باتكەن مەن سوح اراسىنداعى شەكارا مارتەبەسى انىقتالعان، بىراق تۇرعاندار جايلاۋ مەن سۋعا ۇنەمى تالاسىپ قالا بەرەدى.

قازىر شەكارا تىنىش، دەپ حابارلادى باتكەن اۋدانىنداعى اپكان اۋىلىنىڭ جاماليدين ەسىمدى تۇرعىنى.

"وزبەكستانعا قاراستى لەمبۋرگ اۋىلىنىڭ تۇرعىندارى مالدى ءبىزدىڭ جايلاۋدا باققان. ءبىزدىڭ شەكاراشىلار ولاردان كەتۋىن سۇراعان، بىراق مالشىلار قارسى بولعان. ەستۋىمشە، شەكاراشىلار اۋەگە وق اتقان. قازىر ەشقانداي شۋ جوق", - دەدى باتكەندىك.

ونىڭ ايتقاندارىن سوح انكلاۆىنىڭ تۇرعىنى فارحود سافاروۆ راستادى. ونىڭ ايتۋىنشا، انكلاۆتاعىلار وسى ۋاقىتقا دەيىن مالدى وسى جايلاۋعا جايىپ كەلگەن.

"تاۋەلسىزدىك العان سوڭ بۇل جەر دەربەس ايماققا اينالدى. اتىس بولعان جوق. قىرعىز شەكاراشىلارى وقتى اۋەگە اتقان. جينالعان ادامدار كەيىن تارقاپ كەتتى. سونىمەن داۋ ءبىتتى", - دەدى ول.

قىرعىزستاننىڭ مەملەكەتتىك شەكارا قىزمەتىندەگىلەر وسىنداي وقيعا بولعانىن راستادى، بىراق شەكاراشىلار شەكاراداعى زاڭسىزدىقتى بولدىرماۋعا تىرىسقانىن ەسكەرتىپ ءوتتى. وقيعادان سوڭ ەكى ەلدىڭ جەرگىلىكتى بيلىك وكىلدەرى تۇرعىندار اراسىندا ءتۇسىندىرۋ جۇمىستارىن جۇرگىزگەن.

وسى وقيعادان سوڭ وزبەكستان قىرعىزدىڭ اپكان اۋىلىنا سۋدى از بەرەتىن بولعان. سۋ-باشى اۋىلىنىڭ باسشىسى كۋدايبەردي كوزۋەۆ ماسەلەنى شەشۋ ءۇشىن كورشى ەلگە بارعان.

ء"بىز سۋدىڭ ازايىپ كەتۋىنە بايلانىستى سوح وكىلدەرىمەن كەزدەستىك. قازىر سۋ بۇرىنعىسىنشا اعىپ تۇر", - دەدى كوزۋەۆ.

بۇل ۋاقىتتا، ءدال وسى سوح انكلاۆى مەن چارباك اۋىلى اراسىنداعى شەكارادا تاعى ءبىر جانجال بولعان. مالىمەتتەرگە قاراعاندا، وزبەكستاننىڭ حۋشەر اۋىلىنا سۋ تارتۋ مەن جول جوندەۋ جۇمىستارى كەزىندە داۋ شىققان.

2013 جىلى سوح انكلاۆىنىڭ تۇرعىندارى شەكارا قىرعىزداردىڭ ەلەكتر جەلىسىن تارتۋىنا قارسى شىقتى. ولار باتكەن اۋدانىنىڭ چارباك اۋىلىنا كىرىپ، اۆتوكولىكتەردى قيراتتى، وتىزدان استام قىرعىزستاندىقتى كەپىلگە الدى. ءبىر كۇنگە سوزىلعان كەلىسسەزدەردەن سوڭ انكلاۆ تۇرعىندارى كەپىلدەگىلەردى بوساتتى. سودان بەرى انكلاۆتى وزبەكستانمەن جالعاستىراتىن سوح-ريشتون جولى جابىق تۇر. وتكەن جىلى جولدىڭ سالتاناتتى اشىلۋ سالتاناتى وتكەن، بىراق بىرنەشە ساعاتتان سوڭ ول قايتادان جابىلدى.

قىرعىزستان مەن وزبەكستاننىڭ 1379 شاقىرىم ورتاق شەكاراسى بار، سونىڭ شامامەن بەس پايىزىنىڭ مارتەبەسى انىقتالماعان.

Abai.kz