سارسەنبىنىڭ ساتىندە الماتىداعى ۇلتتىق ءباسپاسوز كلۋبىنىڭ الدىنا ادام قاراسى كوپ جينالدى. قۇرال-سايمانىن اسىنا كەلگەن جۋرناليست قاۋىمىنان گورى، قولدارىنا ءبىر-ءبىر حابارلاۋىش راتسيا ۇستاعان ءتارتىپ ساقشىلارىنىڭ قاتارى مول سياقتى كورىندى. بەلگىلەنگەن جەرگە كۇنى بۇرىن جەتىپ العان پوليتسايلار قۇددى ءبىر لاڭكەستەردى قۇرىقتايتىنداي تاس-ءتۇيىن ءجۇر. سونىمەن، اقپارات قۇرالدارى ارقىلى الدىن الا حابارلانىپ ايتىلعانداي، ەلدەگى «ءسوز بوستاندىعىن قولداۋ» اكتسياسى تۋرا ساعات 11:00-دە باستالىپ كەتتى.

سارسەنبىنىڭ ساتىندە الماتىداعى ۇلتتىق ءباسپاسوز كلۋبىنىڭ الدىنا ادام قاراسى كوپ جينالدى. قۇرال-سايمانىن اسىنا كەلگەن جۋرناليست قاۋىمىنان گورى، قولدارىنا ءبىر-ءبىر حابارلاۋىش راتسيا ۇستاعان ءتارتىپ ساقشىلارىنىڭ قاتارى مول سياقتى كورىندى. بەلگىلەنگەن جەرگە كۇنى بۇرىن جەتىپ العان پوليتسايلار قۇددى ءبىر لاڭكەستەردى قۇرىقتايتىنداي تاس-ءتۇيىن ءجۇر. سونىمەن، اقپارات قۇرالدارى ارقىلى الدىن الا حابارلانىپ ايتىلعانداي، ەلدەگى «ءسوز بوستاندىعىن قولداۋ» اكتسياسى تۋرا ساعات 11:00-دە باستالىپ كەتتى.

«قۋىرداقتىڭ كوكەسىن تۇيە سويعاندا كورەسىڭ» دەمەكشى، قىزىقتىڭ كوكەسى ارنايى دايىنداپ اكەلگەن پلاكاتتاردى ايقارا اشقان كەزدە باستالدى. جەمتىگىن اڭدىعان قۇزعىن-قارعاداي قىبىر ەتكەندى قالت جىبەرمەي باقىلاپ تۇرعان قىزىل جاعالىلار «ينتەرنەتكە بوستاندىق!»، «رامازان ەسىرگەپوۆكە بوستاندىق!»، «پروكۋرور، سوت مىرزالار! ار-ۇياتتى ويلاڭدار!» دەگەن جازۋلارى بار پلاكاتتار جايىلعان ساتتە-اق جۋرناليستەردىڭ قولىنداعى قاعازدارعا جارماستى. «تارت قولىڭدى، جولاما! قاعازدى الۋعا قانشا قاقىڭ بار؟!» دەگەن داۋىستاردان قۇلاق تۇنادى. العاشقى كەزدە وسىلاي شابۋىل جاساپ، بەلسەندى توپتىڭ ۇرەيىن ۇشىرىپ الامىز دەپ ويلاعان بولۋلارى كەرەك، بار-جوعى ون مينۋتتىڭ اينالاسىندا الگى اكىرەڭدەگەن پوليتسايلاردىڭ «اۋرۋى» باسىلىپ، جۋاسىپ سالا بەرگەنى. تەك شاراعا قاتىسۋشىلار كوشەگە شىعىپ كەتپەس ءۇشىن ساقشىلار فۋرمانوۆ كوشەسىن بويلاي قاز-قاتار ءتىزىلىپ تۇرىپ الدى. پروكۋراتۋرانىڭ كيىمىن كيگەن كەيبىر پىسىقاي ماماندار دىبىس كۇشەيتكىش ارقىلى جينالعان قاۋىمعا باعىشتاپ: «بۇلايشا نارازىلىق اكتسياسىن وتكىزۋگە سىزدەرگە رۇقسات بەرىلگەن جوق. بۇلارىڭىز زاڭسىز! تەزىرەك تاراڭىزدار!» دەپ قويادى. الايدا، وزدەرىنىڭ زاڭعا قايشى كەلەتىندەي ەشتەڭە ءبۇلدىرىپ تاستاماعاندىعىن جاقسى بىلەتىن تاۋەلسىز باق وكىلدەرى قۇقىق قورعاۋ ورىندارىنىڭ مۇنداي مالىمدەمەسىنە قۇلاق تا تۇرگەن جوق. كەرىسىنشە زاڭ قىزمەتكەرلەرىنىڭ وزدەرىنە تارپا باس سالىپ: «نە سەبەپتى ءبىزدىڭ بەيبىت تۇردە جينالۋىمىزعا رۇقسات ەتىلمەيدى. ونداي زاڭدى قايدان تاۋىپ الدىڭىز! ءتۇسىندىرىپ بەرىڭىزشى، ەگەر ءسىزدىڭ ايتقان ءسوزىڭىز زاڭمەن راستالسا، ءبىز وسى جەردەن دەرەۋ كەتەمىز», - دەستى.

ءبىر وكىنىشتىسى اتالعان اكتسياعا اتسالىسۋعا تاۋەلسىز باق وكىلدەرىنەن باسقا ءتىرى پەندە قاتىسقان جوق. باسىنا ءىس تۇسكەندە، نەمەسە ءوزىن جارنامالاۋ كەرەك بولعان كەزدە بيلىككە باعىنبايتىن تاۋەلسىز گازەت-جۋرنالداردىڭ كومەگىنە جۇگىنەتىن جۇرت الدىندا جۇرگەن تانىمال تۇلعالاردىڭ، قوعام قايراتكەرلەرىنىڭ، ۇلت جاناشىرلارىنىڭ ءبىر دە بىرەۋى ول ماڭنان تابىلمادى. بالكىم «ەستىمەدىك، شاقىرتۋ المادىق» دەپ اقتالاتىن شىعار، ولاي بولسا قاتەلەسەدى. كەشە عانا وسى شارانى ۇيىمداستىرۋشى ازاماتتار جۋرناليستەردىڭ باسىن قوسىپ، وسىنداي جيىن وتەتىندىگىن ايتقان. ينتەرنەت سايتتاردا بۇل تۋرالى ماتەريالدار جاريالانىپ تا قويعان. سونداي-اق، شاقىرىلماي قالعانىنا وكپەلەگەن بولسا، تاعى دا قايتالايمىز. ارىبەرىدەن كەيىن نارازىلىق اكتسياسى ءار ادامعا جەكە-جەكە شاقىرتۋ جىبەرەتىندەي توي-تومالاق ەمەس. سوندىقتان، ءسوز بوستاندىعىنىڭ كەلەشەگىنە بەيجاي قاراي المايتىن قازاقستاننىڭ كەز-كەلگەن ازاماتى وسى اكتسياعا قاتىسۋعا ەرىكتى ەدى.

الايدا، بۇل قۇقىقتى تاۋەلسىز باق وكىلدەرىنەن باسقا، ەكى-اق ازامات پايدالاندى. ولاردىڭ ءبىرى «ازات» دەموكراتيالىق پارتياسىنىڭ توراعاسى بولات ابىلەۆ بولسا ەكىنشىسى ۆيكتور كوۆتۋنوۆسكي دەگەن ازامات بولدى.

ءسويتىپ، ءتارتىپ ساقشىلارى مەن جۋرناليستەر اراسىنداعى «ءسوز بوستاندىعى ءۇشىن» تەكەتىرەس ەكى-ءۇش ساعاتتان كەيىن تىنىشتىقپەن اياقتالدى. قۇدايعا شۇكىر قۇقىق قورعاۋشىلار دا بۇل جولى «مەيىرىمدىلىك» تانىتىپ ەشكىمدى قاماۋعا العان جوق. باس جارىلىپ، كوز شىققانىن دا كورمەدىك.