داڭقتى باۋىرجان مومىشۇلىنىڭ جەرلەستەرى ايدى اسپانعا ءبىر-اق شىعاردى. مىناداي جاعدايعا كۋا بولعاندا، ولاي دەمەسكە ءاددىمىز جوق. جۋالىلىق اتقامىنەرلەر ىبىراي التىنسارين كوشەسىن ءوز اتىمەن اتاماۋدى ۇيعارىپتى. ونىڭ ورنىنا ەسىمى ەلەۋسىز ءسۇيىنباي توتايۇلىنىڭ اتىن تاڭىپ بەرىپ وتىر. بۇل ءسۇيىنباي قاي ءسۇيىنباي، ءالتىنساريننىڭ اتى كىمگە كەدەرگى كەلتىردى، كوشە اتىن اۋىستىرعاندا نەگە سۇيەنگەن؟  بۇعان باس قاتىرعان ەشكىم جوق ءتارىزدى. العان دا، وزگەرتە سالعان. ۇلى باۋكەڭ مۇنى كورسە، نە دەر ەدى، شىركىن؟..
ءبىر بۇل عانا ەمەس، تۇتاستاي العاندا، اۋليەاتالىقتار اتاۋى رەسمي تىلدە ايقايلاعان كوشەلەردەن ءالى كۇنگە ارىلا الماي كەلەدى. زامانى ءوتىپ، اتاۋلارى تاريح شاڭىنا كومىلىپ كەتسە دە، لەنين مەن كرۋپسكايانىڭ، ودان قالا بەردى، كالينيننىڭ قۇرمەتىنە قويىلعان كوشەلەردەن كوز سۇرىنەدى. ال قىسىلتاياڭ ۋاقىتتا بەلۋاردان قان كەشىپ، مۇز جاستانعان تۇلعالار ەسىمدەرى تاسادا قالىپ قويۋدا.
وبلىستاعى ءتورت مىڭنان استام كوشەنىڭ 29 پايىزى وزگە ءتىلدىڭ ەنشىسىنە بۇيىرىپتى. ماعىنا-ماننەن جۇرداي قالعاندار دا جەتىپ ارتىلادى. ماسەلەن، سوڭعى التى جىلدا 400-دەن استام كوشە جاڭا اتاۋدى يەمدەنگەن. ولاردىڭ ىشىندەگى 28-ءى عانا – تاريحي تۇلعا مەن جەر، سۋ اتاۋىن العاندار.
ساۋىت ماحامبەتوۆ، جۋالى اۋداندىق اكىمدىگى ىشكى ساياسات ءبولىمىنىڭ باستىعى:
– ءسۇيىنباي توتايۇلى جۋالىنىڭ شاقپاقاتا اۋىلىندا تۋعان ءارى قىزمەت ىستەگەن ازامات ەكەن. سول كىسىنىڭ تۋىستارى مەن اۋىلداستارى حات دايىنداپ، اۋداندىق ونوماستيكا كوميسسياسىنا التىنسارين كوشەسىن توتايۇلى اتىمەن اتاۋ جونىندە ءوتىنىش بەرگەن. ونوماستيكا كوميسسياسىنىڭ بۇرىنعى توراعاسى مىرزاحان احمەتوۆ بۇل ۇسىنىستى قولداپ، كوشە اتىن وزگەرتكەن.
مەن ول كەزدە جۇمىس ىستەگەن جوقپىن. بۇل قىزمەتكە جاڭادان كەلدىم. بولاشاقتا سول اۋىلداعى ءبىر كوشەگە التىنسارين ەسىمىن بەرۋگە كۇش سالاتىن بولامىز.

ماقۇلبەك مالداربەكوۆ، جامبىل وبلىسى
«الاش ايناسى» گازەتى 24 ماۋسىم 2009 جىل