بەكەت جانىنداعى اۆتوۆوكزالدا پانالاعان جۇمىسشىلار تاجىكستان بيلىگىنىڭ ءوز ازاماتتارىن ەلىنە جەتكىزە الماعانىنا نارازى. ولار اۆتوۆوكزالدا تۇنەپ جۇرگەنىنە ءۇش ايعا جۋىقتاعانىن ايتادى. ايتۋىنشا، اس-سۋى تاۋسىلعان. كەيبىرى توسەنىشى بولماي، قاعاز ۇستىنە جاتۋعا ءماجبۇر.

- تاماعىمىزدى جەرگىلىكتى تۇرعىندار اكەلىپ جاتىر. جاتاتىن، جۋىناتىن ورىن جوق. كىم نە الىپ كەلەدى سونى ازىق ەتەمىز، - دەيدى اتى-ءجونىن اتاماعان تاجىكستان ازاماتى.

اۆتوۆوكزالدا جاتقانداردىڭ ىشىندە ەركەكتەر، ايەلدەر، بالالار جانە قارت ادامدار بار. "وزبەكستان سىرتتا قالعان ءوز ازاماتتارىن جيناپ، كىرگىزىپ جاتىر. تاجىكستان نەگە ازاماتتارىنا يە بولمايدى؟" دەيدى ءوزىن رايحان اپا دەپ تانىستىرعان زەينەتكەر.

جىبەك جولى اۋىلدىق وكرۋگىنىڭ اكىمى تالعات ازىمبەرديەۆ اۆتوۆوكزالدا 260 ادام تۇنەپ جاتقانىن ايتادى. اكىم تاجىكستاننىڭ قازاقستانداعى ەلشىلىگىنە ازاماتتارىنىڭ جاعدايى تۋرالى حابار بەرگەنىن مالىمدەدى. بىراق ەلشىلىك ءالى كۇنگە دەيىن ازاماتتارىن ەلىنە جەتكىزە الماي وتىر.

شەكارا بەكەتىندە جۇرگەن، ءوزىن تاجىكستاننىڭ قازاقستانداعى ەلشىلىگىندە جۇمىس ىستەيمىن دەپ تانىستىرعان ازامات ازاتتىق تىلشىسىنە پىكىر بەرۋدەن باس تارتتى.

ازاتتىق ءتىلشىسى شەكارا بەكەتىندە جۇرگەندە قازاقستاندا جۇمىس ىستەگەن وزبەكستان ازاماتتارىنىڭ بەكەتتەن ءوتىپ جاتقانىنا كۋا بولدى. وزبەكستاننىڭ قازاقستانداعى ەلشىلىگىنىڭ قىزمەتكەرى باحتيار كامالوۆ كۇنىنە مىڭعا جۋىق ادامنىڭ وزبەكستانعا ءوتىپ جاتقانىن ايتتى. ول شەكارادا تۇرىپ قالعان تاجىكتەردىڭ نە سەبەپتى وزبەكستان ارقىلى تاجىكستانعا وتكىزىلمەي جاتقانى تۋرالى جاۋاپ بەرە المايتىنىن ايتتى.

Abai.kz