جەڭىستىڭ 75 جىلدىعىنا وراي الماتى وبلىسىنداعى 238 ۇوس
ارداگەرىنە ارنالعان ەسكەرتكىش جوندەۋدەن وتپەك. باستاما وبلىس اكىمى
اماندىق باتالوۆتىڭ تىكەلەي تاپسىرماسىمەن «رۋحاني جاڭعىرۋ»
مەملەكەتتىك باعدارلاماسى اياسىندا جۇزەگە اسىرىلۋدا. بۇل ماقساتتا
وبلىستىق بيۋدجەتتەن 150 ميلليون تەڭگە بولىنگەن. بيىل 119 ەسكەرتكىش تاقتا
قايتا جانە كۇردەلى جوندەۋدەن وتپەك.

«الماتى وبلىسىندا جالپى سانى 2363 تاريحي جانە مادەني ەسكەرتكىش
بار. ونىڭ 238 ۇوس ارداگەرلەرىنىڭ قۇرمەتىنە قويىلعان. ءبىز باتىر
بابالارىمىزدىڭ ەرلىگىن ماڭگى ەستە ساقتاۋ ءۇشىن سوعىس ارداگەرلەرىنىڭ
قۇرمەتىنە قويىلعان مونۋمەنتتەر مەن ەسكەرتكىشتەردى قورعاپ، ۇرپاقتان-
ۇرپاققا امانات ەتىپ قالدىرۋىمىز قاجەت»، - دەدى الماتى وبلىستىق
مادەنيەت، مۇراعات جانە قۇجاتتاما باسقارماسىنىڭ باسشىسى مارلەن
كولباەۆ.

ەلدەگى كارانتيندىك جاعدايعا بايلانىستى جەڭىستىڭ 75 جىلدىعىنا وراي
ۇيىمداستىرىلعان بارلىق ءىس-شارالار ونلاين رەجيمدە ءوتىپ جاتىر. ماسەلەن،
مامىردىڭ باسىنان باستاپ 2 مىڭعا جۋىق كونتسەرت پەن تىكەلەي ەفير ءوتتى.
سونىمەن قاتار، مۋزەيلەرگە ونلاين ساياحات، كىتاپ كورمەلەرى مەن تاريحي
ساباقتار ۇيىمداستىرىلدى. ال، وبلىستىق ارداگەرلەر ۇيىمىنىڭ ۇيىتقى
بولۋىمەن «وتان ءۇشىن وت كەشكەندەر» اتتى كىتاپ جارىق كورمەك.
ايتا كەتۋ كەرەك، ۇوس ارداگەرلەرىن ونلاين قۇتتىقتاۋ شاراسىن
العاشقى بولىپ جەتىسۋلىقتار اتقاردى. الەۋمەتتىك جەلىدە ساۋدا
ورتالىعىندا «مايدان شەبىندە» ايتىلعان اندەر ورىندالىپ، وقىرمانداردىڭ ىقىلاسىنا بولەندى.

توتەنشە جاعدايعا بايلانىستى بيىل جەڭىس كۇنى دۇبىرلەنىپ تويلانباسا
دا اۋقىمدى شارالار اتقارىلماق. ماسەلەن، سول كۇنى تۇرعىندار «دەن
پوبەدى» ءانىن ءبىر مەزەتتە ورىنداپ رۋحتى اسقاقتاتسا، تاعى بىرنەشە نىساندا
«9» جانە «75» ايتۋلى سانىمەن جارىق جاعىلادى.

ايمان اسىل

Abai.kz