كوروناۆيرۋس ىندەتى جاھاندىق ەكونوميكاعا قاتتى ىقپال ەتۋدە. قازىر عالامنىڭ ەكونوميكاسى سەكەم الىپ، كوپتەگەن مەملەكەت ابدىراپ وتىر. وسىنداي اۋىر كەزەڭدە ەل پرەزيدەنتى قاسىم-جومارت توقاەۆ قازاقستان حالقىنا مالىمدەمە جاساپ، ۇكىمەت تاراپىنان ىسكە اسىرىلۋى ءتيىس شۇعىل شارالاردى تاپسىردى.

مالىمدەمەدە اۋىل شارۋاشىلىعىمەن اينالىساتىن كاسىپكەرلەرگە قولداۋ كورسەتىلەتىنى دە ايتىلدى. اتاپ ايتقاندا، بيۋدجەتتەن​ 70 ميلليارد​ تەڭگە، كوكتەمگى ەگىس ناۋقانى ءۇشىن «قاراپايىم زاتتار ەكونوميكاسى» باعدارلاماسى ارقىلى قوسىمشا​ 100 ميلليارد​ تەڭگە بولىنەتىنى بەلگىلى بولدى.

ءوڭىر باسشىسى اماندىق باتالوۆ اۋىل شارۋاشىلىق سالاسىنا ەرەكشە كوڭىل بولۋدە. تيىسىنشە، الماتى وبلىسى اگروسەكتوردا كوش باسىندا كەلەدى. وسى ورايدا، اۋىل شارۋاشىلىعى كاسىپكەرلەرى اگرارلىق سالا ەكونوميكانىڭ درايۆەرى ەكەنىن ەسكەرە وتىرىپ، بۇل ماڭىزدى شەشىم دەپ بىلەدى.

«اسىل تۇقىمدى سيىردى وسىرۋمەن اينالىساتىن «تاجىكەەۆ» شق باسشىسى جەڭىس تاجىكەەۆ «قىزىعى مەن قيىندىعى مول كاسىپپەن اينالىساتىن شارۋالارعا بۇل ۇلكەن قولداۋ. وسىنداي قولداۋدىڭ ارقاسىندا ەگىن شارۋشىلىعى، جەمىس-جيدەك شارۋاشىلىعى، مال شارۋاشىلىعىن وندىرۋدە ەلىمىز الدىڭعى قاتارعا شىعادى»،- دەيدى.

سونىمەن قاتار، ۇكىمەتكە جانارمايدىڭ نارىقتىق باعاسىن ون بەس پايىزعا ارزانداتىپ،​ 165​ تەڭگەگە دەيىن تومەندەتۋ مىندەتى جۇكتەلدى. وسىنى قامتاماسىز ەتۋ ءۇشىن​ 390 مىڭ​ توننا جانارماي جەڭىلدىكپەن ساتىلاتىنى دا ءمالىم بولدى. جالپى، الماتى وبلىسىندا اۋىل شارۋاشىلىعىن دامىتۋدىڭ اۋەلەتى زور. جەتىسۋدا اگرارلىق سالانىڭ وركەندەۋىنە ۇلەس قوسىپ جۇرگەندەردىڭ ءبىرى  «قىدىرالى» شق باسشىسى سەكەن شەنگەلباەۆ. ول شارۋاشىلىقتى ورگە قاراي دوڭگەلەتۋ جولىندا مۇنداي قولداۋ كورسەتىلگەنىنە ءدان ريزا.  

 «وسى جانە وزگە دە ايتىلعان شارالاردىڭ بارلىعى ازاماتتار مەن وتاندىق بيزنەستى، اۋىلشارۋاشىلىعىن قولداۋ ءۇشىن جاسالىپ جاتىر. بۇل قولداۋدى پايدالانا وتىرىپ، قىزىلشا ءونىمىڭ كولەمىن ۇلعايتۋعا جۇمىس اتقارامىن جانە دە پرەزيدەنتىمىز​ قابىلداعان كەسەلمەن كۇرەسۋدىڭ ناقتى شارالارىنان بەيتانىس بولعان بۇقارانى بيلىكتىڭ حابارلاعان ءار جاڭالىعىنا، توتەنشە جاعداي كەزىندە قابىلدانعان جاڭا ەرەجەلەرگە باعىنۋعا شاقىرامىن»، - دەدى سەكەن شەنگەلباەۆ.

ايمان اسىل

Abai.kz