سەيسەنبى, 2 ماۋسىم 2020
COVID-19 قازاقستاندا. جۇقتىرعاندار — 11571. جازىلعاندار — 5757. قايتىس بولعاندار — 41
532 6 پىكىر 2 ءساۋىر, 2020 ساعات 00:04

«Birgemiz» قورى مۇقتاج جاندارعا 5 ميلليون ماسكا تاراتادى

قازاقستان رەسپۋبليكاسى پرەزيدەنتى جانىنداعى توتەنشە جاعدايدى قامتاماسىز ەتۋ جونىندەگى مەملەكەتتىك كوميسسيانىڭ ۇسىنىسى نەگىزىندە، نۇرسۇلتان نازارباەۆتىڭ باستاماسىمەن قۇرىلعان «Birgemiz» قوعامدىق قورى، قازاقستاندىق «سق-فارماتسيا» ۇكىمەتتىك وپەراتورىمەن 5 ميلليون ماسكا الۋعا كەلىسىم جاسادى.

بۇعان دەيىن ەلىمىزدىڭ تۇڭعىش پرەزيدەنتى قاۋىپسىزدىك كەڭەسىنىڭ وتىرىسىندا كوروناۆيرۋستىڭ تارالۋىنا قارسى كۇرەس شارالارى اياسىندا، مۇقتاج جانداردى قاجەتتى قورعانىس قۇرالدارىمەن، ونىڭ ىشىندە مەديتسينالىق ماسكالارمەن قامتاماسىز ەتۋ قاجەت ەكەنىن ايتقان بولاتىن.

قور توراعاسى رۋسلان ساكەەۆتىڭ ايتۋىنشا، ساتىپ الىنعان ماسكالار كوروناۆيرۋستان ەڭ كوپ زارداپ شەككەن قالالار - نۇر-سۇلتانعا (2 ملن. دانا), الماتىعا (2 ملن. دانا) جانە شىمكەنتكە (1 ملن. دانا) جەتكىزىلەدى.

«سق-فارماتسيا» كەلىسىم بويىنشا اتالعان قالالارعا ماسكانى 10 كۇن ىشىندە جەتكىزۋگە مىندەتتى. ءبىر ماسكا باعاسى ونىڭ قالالارعا جەتكىزىلۋ قۇنىن قوسا ەسەپتەگەندە 118 تەڭگەنى قۇرايدى. سونداي-اق، ساتىپ الىنعان ماسكالاردىڭ ساپاسىنا دا «سق-فارماتسيا» جاۋاپتى. ءوز كەزەگىندە، اكىمدىكتەر بۇعان دەيىن قورمەن جاساسقان مەموراندۋمعا سايكەس، ماسكالاردىڭ جەتكىزىلگەنى تۋرالى ەسەپ بەرە وتىرىپ، ولاردىڭ ءتيىستى مەكەن-جايلارعا ۋاقىتىلى جەتكىزىلۋىن قامتاماسىز ەتۋى كەرەك.

«ماسكالار ەڭ الدىمەن، تۇرعىنداردىڭ ۆيرۋس جۇقتىرۋ قاۋىپى جوعارى ءالسىز توپتارىنا، ونىڭ ىشىندە جالعىز باستى قارتتارعا، كوپبالالى جانە از قامتىلعان وتباسىلارعا، جەتىم بالالارعا، ۇوس-نىڭ ارداگەرلەرىنە جانە ولارعا تەڭەستىرىلگەندەرگە، تىل ەڭبەككەرلەرىنە، ەرەكشە قاجەتتىلىكتەرى بار ازاماتتار مەن مۇمكىندىگى شەكتەۋلى بالالاردى كۇتۋشى ادامدارعا ارنالعان»، - دەدى رۋسلان ساكەەۆ.

ەسكە سالا كەتەيىك، «Birgemiz» قوعامدىق قورى ەلباسىنىڭ باستاماسىمەن كوروناۆيرۋسقا قارسى كۇرەس جاعدايىندا حالىقتىڭ مۇقتاج توپتارىن قولداۋ ماقساتىندا قۇرىلدى. بۇگىندە قورعا 13 ميللياردتان استام تەڭگە ءتۇستى. كومەك الۋشالاردىڭ تىزىمدەرىن ناقتىلاۋ ءۇشىن اكىمدىكتەر جانە الەۋمەتتىك قامسىزداندىرۋ مەكمەلەرىمەن بەلسەندى جۇمىس جۇرگىزىلۋدە. كورسەتىلگەن كومەكتىڭ بارلىق تۇرلەرى مەن تۇسكەن قاراجات بويىنشا ۇيىمنىڭ سايتىندا جانە الەۋمەتتىك جەلىلەردە ۇدايى اقپاراتتار جاريالانىپ، جۇرتشىلىققا تۇراقتى تۇردە ەسەپ بەرىلەدى.

Abai.kz

6 پىكىر