىندىلادى قاسىم-جومارت توقاەۆ.

ورتالىق جۇمىسىمەن تانىسۋ بارىسىندا ءبىلىم جانە عىلىم ءمينيسترى اسحات ايماعامبەتوۆ، دەنساۋلىق ساقتاۋ ءمينيسترى ەلجان ءبىرتانوۆ، سونداي-اق، ۇلتتىق بيوتەحنولوگيا ورتالىعىنىڭ باس ديرەكتورى ەرلان رامانقۇلوۆ بايانداما جاسادى.

بۇعان دەيىن وتاندىق عىلىمي ۇيىمدار قىسقا مەرزىم ىشىندە قۇس تۇماۋى مەن دوڭىز تۇماۋىنا، نودۋليارلى دەرماتيتكە جانە برۋتسەللەزگە قارسى ۆاكتسينالار ازىرلەگەن بولاتىن. جالپى ۆاكتسينانىڭ 28 ءتۇرى جاسالىپ جانە دياگنوستيكالىق تەست جۇيەسىنىڭ تەحنولوگيالارى ازىرلەندى. مۇنىڭ كەيبىرى شەتەلدەرگە شىعارىلادى.

Abai.kz