سەنبى, 4 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
الاڭ 1206 8 پىكىر 28 مامىر, 2020 ساعات 17:18

دۋلات اعادىلدىڭ قازاسىنا قاتىستى ءىس توقتاتىلدى

نۇر-سۇلتان قالاسىنىڭ پروكۋراتۋراسى ۋاقىتشا قاماۋ اباقتىسىندا قازا تاپقان بەلسەندى دۋلات اعادىلدىڭ ولىمىنە قاتىستى قىلمىستىق تەرگەۋدىڭ قورىتىندىسىن جاريالادى.

«اعادىلدىڭ ءولىمىنىڭ سەبەپتەرى مەن قانداي جاعدايدا قازا بولعانىن تاجىريبەلى سوت-مەديتسينا ساراپشىلارى مەن جوعارى كاتەگوريا كارديلوگتان تۇراتىن كوميسسيا جان-جاقتى زەرتتەدى. ولاردىڭ اراسىندا اعادىلدىڭ تۋىستارىنىڭ ءوتىنىشى بويىنشا قاتىستىرىلعان ساراپشىلار دا بولدى. ساراپشىلار اعادىل ميوكارد ينفاركتىسىنەن قايتىس بولعانىن انىقتادى… ساراپشىلار اعادىلدىڭ دەنەسىنەن جاراقات تاپپادى. وسىعان بايلانىستى 25 مامىر كۇنى اعادىلدىڭ ولىمىنە قاتىستى قىلمىستىق ءىس قىلمىستىق قۇقىق بۇزۋشىلىق وقيعاسىنىڭ جوقتىعىنا بايلانىستى توقتاتىلدى»، – دەلىنگەن قالالىق پروكۋراتۋرانىڭ ءباسپاسوز قىزمەتى تاراتقان حابارلامادى.

استانالىق بەلسەندى دۋلات اعادىل 25 اقپاندا نۇر-سۇلتانداعى تەرگەۋ يزولياتورىندا قايتىس بولدى. مارقۇمدى سودان ءبىر كۇن بۇرىن پوليتسەيلەر ۇيىنەن الىپ كەتكەن. بەلسەندىنى تۇتقىنداۋ ءساتى بەينەلەنگەن ۆيدەو الەۋمەتتىك جەلىگە تاراپ كەتتى.

نۇر-سۇلتان قالاسى پوليتسيا دەپارتامەنتىنىڭ رەسمي مالىمەتىنشە، دۋلات اعادىل «جۇرەك تالماسىنان» كوز جۇمعان. كەيىن پوليتسيا قايتىس بولعان بەلسەندىنىڭ الكوگولدىك ىشىمدىككە ماسايعان حالدە بولعانىن ايتتى. الايدا، مارقۇمنىڭ ارىپتەستەرى بەلسەندى اعادىلدىڭ ىشىمدىك ىشپەيتىنىن ايتتى.

وسىدان كەيىن نۇر-سۇلتان، الماتى، شىمكەنت، اقتوبە سەكىلدى بىرنەشە قالادا نارازىلىق اكتسيالارى ءوتتى.

26 اقپاندا اقش مەملەكەتتىك دەپارتامەنتى مەن ۇلىبريتانيانىڭ قازاقستانداعى ەلشىلىگى دۋلات اعادىل قازاسىن اشىق ءارى مۇقيات تەرگەۋگە شاقىردى.

Abai.kz

8 پىكىر