قازاقستان رەسپۋبليكاسىنىڭ سىرتقى ىستەر مينيسترلىگىندە قىتايدىڭ قر-داعى ەلشىسى چجان سياومەن كەزدەسۋ ءوتتى. كەزدەسۋ بارىسىندا قازاقستاندىق تاراپ قىتايلىق www.sohu.com سايتىنداعى «قازاقستان نەگە قىتايعا ورالۋعا تىرىسادى» اتتى ماقالاعا قاتىستى نارازىلىق ءبىلدىردى.

«قىتاي ەلشىسىنە مۇنداي سيپاتتاعى ماقالانىڭ جاريالانۋى 2019 جىلعى 11 قىركۇيەكتە مەملەكەت باسشىلارى قول قويعان قازاقستان رەسپۋبليكاسى مەن قىتاي حالىق رەسپۋبليكاسىنىڭ بىرلەسكەن مالىمدەمەسىندە ايقىندالعان ماڭگىلىك جان-جاقتى ستراتەگيالىق ارىپتەستىك رۋحىنا سايكەس كەلمەيتىندىگى اتاپ ءوتىلدى. تاراپتار اقپارات تاراتۋ جانە باق سالاسىندا تىعىز ءوزارا ىقپالداسۋعا كەلىستى»، - دەلىنگەن قر ءسىم اقپاراتىندا.

سونداي-اق ءمالىم بولعانداي، قازاقستاننىڭ بەيجىڭدەگى ەلشىلىگى قحر سىرتقى ىستەر مينيسترلىگىنە ءتيىستى نوتا جولدادى.

ايتا كەتەيىك، بۇل ماسەلەگە قاتىستى 11-ءساۋىر كۇنى Abai.kz سايتىندا «تاريحقا تورەلىك ايتاتىن قىتاي ەمەس» اتتى ماقالا جاريالانعان بولاتىن.

Abai.kz