سوڭعى ۋاقىتتا كوروناۆيرۋستىڭ بار ەكەندىگىنە سەنبەيتىن جۇرت قاتارى كوبەيە تۇسكەن سياقتى. ولاردىڭ سەنبەۋىنىڭ كوپتەگەن سەبەپتەرى بار. سونىڭ ءبىرى، اۋرۋ جۇقتىرعان ادامداردىڭ از بولۋىنا بايلانىستى تانىس ادامداردىڭ كەزدەسپەۋى نەمەسە اتتارىنىڭ جاريا ەتىلمەۋى بولسا، ەكىنشىسى باستاپقىدا كوروناۆيرۋس جۇقتىرعان، بىراق، سيمپتومى ءالى بىلىنە قويماعان ادامدار كوپتەپ اۋرۋحانالارعا جاتقىزىلدى. "ولار اۋرۋ بولماساق تا قاماپ قويدى، تەرەزەدەن سەكىرەمىز، قاشىپ شىعامىن” دەپ ۆيدەو ءتۇسىرىپ، ەلدىڭ اراسىنا تاراتىپ جىبەردى. ۋاتسابىما اۋىلداس كىسىلەردىڭ وسى تەكتەس بىرنەشە اۋديو جازبالارى دا كەلدى. وسىنداي ۆيرۋس ۆيدەولار كوبەيە بەرگەن سوڭ، حالىق اراسىندا كۇمان كوبەيە ءتۇستى.

بۇل رەتتە بىزبەن سالىستىرعاندا وزبەكستان وڭتايلى شەشىم قابىلداعان سياقتى. ولار كوروناۆيرۋسپەن اۋىرىپ، جاعدايى كۇردەلى بوپ جاتقان ادامداردى ۆيدەوعا ءتۇسىرىپ، ەلدىڭ اراسىنا تاراتىپ جىبەردى. بويىن ۇرەي بيلەگەن ەل ۇيلەرىنەن شىقپاي قويىپتى. ناتيجەسىندە اۋرۋدى جۇقتىرۋشىلاردىڭ سانى دا ازايعان.

كەشە اقوردانىڭ ءباسپاسوز حاتشىسى بەرىك ءۋالي بۇل ۆيرۋستى جۇقتىرعانىن الەۋمەتتىك پاراقشاسىندا جاريالاعان بولاتىن. بىراق پوستىڭ استىنا جازىلعان “وتىرىك سپەكتاكل قويىپ وتىرسىڭدار", "كوروناۆيرۋسقا بولىنگەن اقشانى اقتاپ جاتسىڭدار ما؟", "كەشە پەسكوۆ اۋىرىپ ەدى، ەندى بەرىك ءۋالي. اۋرۋدى دا ماسكەۋگە قاراپ انىقتايدى" دەگەن سياقتى پىكىرلەردەن قاراپايىم حالىق قانا ەمەس، وقىعان، كوزى اشىق دەگەن كەيبىر ازاماتتاردىڭ ءوزى اۋرۋدان ساياسي استار ىزدەپ، ونىڭ بار ەكەندىگىنە كۇمانمەن قارايتىنىن بايقاۋعا بولادى. بەرىك ءۋاليدىڭ اۋرۋ جۇقتىرعانى راس. ونىڭ اتا-اناسى دا جۇقتىرعانى انىقتالىپ وتىر.

بيلىك اقپاراتتىق اعارتۋ بويىنشا جەتكىلىكسىز جۇمىس جاساپ وتىرعانىن مويىنداۋى كەرەك. سوندىقتان ەڭ اۋەلى حالىقتىڭ ۆيرۋسقا قاتىستى كۇمانىن سەيىلتۋ باعىتىندا اعارتۋ جۇمىستارىن شۇعىل قولعا الۋلارى ءتيىس.

قايرات جولدىبايۇلىنىڭ الەۋمەتتىك جەلىدەگى جازباسىنان

Abai.kz