بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا تولىقتىرۋلار ەنگىزۋ تۋرالى» كونستيتۋتسيالىق زاڭىنىڭ جوباسى ماقۇلداندى. وسىعان وراي، تانىمال قازاقستاندىق ساياساتتانۋشى، «Birgemiz» قوعامدىق قورى قامقورشىلىق كەڭەسىنىڭ مۇشەسى ەرلان سايروۆ پەن قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى مارات شيبۇتوۆ مەملەكەت باسشىسىنىڭ پارلامەنتتىك وپپوزيتسيا ينستيتۋتى باستاماسى جونىندەگى پىكىرلەرىمەن ءبولىستى.

«بۇل قر پرەزيدەنتى قاسىم-جومارت كەمەلۇلى توقاەۆتىڭ ۇلتتىق سەنىم كەڭەسى اياسىندا ۇسىنعان ساياسي رەفورمالار توپتاماسىنىڭ ءبىرى. بۇل توپتاما اۋقىمدى ءارى ەكىجاقتى مانگە يە. بىرىنشىدەن، وپپوزيتسيانىڭ دەسترۋكتيۆتى ەمەس ەكەندىگى ايتىلادى. وپپوزيتسيا - بۇل ەلىمىزدىڭ دامۋ ماقساتتارىنا قول جەتكىزۋدەگى مەملەكەت سەرىكتەسى. قۇندىلىق دەڭگەيىندە مۇنىڭ وتە ۇلكەن ءمانى بار»، - دەدى ەرلان سايروۆ «قازاقپارات» تىلشىسىمەن تەلەفون ارقىلى سۇحباتتاسۋ بارىسىندا.

ونىڭ ايتۋىنشا، ەكىنشىدەن، زاڭنامالىق دەڭگەيدە وپپوزيتسيالىق قىزمەت پەن پارلامەنتتىك ازشىلىق قىزمەتىنە كەپىل بەكىتىلەدى.

«ياعني، پارلامەنت ىشىندە بەلگىلى ءبىر ارتىقشىلىققا، سونىمەن قاتار پارلامەنتتىك ازشىلىق وكىلىنىڭ ناقتى ءبىر لاۋازىمدى يەلەنۋىنە كەپىلدىك بەرىلەدى. بۇل الەمدىك تاجىريبە سانالادى. سوندىقتان قازاقستان بۇگىنگى كۇنى ساياسي رەفورمالاردى ىلگەرىلەتۋدە دەموكراتيانىڭ حالىقارالىق ستاندارتتارىنا ساي كەلەدى دەپ ايتۋعا بولادى. قازىرگى ۋاقىتتا ءبىز ءدال سوعان قاراي كەلە جاتىرمىز»، - دەدى ساياساتتانۋشى.

ال مارات شيبۇتوۆ پارلامەنتتىك وپپوزيتسيا ينستيتۋتى جايىندا ۇزاق ۋاقىتتان بەرى ايتىلىپ كەلە جاتقاندىعىن ەسكە سالىپ ءوتتى.

«ۇلتتىق قوعامدىق سەنىم كەڭەسى اياسىندا بۇل يدەيا جاندانا ءتۇستى. ءبىز دە بۇل جايىندا باستاما كوتەرگەن ەدىك. الايدا دەپۋتات ازات پەرۋاشەۆ بۇل زاڭدى ازىرلەپ شىقتى. ارينە، بۇل قۇقىقتاردىڭ مۇنان دا كوپ بولعانىن قالاعانىمىزبەن وسىنىڭ ءوزى دە ءتاۋىر. ءاربىر پارتيا ءبىر كوميتەت باسشىلىعىنا يە بولعانىن قالار ەدىم. بۇل جەردە ءبىر توراعا لاۋازىمى مەن كوميتەتتەردىڭ 2 حاتشىلىق لاۋازىمى جايىندا عانا ايتىلعان. مۇنىڭ ءوزى دە جاپ-جاقسى. ءبىر سەسسيادا پارلامەنتتىك تىڭداۋعا باستاماشىلىق جاساۋ دا دۇرىس. بۇل پارلامەنتتەگى وپپوزيتسيالىق پارتيانىڭ مۇمكىندىكتەرىن ايتارلىقتاي ارتتىرا تۇسەر ەدى. بۇل - دەموكراتياعا قاراي قادام»، - دەدى قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى.

ەستەرىڭىزگە سالا كەتسەك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا تولىقتىرۋلار ەنگىزۋ تۋرالى» كونستيتۋتسيالىق زاڭىنىڭ جوباسى ماقۇلداندى.

زاڭ جوباسىنىڭ نەگىزگى ماقساتى - قولدانىستاعى زاڭنامادا «پارلامەنتتىك كوپشىلىك» جانە «پارلامەنتتىك وپپوزيتسيا» ۇعىمدارىن بەكىتۋ بويىنشا قۇقىقتىق نەگىزدەردى قامتاماسىز ەتۋ. ماسەلەن، پارلامەنتتىك وپپوزيتسياعا قانداي دا ءبىر ماسەلە بويىنشا ءوز ۇستانىمىن بىلدىرۋگە كەپىلدىك بەرۋ ماقساتىندا زاڭ جوباسىندا ساياسي پارتيالار فراكتسيالارى باسشىلارىنىڭ پارلامەنت پالاتالارىنىڭ بىرلەسكەن وتىرىستارىندا، پارلامەنت ءماجىلىسىنىڭ جالپى وتىرىستارىندا، تۇراقتى كوميتەتتەردىڭ، جۇمىس توپتارىنىڭ وتىرىستارىندا، پارلامەنتتىك تىڭداۋلار مەن وزگە دە ءىس-شارالاردا ءسوز سويلەۋگە كەپىلدىك بەرىلگەن قۇقىعىن بەكىتۋ كوزدەلەدى.

Abai.kz