بۇۇ دامۋ باعدارلاماسى مەن ءبىلىم جانە عىلىم مينيسترلىگى قازاقستاندا ەكولوگيالىق ءبىلىم بەرۋدى دامىتۋ جوباسىن ىسكە قوستى،- دەپ حابارلايدى مينيسترلىك سايتى. 

دۇنيەجۇزىلىك قورشاعان ورتانى قورعاۋ كۇنى قارساڭىندا قر ءبىلىم جانە عىلىم مينيسترلىگى مەن بۇۇ دامۋ باعدارلاماسى (بۇۇدب) قازاقستاندا ەكولوگيالىق ءبىلىم بەرۋدى دامىتۋ جوباسىن ىسكە قوستى.

اتالعان جوبانىڭ ماقساتى – ازاماتتاردىڭ بەلسەندى ومىرلىك ۇستانىمىن جانە قوعامنىڭ تۇراقتى دامۋ ۇستانىمدارىنا نەگىزدەلگەن ەكولوگيالىق مادەنيەتىن قالىپتاستىرۋ بويىنشا ۇكىمەت تاراپىنان قابىلدانىپ جاتقان شارالارعا قولداۋ كورسەتۋ.

«جوبانىڭ باستى ناتيجەسى - 6 مىڭنان استام مۇعالىمدى دايارلاۋ جانە قورشاعان ورتانى قورعاۋ، تابيعاتتى ايالاۋ، سونداي-اق ەكولوگيالىق جانە ەكونوميكالىق قاۋىپسىزدىك سالاسىنداعى وقۋ-ادىستەمەلىك قۇرالداردى ازىرلەۋ»، - دەپ اتاپ ءوتتى قر بعم مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا.

جوبا اياسىندا ءتۇرلى دەڭگەيدەگى 17 ءبىلىم بەرۋ ۇيىمى رەسۋرستاردى ۇنەمدەيتىن جاسىل تەحنولوگيالارمەن جابدىقتالادى. مەكتەپكە دەيىنگى ءبىلىم بەرۋدى ۇيىمداستىرۋ ءۇشىن ەكولوگيالىق مادەنيەت تۋرالى ادىستەمەلىك ماتەريالدار دايىندالادى. سونداي-اق «دۇنيە تانۋ» ءپانى بويىنشا 1-4-سىنىپ وقۋشىلارى تاقىرىپتىق ۇستەل ويىندارى مەن ينتەراكتيۆتى بەينەساباقتاردى پايدالانا الادى. ازىرلەنگەن ۇلگى ءارى قاراي بارلىق ءبىلىم بەرۋ ۇيىمىندا قولدانىلادى.

«جوبا زاڭنامانى جەتىلدىرۋ جانە قازاقستاننىڭ ءبىلىم بەرۋ جۇيەسىنە ەكولوگيالىق ءبىلىم بەرۋدى ەنگىزۋگە قۇقىقتىق نەگىز جاساۋ ارقىلى قوعامدا مەملەكەت پەن جاھاندىق الەمنىڭ تولىققاندى ءارى ورنىقتى دامۋى ءۇشىن تابيعي رەسۋرستاردى ۇتىمدى پايدالانۋعا قاجەتتى ەكولوگيالىق جاۋاپكەرشىلىكتى قالىپتاستىرۋعا باعىتتالعان», - دەدى بۇۇدب تۇراقتى وكىلى ياكۋپ بەريش.

ەكولوگيالىق ءبىلىم بەرۋ كليماتتىڭ وزگەرۋى، بيولوگيالىق الۋان تۇرلىلىكتى ساقتاۋ، ۇتىمدى تۇتىنۋ مەن ءوندىرىس سياقتى جاھاندىق ەكولوگيالىق كۇن ءتارتىبىنىڭ اسا ماڭىزدى اسپەكتىلەرىن قامتيتىن بولادى.

جوبانى جۇزەگە اسىرۋعا (2020-2024 جج.) قر ەكولوگيا، گەولوگيا جانە تابيعي رەسۋرستار مينيسترلىگى مەن «جاسىل» تەحنولوگيالار مەن ينۆەستيتسيالىق جوبالاردىڭ حالىقارالىق ورتالىعى» كەاق قولداۋ كورسەتەدى.

Abai.kz