كەشە Instagram جەلىسىندە الماتى وبلىسى، قاپشاعاي قالاسىندا بولعان شەتىن وقيعا تۋرالى اقپارات تارادى. توتەننەن تونگەن ءتىلسىز جاۋدان ءبىر وتباسى، ءبىر وتباسىنىڭ بەس بىردەي بالاسى باسپاناسىز قالدى. قۇدايعا تاۋبە، بالالاردىڭ ءبارى ءدىن امان. ال ولار تۇرىپ جاتقان ءۇي ەندى جوق.

قاپشاعاي قالالىق كىتاپحاناسى Instagram-داعى رەسمي پاراقشاسىندا بەس بالانىڭ اناسى، كىتاپحانا قىزمەتكەرى مايگۇل ءساحاريدىڭ جاعدايىن جەتكىزىپ، بەينەجازبا جاريالاعان ەكەن. ەل-جۇرتتان كومەك سۇراپ، مايگۇلدىڭ بانك كارتاسىن جاريالاپ، قايىرىمدى جانداردىڭ كومەك قولىن سوزۋىن سۇراپتى.

مايگۇل ساحاري قاپشاعاي قالالىق كىتاپحاناسىندا ەدەن جۋشى بولىپ جۇمىس ىستەيدى. بەس بالاسى بار. ەڭ كەنجەسى 8 ايلىق. 80-دەگى ەنەسى دە قولىندا كورىنەدى. ءبىر ۇيدە ء(ۇش بولمەدە) 8 ادام تۇرىپ جاتقان. ال كەشە، 30 ناۋرىز كۇنى ولار تۇرىپ جاتقان ءۇي تۇگەلدەي ورتەنىپ كەتكەن.

وقيعا قالاي بولعان؟ جاپا شەگىپ قالعان شاڭىراققا قۇزىرلى ورگاندار تاراپىنان قانداي دا ءبىر كومەك كورسەتىلگەن بە؟ ولار قازىر قايدا تۇرىپ جاتىر؟ ءبىز مايگۇل ءساحاريدىڭ وزىنە حابارلاستىق.

مايگۇل ساحاري، بەس بالانىڭ اناسى:

- وقيعا كەشە تۇسكى ساعات 12-دە بولدى. اياق استىنان ءورت شىقتى دا، ۇيدەن قاشىپ شىقتىق. ول كەزدە جولداسىم جۇمىستا ەدى. ەنەم مەن بالالار ۇيدە بولعان. ايتەۋىر ءبارىمىز امانبىز.

زالداعى «ناتياجنوي پاتولوكتىڭ» استىندا توك تۇراتىن. سودان شىقتى دەپ ويلايمىن. ول قاتتى جانعاندا قويۋ قارا ءتۇتىن الىپ كەتتى. بالالاردى دالاعا الىپ شىعىپ ۇلگەردىك. ۇيگە كىرە المادىق. ايتەۋىر قۇجاتتاردى ساقتاپ قالدىق. قايتا ءورت سوندىرۋشىلەر بىزگە جاقىن جەردە بولعاندىقتان، تەز كەلدى.

بۇل ءۇي وزىمىزدىكى، كۇيەۋىمنىڭ اتىندا بولعان. ءۇش بولمەلى. مەن مۇندا كەلىن بوپ تۇسكەلى 19 جىل بولدى. قازىر 5 بالام بار. ەڭ ۇلكەن ۇلىم 16-دا. ەڭ كىشكەنتايىم 8 ايلىق. 80-گە كەلگەن ەنەم بار. جالپى، ۇيدە سەگىز ادامبىز. .

مەن قاپشاعاي قالالىق كىتاپحاناسىندا ەدەن جۋشى بولىپ جۇمىس ىستەگەنمىن. قازىر دەكرەتتىك دەمالىستامىن. كوپبالالى انالارعا ارنالعان جاردەماقى، سوسىن الەۋمەتتىك-تۇرمىس جاعدايىمىزعا بايلانىستى ااك (اسپ) الىپ وتىرمىن. كۇيەۋىم 1-ءىنشى شاعىن اۋداندا كۇزەتشى بولىپ جۇمىس ىستەيدى. 

وسى قاپشاعايدا اكە-شەشەمنىڭ ەكى بولمەلى پاتەرى بار ەدى. وزدەرى سول جەردە تۇراتىن. قازىر ۋاقىتشا سولارعا بارىپ، پانالاپ جاتىرمىز. جان-جاقتان پاتەر قاراستىرعانىمىزبەن، كوبىسى 5 بالامەن العىسى كەلمەيدى.

جۇمىستاعى قىزدار كەلىپ، الەۋمەتتىك كومەك الۋعا حاتتاما تولتىرۋعا كومەكتەسكەن. سول حاتتامانى بۇگىن جەرگىلىكتى اكىمشىلىككە وتكىزەمىن.

ال، كەشە الەۋمەتتىك كومەك بولىمىنەن اجار، نۇرلان دەگەن كىسىلەر كەلىپ كەتتى. ولار: «كومەككە قۇجاتتارىڭدى تاپسىرساڭىزدار، جوعارى جاقتان كومەك سۇرايمىز»، – دەپ وتىر. ازىرگە ءورت سوندىرۋشىلەردەن ءبىر قۇجاتىمىز دۇرىس بولماي تۇر. سول رەتتەلگەن سوڭ، اكىمشىلىككە وتىكىزىپ كورەمىز.

سوسىن مەكتەپتەن بالالارىمنىڭ مۇعالىمدەرى كەلدى. ول كىسىلەر: «بالالاردىڭ كىتاپتارىنا، ينتەرنەتتەرىنە قولدان كەلگەنشە كومەكتەسەمىز»، – دەدى.

ازىرگە – سول: تۋعان تۋىسقاندارىمىز، جولداستارىمىز، كوپشىلىك «kaspi gold» كارتامىزعا ازىن-اۋلاق اقشا جىبەرىپ جاتىر. 

ءبىز مايگۇلدىڭ باسىنا تۇسكەن وسى ءبىر اۋىرتپاشىلىقتى الەۋمەتتىك جەلىدەن كوردىك. وزدەرىمەن بايلانىسقا شىعىپ، ماسەلەنىڭ ءمان-جايىن سۇراپ بىلدىك.

ەندى اماندىق عابباسۇلى باتالوۆ تىزگىنىن ۇستاعان الماتى وبلىسى اكىمدىگى، تالعات قاناتۇلى قايناربەكوۆ تىزگىنىن ۇستاعان قاپشاعاي قالاسى اكىمدىگى كوپ بالالى وتباسىنا قارايلاسىپ، كومەك قولىن سوزادى دەپ سەنەمىز!

راس، قازىر قىتاي ۆيرۋسى مەن قارجىلىق قيىندىق قوس بۇيىردەن قىسقان تار كەزەڭدەمىز. قاۋىپتى ۆيرۋستىڭ جىلدام تارالۋى مەن تەڭگەنىڭ تۇراقسىزدىعى «مىرزاقاماقتا» (كارانتين) جاتقان كوپ شاڭىراقتىڭ كۇي-تۇرمىسىنا تەرىس اسەر ەتپەي قويمايتىنى تۇسىنىكتى. قازىردىڭ وزىندە اس-اۋقاتتان تارىققان انالار جەر-جەرلەردەن ءۇن قاتا باستادى.

ال جوعارىداعى مايگۇل ءساحاريدىڭ باسىنا تۇسكەن توتەنشە ءجايت كەزەك كۇتتىرمەيدى. تۇرىپ جاتقان ۇيلەرى ورتەنىپ كەتتى. بەس بالاسىمەن، قارت ەنەسىمەن قاڭعىرىپ، «دالادا» قالدى. دالىرەك ايتساق، كىسى شاڭىراعىندا قىسىلىپ-قىمتىرىلىپ وتىر.

وتكەن جىلى استانادا بولعان شەتىن وقيعا قازاق قوعامىنىڭ قوتىر-جاراسىن تىرناپ، قاناتتى. قوعامنىڭ قوياسىن اقتاردى. جىلدار بويى قوردالانىپ قالعان الەۋمەتتىك پروبلەمالاردى قايتا كۇن تارتىبىنە شىعاردى. بۇل ماسەلە ءالى كۇنگە وزەكتىلىگىن جوعالتقان جوق.

سوندىقتان، «بەس بالامەن ەش جەر قابىلدامايدى»، – دەپ شىرىلداعان انانىڭ جانايقايىنا قاپشاعاي قالاسىنىڭ اكىمى تالعات قاناتۇلى، الماتى وبلىستىق اكىمى اماندىق عابباسۇلى بەي-جاي قاراماسا كەرەك.

Abai.kz